پاۆلودار وبلىسى – ەلىمىزدىڭ سولتۇستىك-شىعىسىندا ورنالاسقان قويناۋى كەنگە تولى, شەجىرەسى شىرايلى, توپىراعى قۇنارلى مەكەن. بۇل ولكەدەن ۇلتىمىزدىڭ نەبىر مارقاسقا ۇل-قىزدارى شىققان. جالپاق جۇرتى ەرتىستىڭ كەمەرىن جالداي قونىپ, بايان تاۋىنىڭ سۇلۋ سيپاتىن بويىنا سىڭىرگەن.
سوڭعى جىلدارى وبلىس ەكونوميكاسىنىڭ ءوسۋ سەرپىنى ىلگەرىلەپ كەلەدى. تەك بيىلعى جىلدىڭ العاشقى توقسانىندا وڭىرلىك ءونىمنىڭ كولەمى 491,5 ملرد تەڭگەنى قۇراعان. بۇل وتكەن جىلدىڭ ءتيىستى كەزەڭىمەن سالىستىرعاندا 105,6 پايىزدىق كورسەتكىشكە يە. ال, ءىجو مولشەرى جان باسىنا شاققاندا 649,7 مىڭ تەڭگە بولسا, قىسقا مەرزىمدى ەكونوميكالىق ينديكاتور وتكەن جىلمەن سالىستىرعاندا 106,2 پايىزعا كوتەرىلگەن.
ونەركاسىپ ونىمدەرىنىڭ كورسەتكىشى جىلدىڭ العاشقى التى ايىندا 988,2 ملرد تەڭگەنى قۇراسا, كەن ءوندىرۋ ونەركاسىبى 183,5 ملرد تەڭگەنىڭ ءونىمىن وندىرگەن. ونىڭ ىشىندە – كومىر ءوندىرۋ كولەمى 37,0 ملن تونناعا جەتىپ, وڭدەۋ ونەركاسىبىنىڭ ءونىم كولەمى 636,4 ملرد تەڭگەنى قۇراپتى.
سول سياقتى ەلەكترمەن جابدىقتاۋ, گاز, بۋ بەرۋ جانە اۋانى باپتاۋ سالاسى بويىنشا ءوندىرىس كولەمى 161,4 ملرد تەڭگەگە يەك ارتسا, وبلىسقا تيەسىلى ەلەكتر ستانسالارى ساعاتىنا 23,0 ملرد كۆت ەنەرگيا ءوندىرىپ, جىلۋ ەنەرگياسىن ءوندىرۋ ءىسى 8174,2 مىڭ گكالدىق ناتيجەگە جەتكەن.
يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ەكىنشى بەس جىلدىعى شەڭبەرىندە وبلىس كولەمىندە يندۋس-تريالاندىرۋ جانە كاسىپكەرلىكتى قولداۋ كارتالارى بويىنشا 1,1 ترلن تەڭگە ينۆەستيتسيا تارتىلىپ, 35 جوبا ىسكە اسىرىلىپ جاتىر. ناتيجەسىندە جاڭادان 8377 جۇمىس ورنى اشىلادى دەپ كۇتىلۋدە. باعدارلامانى ءىشىنارا تالداپ, تارقاتار بولساق ينۆەستيتسيا كولەمى: ءۇشىنشى جوبا شەڭبەرىندە 637,5 ملرد تەڭگە, 32-ءشى جوبا «پاۆلودار وبلىسىنىڭ كاسىپكەرلىگىن قولداۋ» كارتاسى بويىنشا 470,6 ملرد تەڭگەگە جەتىپ, وتكەن جىلى 11 جوبا ىسكە قوسىلىپتى. الداعى 2017-2024 جىلدارى 655,4 ملرد تەڭگە مولشەرىندە ينۆەستيتسيا تارتىلىپ, 24 جوبانى ىسكە قوسۋ جوسپارلانۋدا.
