ستاتيستيكالىق مالىمەت بويىنشا, بۇگىندە جامبىل وبلىسىندا 153 اۋىلدىق وكرۋگ, 3 اۋداندىق ماڭىزى بار قالا, 377 ەلدى مەكەن جانە
5 394 كوشە بار. ال ەل تاۋەلسىزدىگىن العان كەزەڭنەن بەرى 1 924 كوشە, 172 نىسان جانە 146 ەلدى مەكەن اتاۋى قايتا اتالعان ەكەن. دەگەنمەن, ءالى دە بولسا وڭىردە كومسومولسكايا, وكتيابرسكايا, سوۆەتسكايا, لەنين كوشەلەرىنىڭ اتاۋلارى سول قالپىندا قالىپ وتىر. مۇنىڭ سەبەبىن سان-ساققا جۇگىرتىپ زەردەلەپ كورگەنمەن, جاۋابىن تابۋ قيىن. بۇگىندە تاراز قالاسىنىڭ ورتالىق كوشەلەرىنىڭ ءبىرى لەنين ەسىمىمەن اتالادى. جەرگىلىكتى تۇرعىندار اراسىندا كوشە اتاۋىنا بايلانىستى ءتۇرلى پىكىرلەر ورىن العانىمەن, بۇل دا شەشىمىن تاپپاي كەلەدى.
ەندى كوشە اتاۋى ءبىر بولەك تە, مەكەمە ماڭدايشالارىنىڭ كورنەكىلىگى ءھام ساۋاتتىلىعى باسقا اڭگىمە. ءاربىر مەكەمەنىڭ قوعامعا ىقپال ەتە الاتىن, بۇقارانىڭ ماسەلەسىن شەشۋدە بەلسەندىلىك تانىتا الاتىن كۇشى بار. بىراق سول مەكەمەلەردىڭ ءوزىنىڭ ناقتى اتاۋىن ءبىلۋ بۇگىندە قيىن بولىپ تۇرعان سىڭايلى. وبلىستىق تىلدەردى دامىتۋ باسقارماسى وتكەن جىلى وبلىس بويىنشا 1 762 مەملەكەتتىك مەكەمەگە زەردەلەۋ جۇمىستارىن جۇرگىزىپ, 451 مەكەمە ماڭدايشالارىندا ەشقانداي تالاپتىڭ ساقتالماعاندىعىن انىقتاعان ەدى. ماسەلەن, تاراز قالالىق كەيبىر پوليتسيا بولىمشەلەرىنىڭ ماڭدايشالارىنان «ىشكى ىستەر مينيستىرلىگى», «ىشكى ءىستار دەپارتامەنتى» دەگەن قاتەلىكتەردى كورسەك, «قوسقۇدىق مولتەك اۋدىنىنىڭ №20 پوليتسيا تىرەك پۋنكتى», شۋ قالاسىنداعى جەرگىلىكتى پوليتسيا قىزمەتىنىڭ №21 ۋچاسكەلىك پوليتسيا پۋنكتىنە «ۋچاسكوۆىي پۋنكت» دەپ جازىلعان. ال جامبىل اۋدانى, ايشا ءبيبى اۋىلدىق وكرۋگىندەگى №9 پوليتسيا پۋنكتىنەن «جەرگىلىكتى پوليتسيا قىزىمەتى», «ايشا بيبي» دەگەن قاتە جازۋلاردى وقۋعا بولادى. سونداي-اق, وبلىستىق ىشكى ىستەر دەپارتامەنتىنە باعىنىستى مەكەمەلەردىڭ ماڭدايشالارىندا زاڭناما تالاپتارىنىڭ ساقتالماعانى دا انىقتالعان. مۇنداي مىسالداردى تالاس جانە مويىنقۇم اۋداندارىنان كەلتىرۋگە بولادى. وبلىستىق ىشكى ىستەر دەپارتامەنتىنە قاراستى اۋداندار مەن تاراز قالاسىندا ورنالاسقان 12 ءبولىم مەن 195 جەرگىلىكتى پوليتسيا پۋنكتى زەردەلەنىپ, باسقارما تاراپىنان ءتيىستى قورىتىندى شىعارىلعان. ناتيجەسىندە, 162 ۋچاسكەلىك پوليتسيا پۋنكتىنىڭ ماڭدايشالارى ۇكىمەت قاۋلىسىنىڭ تالاپتارىنا مۇلدەم سايكەس كەلمەيتىن بولسا, 33 جەرگىلىكتى ۋچاسكەلىك پوليتسيا پۋنكتىندە مەكەمە ماڭدايشالارى جوق بولىپ شىققان. قوعامدىق ءتارتىپتى قامتاماسىز ەتەتىن پوليتسيا پۋنكتتەرىنىڭ جايى بۇگىندە وسىنداي. ءتارتىپ ماسەلەسىندە تالاپشىلدىق تانىتاتىن ىشكى ىستەر سالاسى بۇل جونىنەن جاقسى كورسەتكىش كورسەتپەي تۇر.
