وسى اششى ساباقتىڭ ءبىر مىسالىن ۇلت ۇستازى, ۇلى عالىم احمەت بايتۇرسىنوۆتىڭ دا تاعدىرىنان كورەمىز. اتىشۋلى 37-ءنىڭ قۇرىعىنان قۇتىلا الماعان اياۋلى تۇلعانىڭ سۇيەگىنىڭ قاي جەردە قالعانى بەلگىسىز. سونداي-اق, جان جارى ءۇشىن بارلىق ازاپ پەن قورلىققا كوندىككەن بادريسافانىڭ دا قابىرىن ءالى كۇنگە ەشكىم تاپ باسىپ كورسەتە المايدى. ەل ىشىندە «اق كەلىن» اتانعان بادريسافانىڭ احمەت بايتۇرسىنوۆقا ادال جار, اينىماس دوس بولعانىن قۋاتتايتىن كوز كورگەندەردەن قالعان كوپ دەرەكتەر بولسا دا, ونىڭ تەگىنە, العان ءبىلىمى مەن قارىم-قابىلەتىنە قاتىستى مالىمەتتەر ءبىر-بىرىنە قاراما-قايشى كەلەدى. ءتىپتى بادريسافانىڭ ءبىر دە ءبىر سۋرەتى ساقتالماۋى دا ونىڭ جۇمباققا تولى ازاپتى تاعدىرىنان حابار بەرىپ تۇرعانداي.
ارينە, الاش ارىستارى, ولاردىڭ جارلارى مەن بالالارى زەرتتەۋ نىسان- دارىنا اينالىپ, وسى كۇنگە دەيىن كوپ جازىلىپ, ايتىلىپ تا ءجۇر. ال ولاردىڭ بەينەسىمەن ونەر الەمىندە ۇشىراسۋ باسقاشا سەزىم سىيلايدى. ءبىز قوستاناي وبلىستىق ورىس دراما تەاترى ۇسىنعان «اق كەلىننىڭ ماحابباتى مەن ءولىمى» اتتى سپەكتاكلدى تاماشالاعاندا باسىنداعى اق جاۋلىعىمەن, ەرىن «تورەم» دەپ ءپىر تۇتۋىمەن, قوناقجايلىلىعىمەن, جومارتتىعىمەن ەلدىڭ ىقىلاسىنا بولەنگەن «اق كەلىنگە» دەگەن قيماستىق سەزىمدەرىمىز ودان سايىن تەرەڭدەي تۇسكەندەي بولدى. احمەت بايتۇرسىنوۆتىڭ بەينەسى ءبىز ءۇشىن قانداي ىستىق بولسا, ونىڭ جارى بادريسافانىڭ دا بەينەسى اياۋلىلىعىمەن جانىمىزعا جىلى ۇشىرادى. باستى رولدە ويناعان يۋليا كۋدرياشەۆا احمەت بايتۇرسىنوۆتىڭ جارىنىڭ جاستىق البىرتتىعىن, جىرعا قۇمار, بىلىمگە قۇشتار بولمىسىن, باقىتتى كەزەڭدەردەگى گۇل-گۇل بەينەسىن, سونداي-اق, ەرىمەن بىرگە ازاپ شەككەن تۇستارىنداعى قامىرىقتى, شامىرقانعان, ەڭ سوڭىندا قوستانايداعى اۋرۋحانادا ازاپ شەگىپ ولەر تۇسىنداعى قاسىرەتتى وبرازىن دا بارىنشا شىنايى شىعاردى.