ەل ەكونوميكاسىنىڭ تاعى ءبىر تەتىگى قۇرىلىس سالاسى دا دامۋ ۇستىندە. بيىلدىڭ العاشقى التى ايىندا جۇرگىزىلگەن قۇرىلىس جۇمىستارىنىڭ كولەمى 77,0 ملرد تەڭگەنى قۇراپ, وبلىس بويىنشا بارلىعى 108,7 مىڭ شارشى مەتر تۇرعىن ءۇي پايدالانۋعا بەرىلگەن.
سول سياقتى ءوڭىر ەكونوميكاسىنا ينۆەستيتسيا تارتۋ ءىسى دە ويداعىداي. 2017 جىلدىڭ قاڭتار-شىلدە ايلارى ارالىعىندا وبلىس ەكونوميكاسىنا 178,6 ملرد تەڭگە ينۆەستيتسيا تارتىلىپ, سىرتقى ساۋدا اينالىمىنىڭ كولەمى وتكەن قاڭتار-مامىر ايلارىندا 1115,2 ملن اقش دوللارىن قۇراپ وتىر. سونىڭ ىشىندە ەكسپورت – 684,5 ملن اقش دوللارىنا, يمپورت – 430,7 ملن اقش دوللارىنا جەتىپتى. ساۋدا بالانسىنىڭ سالدوسى 253,7 ملن اقش دوللارى شاماسىندا.
شاعىن جانە ورتا كاسىپكەرلىكتى دامىتۋ وتكەن جىلدىڭ ءدال وسى كەزەڭىمەن سالىستىرعاندا 6,2 پايىزعا ءوسىپ, 41,5 مىڭ بىرلىككە جەتكەن. تەك وسى جىلى «بيزنەستىڭ جول كارتاسى – 2020» بيزنەستى قولداۋ مەن دامىتۋدىڭ بىرىڭعاي باعدارلاماسىن ىسكە اسىرۋعا 4,1 ملرد تەڭگە بولىنگەن. «مونوقالالار مەن اۋىل كاسىپكەرلەرىنىڭ جاڭا بيزنەس باستامالارىن قولداۋ» باعدارلاماسى شەڭبەرىندە 705 جوبا ماقۇلدانىپ, وعان 21,6 ملرد تەڭگە قاراستىرىلعان. ەكىنىشى باعىت – «ەكونوميكانىڭ باسىم سەكتورلارى مەن وڭدەۋشى ونەركاسىپ سالالارى قىزمەتىن جۇزەگە اسىراتىن كاسىپكەرلەردى قولداۋ» شەڭبەرىندە 883 جوبا ماقۇلدانىپ, وعان 99,1 ملرد تەڭگە كولەمىندە قارجى ويلاستىرىلۋدا ەكەن.
كولىك جانە بايلانىس قىزمەتىنە كەلەر بولساق: 2017 جىلدىڭ قاڭتار-شىلدە ايلارىندا كولىكپەن جۇك تاسىمالداۋ كولەمى (تەمىرجولدى ەسەپكە الماعاندا) 72,4 ملن تونناعا جەتىپ, جولاۋشىلار تاسىمالىنىڭ اينالىمى 6,2 پايىزعا ارتقان. وبلىس اۆتوجولدارىن جوندەۋگە جانە كۇتىپ-ۇستاۋعا جەرگىلىكتى بيۋدجەتتەردەن 9797,9 ملن تەڭگە بولىنگەن. ال بايلانىس قىزمەتىنەن تۇسكەن كىرىس 7,6 ملرد تەڭگەگە جەتسە, بولشەك ساۋدا اينالىمى 177,5 ملرد تەڭگەنىڭ توڭىرەگىنە تۇراقتاعان.
