بۇعان دەيىن بۇۇ قاۋىپسىزدىك كەڭەسى (قك) ءبىراۋىزدان كورەي حالىق دەموكراتيالىق رەسپۋبليكاسىنا جاڭا ەكونوميكالىق سانكتسيالار قولدانۋ تۋرالى قارار قابىلداعانىن جازعان بولاتىنبىز. قك-نىڭ تۇراقتى ەمەس مۇشەسى بولىپ تابىلاتىن قازاقستان وكىلى دە بۇل سانكتسيانى قولداپ داۋىس بەرگەن. بىراق جاڭا سانكتسيالار دا كحدر باسشىلىعىنىڭ ارىنىن باسا المادى. ول قۇرلىقارالىق بالليستيكالىق زىمىرانداردى سىناقتان وتكىزۋدى جالعاستىرا بەرەتىنىن مالىمدەگەن بولاتىن.
بۇل زىمىرانداردىڭ اقش اۋماعىنا دەيىن جەتەتىنى دە ايتىلعان. ەگەر وسى زىمىراندارعا يادرولىق وقتۇمسىقتار قوندىرىلسا, ول عالامدىق سوعىستىڭ وتىن تۇتاتۋى مۇمكىن. بۇل بارلىق ادامزاتتى, سونىڭ ىشىندە قازاقستاندىقتاردى دا الاڭداتاتىنى ءسوزسىز.
كيكىلجىڭگە وتقا ماي قۇيعانداي اسەر ەتكەن اقش پەن وڭتۇستىك كورەيانىڭ كەشەدەن بەرى باستالعان بىرلەسكەن اسكەري ويىندارى. بۇل ويىندار ون ءبىر كۇنگە سوزىلىپ, وعان اقش-تىڭ 17 مىڭنان, وڭتۇستىك كورەيانىڭ 50 مىڭنان ارتىق سولداتتارى مەن وفيتسەرلەرى قاتىستىرىلادى. سونىمەن بىرگە, بۇل ويىنعا اۋستراليا, كانادا, كولۋمبيا, دانيا, جاڭا زەلانديا, نيدەرلاند جانە ۇلىبريتانيا ەلدەرىنىڭ اسكەرلەرى دە تارتىلعان. ءسويتىپ, بۇگىنگى تاڭدا بار الەمنىڭ نازارى وسى پروبلەماعا اۋىپ تۇر. الەمدىك اقپارات قۇرالدارى اسكەري ويىنداردىڭ باستالىپ كەتكەنىن جارىسا جازىپ جاتىر. كحدر تارابى ساباسىنا تۇسكەندەي بولىپ, ازىرشە بۇل ارادا سالقىنقاندىلىق كورسەتۋدە. كيم چەن ىن يادرولىق سىناقتار توقتاتىلا تۇراتىنىن ايتتى. ترامپ ونى دۇرىس شەشىم دەپ جاريالادى.
بىراق ول شەشىمنىڭ قانشالىقتى ۇزاققا بارارى بەلگىسىز. يادرولىق قارۋعا قول جەتكىزگەن بۇل ەلدىڭ الداعى ۋاقىتتا قانداي بايلامعا بارارى بولجالسىز ەكەنىن بارلىق الەم بىلەدى.
جاقسىباي سامرات,
«ەگەمەن قازاقستان»
