اكىم باستاعان دەلەگاتسيا پاۆيلوننىڭ ءار قاباتىندا ۇسىنىلعان جەل, كۇن, بيوماسسا, سۋ جانە عارىش ەنەرگياسىنىڭ ۇلگىلەرىمەن جان-جاقتى تانىسىپ, وڭىردە جۇزەگە اسىرۋعا بولاتىن ءتيىمدى جوبالار جايىن ءوزارا تالقىلادى.
مۇنان بولەك, ولار شەتەلدىكتەردىڭ ۇسىنعان زاماناۋي تەحنولوگياسىنىڭ جاڭا جەتىستىكتەرىن تاماشالاپ, قۋات كۇشىن الاتىن تىڭ جوبا - جەكە ايماعىن ارالاپ كوردى.
ەكسپو كورمەسى قازاقستاننىڭ الەۋەتىن كورسەتۋگە زور مۇمكىندىك بەرەتىنىن ايتقان اكىم حالىقارالىق شارانىڭ ماڭىزىنا توقتالدى.
«وتە جوعارى دەڭگەيدە ۇيىمداستىرىلعان ەكسپو كورمەسىنە وتاندىق جانە شەتەلدىك قوناقتاردىڭ كوپتەپ كەلۋى ءبىزدى قۋانتادى. وزدەرىڭىز كورىپ وتىرعانداي اۋقىمى كەڭ كورمەنى ارالاۋعا ءبىر كۇن جەتپەيدى. الەمنىڭ الدىڭعى قاتارلى مەملەكەتتەرى عىلىمداعى سوڭعى جاڭالىقتارىن ۇسىنىپ وتىرعان بۇل حالىقارالىق شارانى تاماشالاۋدى ءاربىر قازاقستاندىققا كەڭەس بەرەر ەدىم. بۇل ۇلتتىق رۋحىمىزدى كوتەرىپ, كەلەشەك ۇرپاقتىڭ عىلىم مەن بىلىمگە قۇشتار بولىپ وسۋىنە ۇلكەن سەرپىن بەرەرى ءسوزسىز», - دەدى وبلىس اكىمى.
سونىمەن قاتار, جۇمىسشى توپ «ەكسپو - 2017» حالىقارالىق مامانداندىرىلعان كورمەسى اياسىندا وڭتۇستىك قازاقستان وبلىسىنىڭ استانا قالاسىنداعى كۇندەرى بويىنشا وتكىزىلەتىن ءىس-شارالاردىڭ بارىسىن پىسىقتادى.
ەلىمىزدىڭ باس قالاسىندا 29 تامىز بەن 3 قىركۇيەك كۇندەرى ەلوردالىقتار مەن قوناقتار نازارىنا 42 ءتۇرلى مادەني جانە الەۋمەتتىك ءىس-شارالار ۇسىنىلماق. سونداي-اق, قازاقستانداعى 30 ەلدىڭ ەلشىلەرى قاتىساتىن ءوڭىردىڭ ينۆەستيتسيالىق مۇمكىندىكتەرى تانىستىرىلاتىن بيزنەس-فورۋم, اۋىل شارۋاشىلىق ونىمدەرىنىڭ جارمەڭكەسى مەن «وڭتۇستىك ونىمدەرى» وبلىس تاۋاروندىرۋشىلەرىنىڭ كورمەسى وتەدى دەپ جوسپارلانۋدا.