اعىمداعى جىلدىڭ 1 تامىزىنداعى جاعداي بويىنشا مەملەكەتتىك بيۋدجەتكە 125,3 ملرد تەڭگە سالىقتار مەن باسقا دا مىندەتتى تولەمدەر تۇسكەن ەكەن. بۇل كورسەتكىش وتكەن جىلداعى وسى كەزەڭ جوسپارىنا قاراعاندا 105,9 پايىزدىق باسىمدىققا يە. جوعارىداعى سالىقتار مەن مىندەتتى تولەمدەردىڭ 63,3 ملرد تەڭگەسى رەسپۋبليكالىق بيۋدجەتكە, 60,0 ملرد تەڭگەسى جەرگىلىكتى بيۋدجەتكە اۋدارىلىپ وتىر.
* * *
وبلىس كۇندەرىنىڭ اياسىندا قولعا الىنعان اۋقىمدى شارانىڭ ءبىرى – ەلوردالىقتار ءۇشىن ارزانداتىلعان باعاعا اۋىلشارۋاشىلىق ونىمدەرىن ساۋدالاۋ ءىسى. بۇل ءۇردىس بۇعان دەيىن دە كوپتەگەن وبلىستار تاراپىنان جالعاسىن تاپقان بولاتىن.
كەرەكۋ ءوڭىرىنىڭ باسقا ولكەلەردەن ارتىقشىلىعى, مۇندا اۋىر ءوندىرىس ورىندارىمەن قاتار, اۋىلشارۋاشىلىق سالاسى دا جاقسى دامىعان. جىل باسىنان بەرگى التى ايدا وبلىستىڭ اۋىلشارۋاشىلىق جالپى ءونىم كولەمى 59,7 ملرد تەڭگەگە جەتكەن.
وبلىستىق اۋىل شارۋاشىلىعى باسقارماسىنىڭ باسشىسى وراز دۇزدەنباەۆ مىرزا: ء«دال قازىر 0,43 مىڭ گەكتار اۋماقتىڭ كارتوبىن جيناپ, 1101,3 مىڭ گەكتار شابىندىقتىڭ ءشوبىن شاۋىپ, ودان 596,3 مىڭ توننا پىشەن, 36,6 مىڭ توننا پىشەندەمە دايىنداپ ۇلگەردىك. ويتكەنى, بىزدە 61,1 مىڭ باس جىلقى, 453,8 مىڭ باس ءىرى قارا, 582 مىڭ باس قوي, 81 مىڭ باس ەشكى ت ۇلىگى بار», دەيدى.
ەلورداداعى اۋىل شارۋاشىلىعى جارمەڭكەسىنە رەسپۋبليكاعا تانىمال ءونىم وندىرۋشىلەر – «رۋبيكوم» جشس, «جانا روسا» اق, «كەممي» جشس, «اقجار - ءوندىرىس» جشس, «رەگتايم» شق, «كرەندەل» جشس, «زەرنوگراد» جشس, «گاليتسكوە» جشس, «شارباقتى قۇس» جشس, «پوبەدا» جشس, «اقتوعاي اگرو» جشس, «بايەت ي ك» جشس سياقتى كاسىپورىندار وزدەرى وندىرگەن تاۋارلارىن الىپ كەلىپتى.
مۇندا جالپى سوماسى 150 ملن تەڭگەدەن استام 435 توننا كولەمىندە ونىمدەر جەتكىزىلگەن. ونىڭ ىشىندە 45 توننا ەت جانە ەت ونىمدەرى, 200 توننا كارتوپ, 90 توننا كوكونىس, 100 توننا باسقا دا اۋىلشارۋاشىلىق ونىمدەرى اكەلىنگەن.
ساتىلىمداعى تاۋار قۇنى استانا نارىعىنداعى ورتاشا باعالاردان دا تومەن. مىسالى, سيىر ەتىنىڭ كيلوسى – 1250 تەڭگە, جىلقى ەتى – 1500 تەڭگە, قوي ەتى – 1150 تەڭگە, قۇس ەتى – 600 تەڭگە بولسا, سارى مايدىڭ كيلوسى – 950 تەڭگە, جۇمىرتقانىڭ 10 داناسى – 170 تەڭگە, ماكارون ونىمدەرىنىڭ 1 كيلوسى 140 تەڭگە, وسىمدىك مايىنىڭ 1 ءليترى 380 تەڭگە, ال كارتوپتىڭ كيلوسى – 80 تەڭگەدەن, ءسابىز, قىزىلشا – 100 تەڭگەدەن, ورامجاپىراق 50 تەڭگەدەن ساتىلدى.
