24 تامىز كۇنى تاڭعى ساعات 8.40. شاماسىندا ورال قالاسىندا شاعان وزەنىنەن وتەر كوپىرگە جاقىن جەردە №5 جانە №7 اۆتوبۋستار سوقتىعىسىپ قالعان. الدىن الا مالىمەتتەر بويىنشا, №7 اۆتوبۋستىڭ 24 جاسار جۇرگىزۋشىسى جوعارى جىلدامدىقپەن ءجۇرىپ, رولگە يە بولا الماي, كوپىر اۋزىندا كەپتەلىستە تۇرعان №5 اۆتوبۋستىڭ ارتىنان سوققان. تاڭەرتەڭگى ۋاقىت بولعاندىقتان ەكى اۆتوبۋستا دا جولاۋشى تولا بولعان. سوققىنىڭ قاتتى بولعانى سونشالىق, كەيبىر جولاۋشىلار تەرەزەدەن ۇشىپ تۇسكەن, ورىندىقتار ورنىنان ج ۇلىنىپ كەتكەن.
العاشقى كەزدە اۆتوبۋستاعى ادامدار ەسىكتەن شىعا الماي, تاپالىپ, بەي-بەرەكەتسىزدىك ورىن العان. زارداپ شەگۋشىلەرگە اۋەلى جولداعى كەزدەيسوق كۋاگەرلەر كومەكتەسىپ, جەكە كولىكتەرىمەن اۋرۋحاناعا الىپ كەتكەن. ون مينۋت وتكەندە «جەدەل جاردەم» كولىكتەرى دە جەتكەن. 7 ەكيپاج جەدەل قيمىلداپ, دارىگەرلىك كومەككە مۇقتاج جانداردى اۋرۋحانالارعا جەتكىزگەن. جول-كولىك اپاتىنا كىنالى №7 اۆتوبۋستىڭ جۇرگىزۋشىسىنىڭ جاراقاتى اۋىر, ونى ورىندىق اراسىنا قىستىرىلىپ قالعان جەرىنەن قۇتقارۋشىلار شىعارىپ العان.
باتىس قازاقستان وبلىسى دەنساۋلىق ساقتاۋ باسقارماسىنىڭ ءبولىم باسشىسى ايگۇل قۇلباراقوۆانىڭ مالىمدەۋىنشە, وبلىستىق كلينيكالىق اۋرۋحاناعا 17 ادام تۇسكەن, قالالىق كوپبەيىندى اۋرۋحاناعا 41 ادام اكەلىنگەن. ولاردىڭ 5-ەۋى اۋرۋحاناعا جاتقىزىلعان. جولاۋشىلاردىڭ ءبىرىنىڭ يىق سۇيەگى سىنسا, تورتەۋىنىڭ ميى شايقالعان. اپاتتا كامەلەتكە تولماعان 5 بالا دا زارداپ شەككەن, ولار دارىگەرلەردىڭ تولىق تەكسەرۋىنەن كەيىن ۇيلەرىنە قايتارىلعان.
- قازاقستان رەسپۋبليكاسى قىلمىستىق كودەكسىنىڭ 345 بابى, 1 تارماعى بويىنشا ءىس قوزعالدى. جول-كولىك وقيعاسىنان «رەنو داستەر» جانە «لارگۋس» اۆتوكولىكتەرى دە زارداپ شەككەن. قازىر بارلىق اۆتوكولىك ايىپتۇراعىنا جەتكىزىلدى, ءتيىستى ساراپتامالار جاسالىپ جاتىر, - دەيدى بقو ىشكى ىستەر باسقارماسى جەرگىلىكتى پوليتسيا قىزمەتىنىڭ باستىعى ماناربەك عابدۋللين.
باتىس قازاقستان وبلىسىنىڭ اكىمى التاي كولگىنوۆ وسىدان ءبىر كۇن بۇرىن عانا جولاۋشىلار تاسىمالىنا جاۋاپتى كومپانيالاردىڭ جۇمىسىن قاداعالاۋ قاجەتتىگىن ەسكەرتىپ, «اۆتوبۋستاردى جاڭارتۋدان باستاپ, كوندۋكتورلار مەن جۇرگىزۋشىلەردىڭ ارنايى كيىم كيۋىن, جولاۋشىلارمەن قارىم-قاتىناسىنا دەيىن رەتكە كەلۋى قاجەت», – دەگەن بولاتىن. ويتكەنى جاقىندا عانا ورال قالاسىندا جول ءجۇرۋ قۇنى 80 تەڭگەگە كوتەرىلگەنىمەن, جولاۋشى تاسىمالداۋ ساپاسى حالىقتىڭ كوڭىلىنەن شىقپاي, شاعىم كوبەيىپ تۇر. اسىرەسە №5, 7, 22 باعىتىنداعى اۆتوبۋستار جول ەرەجەسىن ءجيى بۇزىپ, ءبىر-بىرىمەن جارىساتىنى تۋرالى بۇرىن دا تالاي ايتىلىپ كەلگەن ەدى.
قازبەك قۇتتىمۇرات ۇلى
«ەگەمەن قازاقستان»
