باسقارما توراعاسى ەكسپورتتىق الەۋەتكە يە قازاقستاندىق اۋىل شارۋاشىلىعى كاسىپورىندارى تومەندەتىلگەن پايىزدىق مولشەرلەمەلەر بويىنشا ءتيىمدى نەسيە قاراجاتتارىن الا الاتىنىن مالىمدەدى.
ماي شىعاراتىن زاۋىتتاردى, ەت كومبيناتتارىن, ەت باعىتىنداعى قۇس فابريكالارىن, قۇراما جەم زاۋىتتارىن, جەمىس-كوكونىس قويمالارىن, جىلىجاي كەشەندەرىن, تاۋارلىق بالىق ءوندىرىسىن جانە ت. ب. قۇرۋ, كەڭەيتۋ جانە جاڭعىرتۋعا قاتىستى ينۆەستيتسيالىق جوبالار ەندىگى قارجىلاندىرۋ باسىمدىعىنا يە. «اگرارلىق نەسيە كورپوراتسياسى» 2016 جىلدىڭ سوڭىنان باستاپ ينۆەستيتسيالىق جوبالاردى قارجىلاندىرۋعا باعىتتالعان «اگروەكسپورت» باعدارلاماسىن ىسكە اسىرىپ جاتىر. بيىلعى جىلعا باعدارلاما بيۋدجەتى شامامەن 80 ملرد تەڭگەنى قۇرايدى.
«اگروەكسپورت» باعدارلاماسى وتاندىق اۋىل شارۋاشىلىعى وندىرۋشىلەرىنە نەسيە الۋدىڭ بارىنشا تومەندەتىلگەن مولشەرلەمەسىن ۇسىنادى. ول سوڭعى قارىزگەرگە جىلىنا 8%-دى قۇرايدى. نەسيەلەندىرۋدىڭ ۇزاق مەرزىمدى ءتۇرى – 10 جىلعا دەيىن قاراستىرىلعان, ال جەڭىلدىكتى كەزەڭ 2 جىلعا سوزىلادى, ول اياقتالعاننان كەيىن نەسيەنى تولەۋ كەزەڭى باستالادى. باعدارلامانىڭ مىندەتتى تالاپتارى – تۇراقتى قارجىلىق احۋال, بيزنەس جوسپاردىڭ بولۋى, جوباعا كەم دەگەندە 15% جەكە قاراجاتپەن قاتىسۋ, سونداي-اق, كەپىلزاتتاردىڭ بولۋى.
نەسيەنى نەگىزگى قۇرالداردى ساتىپ الۋعا, سونىڭ ىشىندە نىسانداردى جاڭعىرتۋعا, قۇرىلىس-مونتاج جۇمىستارىنا جانە رەكونسترۋكتسيالاۋعا, ينۆەستجوبانى ىسكە اسىرۋ اياسىندا اينالىم قاراجاتتارىن تولىقتىرۋعا الۋعا بولادى.
«اگروەكسپورت» باعدارلاماسى بويىنشا قاراجاتتار انك-دان تىكەلەي جانە ەكىنشى دەڭگەيلى قازاقستاندىق بانكتەر ارقىلى بولىنەتىن بولادى. كورپوراتسيا بىرقاتار بانكتەرمەن سايكەس كەلىسىمدەرگە قول قويدى, ولاردىڭ ىشىندە ۇلتتىق بانك, ForteBank, تسەسنابانك, بانك ۆتب قازاقستان, سبەربانك جانە ت. ب. بار. ينۆەستجوبالاردى قۇرۋ ءۇشىن قارجى الۋعا نيەت بىلدىرگەن كليەنتتەر قازاقستان بويىنشا بانكتەردىڭ بولىمشەلەرىنە قۇجاتتارىن وتكىزە الادى.