* * *
كەرەكۋ ءوڭىرى قاشاننان سال-سەرىلەر مەن اقىن-جىرشىلار ەلى. اتاقتى ءانشى-سازگەر ەستاي بەركىمباي ۇلى, جاياۋ مۇسا, مايرا ۋاليقىزى, اقىن-جىرشى يسا بايزاقوۆ, سۇلتانماحمۇت تورايعىروۆ دەپ كەتە بەرەدى. وسى دۇلدۇلدەردىڭ ءىزىن جالعاپ ولكەنىڭ ونەرى دە وركەندەپ كەلە جاتىر. قازىرگى تاڭدا وبلىس كولەمىندە 547 مادەنيەت مەكەمەسى, سونىڭ ىشىندە: 279 كىتاپحانا, 237 كلۋب, 17 جىلجىمالى مادەني كەشەن, 10 مۇراجاي, 2 تەاتر جانە وبلىستىق فيلارمونيا جۇمىس ىستەپ تۇر.
«ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان «تۋعان جەر» باعدارلاماسى اياسىندا ۇلتتىق سالت-داستۇرلەرىمىزدى, ءتىلىمىزدى جاڭعىرتۋ جۇمىستارى ىسكە اسىرىلۋدا. جىل سايىن تىلدىك مادەني-تۋريستىك كلاستەر رەتىندە ۇيىمداستىرىلىپ كەلە جاتقان ء«تىل كەرۋەنى» بيىل دا ءوز جالعاسىن تابۋدا», دەيدى وبلىستىق مادەنيەت, ارحيۆ جانە قۇجاتتاما باسقارماسىنىڭ باسشىسى گۇلزيرا ءباشىروۆا حانىم.
مادەني شارا بارىسىندا كەرەكۋلىك اعايىندار «ەتنواۋىل» ۇلتتىق-مادەني كەشەنىندە «ەرتىس – قيماقتار وزەنى» اتتى كورمە ۇيىمداستىردى. مۇنداعى جادىگەرلەردىڭ دەنى قيماق قاعاناتى جايلى سىر شەرتەتىن دۇنيەلەر ەكەن. قيماق قاعاناتى – شىعىس جانە ورتالىق قازاقستان جەرىندە ءىح عاسىردىڭ اياعى مەن ءحى عاسىردىڭ باسىندا ءومىر سۇرگەن مەملەكەت. ۇلىستىڭ ورتالىعى ەرتىستىڭ ورتا الابىندا بولعاندىقتان, پاۆلودارلىقتار سول ۇلىستىڭ مۇراگەرى دەيتىن قۇرمەتتى مارتەبەگە يە.
كورمەگە پوتانين اتىنداعى پاۆلودار وبلىستىق تاريحي-ولكەتانۋ مۋزەيى وبلىس اۋماعىندا جۇرگىزىلگەن ارحەولوگيالىق قازبا جۇمىستارى كەزىندە تابىلعان ارتيفاكتىلەردى اكەلىپتى. ولاردىڭ اراسىندا 2001 جىلى پاۆلودار وبلىسى ماي اۋدانى «قىزىل ەڭبەك» اۋىلى ماڭىندا جۇرگىزىلگەن قازبا كەزىندە تابىلعان قيماق جاۋىنگەرىنىڭ تەمىر ساۋىتىنىڭ قالدىقتارى, 1959 جىلى اقتوعاي اۋدانى «25 وكتيابر» اۋىلى ماڭىنا جۇرگىزىلگەن قازبا جۇمىستارىندا تابىلعان قيماق حانزاداسىنىڭ اق كۇمىستەن قاڭىلتىرلاپ جاسالعان مۇراعىن (باس كيىمىن) كوردىك. مۇراقتان باسقا كۇمىس اينانىڭ سىرتقى قورعانىس-قابى جانە كور-كەشەندە بىرگە كومىلگەن جىلقىلاردىڭ كۇمىس ابزەلدەرى دە سورەدەن ورىن الىپتى.
