پارتيا باستاماسىمەن جارىق كورگەن تۋىندى ەلباسىنىڭ قايراتكەر رەتىندە قالىپتاسقان تەمىرتاۋ, قاراعاندى كەزەڭىن قامتيدى. كىتاپ اۆتورى – بەلگىلى پۋبليتسيست, قازاقستان رەسپۋبليكاسى پرەزيدەنتى سىيلىعىنىڭ لاۋرەاتى, بۇعان دەيىن «ەلباسىنىڭ التىن بەسىگى» اتتى ەڭبەگىمەن تانىمال ايتباي ساۋلەبەك.
اۆتور جاڭا تۋىندىسىندا سيرەك كەزدەسەتىن مۇراعات قورلارىنان الىنىپ, اقيقات-شىندىققا نەگىزدەلگەن تىڭ دەرەكتەردى, كۋاگەر-تۇلعالاردىڭ جۇرەكجاردى سوزدەرىن, بۇرىن جارىققا شىقپاعان ءتۇرلى قۇجاتتاردى ۇسىنادى. كىتاپ دەرەكتەمەلىك نەگىزدە جازىلعان. ول «وت-وزەن», ء«بىلىم بەلەسىندە», ء«وسۋ جولىندا», «ورلەۋ», «شىڭدالۋ», «پارتكوم حاتشىسى» جانە «سامعاۋ» دەگەن جەتى بولىمنەن تۇرادى. اتالمىش اسەم بەزەندىرىلگەن ەڭبەكتە ەلباسىنىڭ سيرەك كەزدەسەتىن سۋرەتتەرى دە بەرىلگەن.
كىتاپتىڭ العىسوزىن «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد جازعان. ەلباسىنىڭ قازاقستان تاريحىنداعى ەرەكشە ءرولىن ايشىقتاپ, تاۋەلسىز ەلىمىز قول جەتكىزگەن تابىستارىنا تەرەڭ تالداۋ جاساعان م.قۇل-مۇحاممەد العىسوزىن: «ەلباسى ءومىرىنىڭ ءار كەزەڭىن ۇلگى-ونەگە تۇتاتىن قازاقستاندىقتار بۇل كىتاپتى قىزىعا-قۇمارتا وقيتىنى انىق», – دەپ اياقتايدى.
«قۇرىش تۇلعانى» جازۋ ءۇشىن اۆتور ماسكەۋ, ومبى, الماتى, قاراعاندى, تەمىرتاۋ جانە استانا قالالارىنداعى ەلباسىمەن بىرگە ەڭبەك ەتكەن, وقىعان ارىپتەس-دوستارىمەن كەزدەسكەن. ولاردىڭ بىرقاتارى – قابيدوللا سارەكەنوۆ, تولەۋتاي سۇلەيمەنوۆ, قۋانىش وماشەۆ, ەرمەك تولەۋباەۆ, توقتارحان ىسقاقوۆ – ءىس-شاراعا قاتىسىپ جاڭا تۋىندىنىڭ باستى ەرەكشەلىكتەرى مەن تاريحي قۇندىلىعى تۋرالى ايتتى. سونداي-اق, ولار كىتاپتىڭ قالىڭ وقىرمان قاۋىمنىڭ كوڭىلىنەن شىعاتىنىنا سەنىم ءبىلدىردى دەيدى «نۇر وتان» پارتياسىنىڭ ءباسپاسوز ورتالىعى.