وسى جەردە اتاپ وتەر ءبىر جايت, «ەگەمەن قازاقستاننىڭ» قوستاناي وبلىسىنداعى مەنشىكتى ءتىلشىسى, ارىپتەسىمىز ءنازيرا جارىمبەتوۆا «اق كەلىننىڭ» عۇمىرىن زەرتتەۋدى ماقسات ەتكەن. «بادريسافا» ەكسپەديتسياسىنىڭ قۇرامىندا احاڭ مەن بادريسافانىڭ تابانى تيگەن ورىنبور, توم قالالارىندا بولىپ, «بادريسافا بەينەسى», «اق شالىگە ورانىپ, اشىلماعان سىر», «كومەسكى ءىزدىڭ ساۋلەسى» اتتى ءارى كولەمدى, ءارى تىڭ دەرەكتى ماقالالار جازعان ەدى. «اق كەلىننىڭ ماحابباتى مەن ءولىمى» سپەكتاكلىنە وسى ماتەريالداردىڭ دا كومەگى تيگەنى انىق. ويتكەنى, جۋرناليست ءنازيرا جارىمبەتوۆا مەن ولكەتانۋشى, بايتۇرسىنوۆتار اۋلەتىنىڭ تاريحىن جازعان اۆتور يبراگيم اتىعايدىڭ سپەكتاكلدىڭ قويىلىمىنا ۇلەس قوسقانىنان حابارىمىز بار.
ەلورداداعى م.گوركي اتىنداعى مەملەكەتتىك اكادەميالىق ورىس دراما تەاترىنىڭ ساحناسىندا قويىلعان بۇل سپەكتاكلدە نەگىزگى كەيىپكەردى يۋليا كۋدرياشوۆا سومداعانىن جوعارىدا ايتتىق. ال احمەت بايتۇرسىنوۆتىڭ رولىندە قۇدايبەرگەن ايدوسوۆ وينادى. شىعارما اۆتورلارى قوس عاشىقتىڭ, تاريحتاعى ەرلى-زايىپتى ادامداردىڭ ومىرلەرىنىڭ جارقىن ساتتەرىن دە, قارا بۇلت باسقان قايعىلى كەزەڭدەرىن دە بارىنشا مولىنان قامتۋعا كۇش سالعانى كورىنەدى. ساحنانىڭ تەز اۋىسىپ وتىرۋى, ءسوزدىڭ دە, قيمىل-ارەكەتتىڭ دە باستى رولدەگى كەيىپكەرلەردىڭ بەينەلەرىن اشىپ كورسەتۋگە ۇتىمدى پايدالانىلۋى, ءاربىر وقيعانىڭ تۇسىندا ءارتۇرلى مۋزىكانىڭ سايكەس قويىلۋى, ساحناداعى ۇلكەن ەكراننىڭ قىزمەتى, ءبارى-ءبارى دە تاماشا تارتىمدىلىقپەن سايكەستەندىرىلگەن. بۇل جەردە شىعارما اۆتورلارى قابىلحات سەيداحمەت پەن ليۋدميلا فەفەلوۆاعا قوسا, قويۋشى-رەجيسسەر, قازاقستاننىڭ ەڭبەك سىڭىرگەن قايراتكەرى الەكساندر ليوپانىڭ, قويۋشى-سۋرەتشى قۇرمانعازى قارجانوۆ پەن مۋزىكامەن كوركەمدەگەن قاليبەك دەريپسالديننىڭ ەڭبەكتەرىن دە اتاپ ءوتۋ قاجەت.
جالپى, «اق كەلىننىڭ ماحابباتى مەن ءولىمى» بىزگە تاريحتىڭ اششى ساباعىنا قوسا ادال ماحابباتتىڭ, اينىماس دوستىقتىڭ دا ءبىر مىسالىن الدىمىزعا تارتتى. الاشتىڭ ارداقتى ۇلىنا جار بولعان ورىس قىزى الەكساندرانىڭ (كەيىننەن بادريسافا اتالعان) ۇلكەن جۇرەگىن, پاراساتتى تۇلعاسىن تانىدىق. ونەر تىلىنە كوشىرىلگەن تراگەديالى تاعدىرىنا جان اۋىرتتىق.
ايگۇل سەيىل,
«ەگەمەن قازاقستان»