ءتورت-بەس جىلدىڭ الدىندا ەكىباستۇز اۋدانى جەرىنەن تابىلعان قيماق داۋىرىنە ءتان باس سۇيەككە ماسكەۋدە انتروپولوگيالىق زەرتتەۋلەر جۇرگىزىلىپ, ونى قالپىنا كەلتىرگەن ەدى. وسى «قيماق جاۋىنگەرىنىڭ» ءمۇسىن-بەينەسى جانە 1980 جىلداردىڭ باسىندا جەلەزينكا اۋدانىنان تابىلعان قولا قازان, VII-VIII عاسىرعا ءتان سكيف-سارمات ءداۋىرىنىڭ سۇيەكتەن جاسالعان مۇراسى − ۇزەڭگى مەن تاراقتى كوزىمىز شالدى.
سونىمەن قاتار, پاۆلودار قالاسىندا ورنالاسقان بۇقار جىراۋ اتىنداعى ادەبيەت جانە ونەر مۋزەيى دە ولكەگە تانىمال تاريحي تۇلعالارعا قاتىستى ەكسپوناتتاردان كورمە اكەلىپتى. مۇندا ءدىندار-شايىر ءماشھۇر ءجۇسىپ كوپەەۆتىڭ ءوزى قولدانعان بويتۇمارى مەن ماشەكەڭنىڭ اكەسىنەن قالعان كوك قۇراننىڭ مۇقاباسى, ەستايدىڭ «يۋران-اي» ءانىن زەرتتەۋشى بوريس ەرزاكوۆيچ قاعاز بەتىنە تۇسىرگەن نۇسقاسى, مايرا ۋاليقىزىنىڭ ەرتەرەكتە نوتاعا تۇسكەن ءانى, الاش ارداگەرى جۇسىپبەك ايماۋىتوۆتىڭ قالتا ساعاتى مەن قولدانعان سىزعىشى ارىستىڭ بۇگىنگە جەتكەن كوزىندەي ىستىق تارتسا, اقىن يسا بايزاقوۆتىڭ «التاي ەرتەگىلەرى» اتتى تۋىندىسىنىڭ قولجازباسى مەن اقىننىڭ ءوزى پايدالانعان كۇمىس شاينەك, قازاقستاننىڭ حالىق جازۋشىسى ديحان ءابىلوۆتىڭ اسكەري پلانشەتى مەن ماراپاتتىق وردەن-مەدالدارىنىڭ لەنتاسى, اقىن, مەملەكەتتىك سىيلىقتىڭ لاۋرەاتى قاليجان بەكحوجين قولدانعان ءمارمار ىدىستاردى كورىپ, كوزايىم بولدىق.
مەرەكە اياسىندا وتكەن كەلەسى شارا – كوركەم تۋىندىلار مەن قولونەرشىلەر كورمەسى. سولاردىڭ ءبىرى – «حان شاتىر» ساۋدا ورتالىعىنىڭ قاسىنداعى كوشپەندىلەر قالاشىعىندا وتكەن «داۋىرلەرمەن ۇشتاسقان تۋعان جەر» اتتى فوتوسۋرەتتەر كورمەسى. بارلىعى 35 تۋىندى قويىلعان. بۇلار اكەلى-بالالى فوتوسۋرەتشىلەر – الەكساندر جانە دميتري پارحومەنكولاردىڭ جۇمىستارى. سۋرەتتەردە تەك قازاق ۇلتىنا ءتان ناقىشتار بار. اتاپ ايتقاندا, 1980 جىلدارى باياناۋىلدا وتكەن رەسپۋبليكالىق اۋىلشارۋاشىلىق جارمەڭكەسى كەزىندە تۇسىرىلگەن: «بايگە», «قازاقشا كۇرەس», «التىباقان» جانە سوڭعى جىلدار تۋىندىسى «توقىماشى», «كەستەشى», «انالار», «بۇركىتشى», «شاشۋ», ت.ب. تاقىرىپتىق سۋرەتتەر قويىلىپتى.
