كەزدەسۋ بارىسىندا د.مىڭباي قازاقستان حالقى اسسامبلەياسىنىڭ قۇرىلۋ تاريحىمەن, كونستيتۋتسيالىق مارتەبەسىمەن, قوعامدىق كەلىسىم مەن جالپىۇلتتىق بىرلىكتى نىعايتۋداعى ماقساتىمەن تانىستىردى. سونىمەن قاتار, گەرمانيا مەن قازاقستان اراسىندا قالىپتاسقان سەنىمدى ءارى اشىق قارىم-قاتىناستى, قازاقستان رەسپۋبليكاسى پرەزيدەنتى ن.نازارباەۆ پەن فەدەرالدى كانتسلەر ا.مەركەلمەن ۇزدىكسىز تىكەلەي بايلانىستا ەكەندىگىن اتاپ ءوتتى.
«گەرمانيا – قازاقستاننىڭ ماڭىزدى ءارى نەگىزگى ارىپتەستەرىنىڭ ءبىرى بولىپ تابىلادى. ءبىزدىڭ مەملەكەتتەرىمىزدىڭ اراسىنداعى ديالوگ سەنىمدىلىكپەن جانە اشىقتىقپەن ەرەكشەلەنەدى. 25 جىل ىشىندە ەكى ەل اراسىنداعى ديپلوماتيالىق قارىم-قاتىناستى ورناتۋ بارىسىندا, ءبىز سەنىمدى جانە بەلسەندى ديالوگ الاڭىن قۇرا الدىق. كونراد ادەناۋەر اتىنداعى قورمەن قارىم-قاتىناسىمىز وسى سەرپىندى ءوز دەڭگەيىندە ۇستاۋعا سەبەپ بولا الادى», – دەدى د.مىڭباي.
قوردىڭ وكىلدەرى قازاقستان تاجىريبەسىنىڭ ءتيىمدى ەكەندىگىن جانە اسسامبلەيانىڭ ۇلتارالىق تۇراقتىلىقتى جانە قوعامدىق كەلىسىمدى كۇشەيتۋدە, رەسپۋبليكادا تۇراتىن بارلىق ەتنوستاردىڭ قۇقىقتارىن قورعاۋدا ماڭىزدى ءرول اتقاراتىنىن ەسكەرىپ ءوتتى. سونداي-اق, توماس حەلم قازاقستاننىڭ ەتنوسارالىق قاتىناستى گارمونيادا, ۇلتارالىق ديالوگ پەن بىرلىكتى نىعايتۋدا ءسوزسىز كوشباسشى ەكەندىگىن دە نازاردان تىس قالدىرمادى.
نۇرلىبەك دوسىباي,
«ەگەمەن قازاقستان»
