ورتالىق كوممۋنيكاتسيالار قىزمەتى الاڭىندا بريفينگ وتكىزگەن «Bilim Media Group» جشس كومپانياسىنىڭ نەگىزىن قالاۋشى جانە باسشىسى راۋان كەنجەحان ۇلى مەملەكەت باسشىسىنىڭ تاپسىرماسىنا وراي ازىرشە 20-عا جۋىق وقۋلىق اۋدارىلىپ جاتقانىن اتاپ ءوتتى. «اۋدارما – كۇردەلى ءارى جاۋاپتى جۇمىس. جوعارى وقۋ ورىندارىنىڭ ستۋدەنتتەرىنە ارنالعان وقۋلىقتار قازاق تىلىنە ساپالى ءارى تۇسىنىكتى اۋدارىلۋى كەرەك. سوندىقتان وسى ىسكە قىزىعۋشىلىق تانىتقان اۋدارماشىلاردى, ۇستازداردى, ادەبي رەداكتورلار مەن عىلىمي ساراپشىلاردى ارنايى جوباعا بەلسەنە قاتىسۋعا شاقىرامىز. 23 تامىز كۇنى الماتىدا قازىرگى اۋدارما ءىسىنىڭ تەورياسى مەن پراكتيكاسىنا ارنالعان القالى جيىن وتكىزەمىز. جوباعا جاناشىرلىق بىلدىرگەن قاۋىمدى كونفەرەنتسياعا قاتىسۋعا شاقىرامىز. ولاردىڭ ۇسىنىس-پىكىرلەرى ءبىز ءۇشىن ماڭىزدى», دەيدى ر.كەنجەحان ۇلى.
ونىڭ ايتۋىنشا, بۇگىندە العاشقى وقۋلىقتاردى جازۋعا 90-عا جۋىق مامان تارتىلىپتى. ولاردىڭ دەنى ءوز سالاسىن جەتىك مەڭگەرگەن ۋنيۆەرسيتەت وقىتۋشىلارى ەكەن.
جالپى كىتاپتار, پرەزيدەنت اتاپ وتكەندەي, تاريح, ساياساتتانۋ, الەۋمەتتانۋ, فيلوسوفيا, پسيحولوگيا, مادەنيەتتانۋ جانە فيلولوگيا عىلىمدارى باعىتىندا جارىق كورمەك. بۇل وقۋلىقتاردىڭ باسىم كوپشىلىگى بۇرىن-سوڭدى قازاق تىلىنە, ءتىپتى ورىسشاعا اۋدارىلماعان جاڭا باسىلىمدار. اتاپ ايتقاندا, گرەگوري مەنكيۋدىڭ «ەكونوميكس», دجوردج ريتتسەردىڭ «قازىرگى الەۋمەتتانۋ تەورياسى», ەلليوت ارونسوننىڭ «الەۋمەتتىك پسيحولوگياعا كىرىسپە», رەمي حەستىڭ فيلوسوفياعا ارنالعان كىتاپتارى, تاعى باسقالار بار.
قازاق تىلىندە سويلەيتىن كىتاپتارعا قويىلاتىن تالاپ تا قاتال. ءاربىر كىتاپقا جەكە جۇمىس كوميسسياسى قۇرىلعان. وقۋلىقتار ومىرشەڭدىگىن دالەلدەگەن, قازىرگى كۇنى الەمنىڭ بەدەلدى وقۋ ورىندارىنىڭ پەداگوگيكالىق تاجىريبەسىندە كەڭىنەن پايدالانىلىپ كەلە جاتقان, ابدەن سۇزگىدەن ءوتىپ, بىرنەشە مارتە باسپادان شىعارىلعان بولۋى ءتيىس. سونداي-اق, بەلگىلى ءبىر ءپاننىڭ مازمۇنى مەن ءمانىن اشاتىن, سول عىلىمنىڭ يدەيا-
لارى مەن تۇجىرىمدامالارىن ءدال سيپاتتايتىن وزەكتى وقۋلىق بولعانى ءلازىم.
بۇيىرتسا, رۋحاني جاڭعىرۋ اياسىنداعى «قازاق تىلىندەگى 100 جاڭا وقۋلىق. جاڭا گۋمانيتارلىق ءبىلىم» جوباسىنداعى وقۋلىقتاردىڭ العاشقى لەگى 2018-2019 وقۋ جىلىندا ستۋدەنتتەردىڭ قولىنا ءتيىپ, ۋنيۆەرسيتەتتەر وسى كىتاپتارمەن ماماندار دايارلاي باستايدى.
ال قازاق تىلىندەگى وقۋلىقتار جوباسىمەن تانىسقىسى كەلەتىندەر kitap.kz سايتىنا كىرىپ, ۇسىنىس-پىكىرىن قالدىرۋعا بولادى.
قىمبات توقتامۇرات