بۇدان باسقا ەلوردانىڭ سول جاعالاۋىنداعى «Nas Sanat» ونەر گالەرەياسىندا «حالىق رۋحىنىڭ جەرۇيىعى» اتتى وبلىستىق كوركەمسۋرەت مۋزەي قورىنان اكەلىنگەن سۋرەتتەر كورسەتىلىمى ءوتتى. بۇل جۇمىستاردىڭ دەنى 1960-80 جىلدارى سالىنعان كوركەم تۋىندىلار. تاقىرىپتىق مازمۇنى دا ءارتۇرلى. كارتينا اۆتورلارى – الەكساندر بابينا, كاكەن تەمىرعاليەۆ, ميحايل كالماگوروۆ, وسەرباي شۋرانوۆ, ءانۋار يگەمباەۆ, تۇرار تولەەۆ, زۋرا اسىلعازينا, ت.ب. بارلىعى 60 تۋىندى كورمە تورىنە ىلىنسە, وسىلاردىڭ 10-ى ءمۇسىن, 20-ى گرافيكا.
ال, «ەتنواۋىل» قالاشىعىندا ۇيىمداستىرىلعان قولونەرشىلەر كورمەسىن ەكىباستۇزدىق ەسىمى ەلگە ايگىلى شەبەر زىليحا تولەگەنوۆا اپامىز باستاپ كەلگەن ەكەن. جاسى سەكسەننىڭ سەڭگىرىنە يەك ارتقان قارت انانىڭ قولىنان شىققان ويۋلى جابدىقتار مەن سىرمالى كورپە-كىلەمشەلەر كونەنىڭ كوزىندەي ىستىق. اپامىزدىڭ جولىن جالعاستىرىپ كەستەلەۋ ونەرىن ورگە سۇيرەۋشى قىز-كەلىنشەكتەر ءلاززات ءانىش پەن گۇلنار سارتىمبەكوۆا جۇقا كيىز, جۇمساق ماقپال, تۇكتى ءپ ۇلىش, شي بارقىتقا جىبەك جىپپەن كەس-تەلەي ويۋ-ورنەك سالىپ, وزىندىك قولتاڭبالارىمەن ەرەكشەلەنسە, ابستراكتىلى كارتينا سالۋمەن تانىلعان جاس دارىن, 2016 جىلى ءابۋ-دابيدە وتكەن حالىقارالىق فەستيۆالدىڭ قاتىسۋشىسى التىن اتەەۆانىڭ «ونەرمەن ەمدەۋ», «جىبەك جولى», «عاسىرلار سىرى» جانە ت.ب. جۇمىستارى جاڭا ءداۋىر سۇرانىسىنا ءتان كوركەم دۇنيە ەكەنى انىق.
اعاشتان ويۋ ويىپ, ءتۇيىن تۇيەتىن التىن قولدى ازاماتتاردىڭ ايلاپ-اپتالاپ جاساعان ءساندى بۇيىمدارى – سامىرسىن استاۋ, اعاش كەسە مەن ءبۇتىن قاراعايدى ۇڭگي شاۋىپ, ءساندى ورنەكپەن بادىزدەگەن ساز اسپاپتارىنىڭ (دومبىرا, قوبىز, ت.ب.) قابى شىن شەبەردىڭ شىنايى ەڭبەگى ىسپەتتەس.
«اعاشتان اسپاپ ءھام باسقا دا بۇيىمدار جاساۋ ۇرپاقتان-ۇرپاققا جالعاسىپ كەلە جاتقان ءتول ونەرىمىز», دەيدى قارت شەبەر, بايىرعى تەمىرجولشى قۋاندىق بايازيت مىرزا. بۇگىندە بۇل ىسپەن بالاسى ەرنار ەكەۋى اينالىسىپ ءجۇر. جەكە شەبەرحانالارى دا بار. سول سياقتى اعاشتان كادەسىي جاساۋمەن تانىمال قايىر راحىمجانوۆ پەن بولات نۇرىشەۆتىڭ ەڭبەگى − ءدۇمدى باسىن كۇمىستەگەن قولتوقپاق, بىلعارى تورسىق, الاقانداي اعاش ساندىقشالار راسىندا ءساندى.
وتە قىمبات تۇراتىن تابيعي ءھام وڭدەلگەن اسىل بۇيىمدار – ءىنجۋ, گەماتيت, اممانيت, كوك مونشاق, اقىق تاس, رودونيتتەردى بىلعارى بۇيىمعا شەكىتە جاپسىرىپ ساندىك كادەسىي جاساۋشى ۆيكتوريا سۇلتانوۆا مەن ولگا لوۆينانىڭ ەپتىلىگىنە ەرىكسىز باس شايقادىق. كورمەنىڭ اجارىن اشىپ تۇرعان تاعى ءبىر دۇنيە – بايىرعى كوشپەندىلەردىڭ قارۋ-جاراق تۇرلەرىن جاسايتىن ۇستالاردىڭ بۇيىمى. سايد ساعىندىقوۆ ءوز قولىمەن – قوزىجاۋىرىن, كوبەبۇزار, ءۇش قىرلى, دوعال جەبە, ايىر جەبە, ت.ب. تۇرلەرىن جاساپ اكەلسە, ماقسۇتبەك كوپجاساروۆتىڭ قولىنان شىققان جىلقى جابدىقتارى دا جامان ەمەس.
سونىمەن قاتار, ج. ايماۋىتوۆ اتىنداعى وبلىستىق قازاق مۋزىكالىق دراما تەاترى ق. ءجۇنىسوۆتىڭ «عاشىقتار حيكاياسى» اتتى ليريكالىق كومەدياسىن قويسا, چەحوۆ اتىنداعى وبلىستىق ورىس دراما تەاترى ب.سولوگۋبتىڭ پوۆەسى بويىنشا «بەدا وت نەجنوگو سەردتسا» سپەكتاكلىن ساحنالادى.
* * *
مادەني كۇندەر بارىسىندا «قازانات» يپپودرومىندا اۋدارىسپاق, تەڭگە الۋ, كوكپار, توعىزقۇمالاق, جامبى اتۋ, تاس كوتەرۋ سىندى ۇلتتىق سپورت تۇرلەرى بويىنشا قىزىقتى شارالار ءوتىپ, كوپشىلىك بۇركىت جانە اڭشى تازىلاردى تاماشالادى. بۇل جولعى تويدىڭ باستى ەرەكشەلىگى – قازاقشا كۇرەس 23 جاسقا دەيىنگى بالۋاندار اراسىندا ءوتىپ, باس جۇلدەگە يە بولعان ماڭعىستاۋلىق بالۋان نۇرداۋلەت جارىلعاپوۆ باسكە قويىلعان جەڭىل كولىكتى تاقىمدادى. سونىمەن قاتار, ساپاركەلدى ابدىراشەۆ باستاعان مارافونشىلار پاۆلودار – استانا اراسىنداعى 450 شاقىرىمدى جاياۋ جۇگىرىپ ءوتىپ, 20 تامىز كۇنى تۇسكى ساعات 12.00-دە «ەتنواۋىلعا» جەتتى.
بەكەن قايرات ۇلى,
سۋرەتتەردى تۇسىرگەن ەرلان ومار,
«ەگەمەن قازاقستان»