مۇنداي جايلاردى وڭىردەگى تەمىر جول بولىمشەلەرىنەن دە كەزدەستىرۋگە بولادى. وبلىس ورتالىعىنداعى «قازاقستان تەمىر جولى» ۇلتتىق كومپانياسى» اقتسيونەرلىك قوعامى «جامبىل ماگيسترالدىق جەلى بولىمشەسىندەگى» اقپاراتتىق تاقتايشادا «نۇر وتان» ءسوزى «نۇر-وتان» دەپ جازىلعان. سونداي-اق, وتار ستانساسىندا پويىزداردىڭ ءجۇرۋ ۋاقىتى كورسەتىلگەن ستەندىدە «پويىز» ءماتىنى ورىن العان. كوپتەگەن بولىمشەلەردە «ونتۇستىك», «جۇك» پۋنكتى دەگەن قاتە سوزدەر كەزدەسەدى. جالپى تەمىر جول توعىز جولدىڭ تورابى, حالىق كوپ ايالدايتىن, قاتىنايتىن جەر بولعاندىقتان, مۇنداي كەلەڭسىزدىكتەر بىردەن كوزگە تۇسەدى. ال قاتە جازۋلار ادامنىڭ ساۋاتىنىڭ قانشالىقتى دارەجەدە ەكەنىن كورسەتەدى. تىم قۇرىسا مەكەمە ماڭدايشالارىن قاتە جازبايتىن, سونداي-اق, سول قاتەنى كورمەيتىن ءبىر ادامنىڭ بولماۋى وكىنىشتى.
قاپتاعان قاتەلەردەن قاشان قۇتىلامىز؟ وڭىردە جالعىز عانا ىشكى ىستەر دەپارتامەنتىنە جانە تەمىر جول بولىمشەسىنە قاراستى مەكەمەلەر عانا ەمەس, كوپتەگەن مەكەمەلەردە گرامماتيكالىق قاتەلىكتەر ورىن العان. بۇل جاعداي تۇرعىنداردىڭ نارازىلىعىن تۋدىرىپ قانا قويماي, بولاشاقتا جازۋ مانەرىن دە سولاي قالىپتاستىرۋعا ىقپال ەتۋى مۇمكىن. اعىمداعى جىلى جۇرگىزىلگەن زەردەلەۋ ناتيجەسىندە سارىسۋ اۋدانىندا 20, شۋ اۋدانىندا 16, ت.رىسقۇلوۆ اۋدانىندا 36, بايزاق جانە مويىنقۇم اۋداندارىندا 15 مەكەمەدە ءالى كۇنگە دەيىن قاتەلىكتەر تۇزەتىلمەگەن. بۇل دا اۋدان باسشىلارىنان باستاپ, ءتيىستى مەكەمە جەتەكشىلەرىنە دەيىن سىن ەكەنى انىق. بۇل ماسەلەنى جامبىل وبلىسىنىڭ اكىمى كارىم كوكىرەكباەۆ سان مارتە كوتەرىپ, كەزىندە جاۋاپتى باسشىلارعا تاپسىرما دا بەرىپ ەدى. بىراق ءالى دە ناتيجە شىعار ەمەس. «باياعى جارتاس – سول جارتاس» كۇيىندە قالىپ, ءتىپتى حالىقتىڭ كوزى ۇيرەنىپ كەتەتىن دارەجەگە جەتتى.
بۇگىندە قازاقستاندىقتاردىڭ ساۋاتتىلىعى ءتيىستى دەڭگەيىنە جەتتى. حالىقتىڭ باسىم كوپشىلىگى جوعارى ءبىلىمدى ماماندار بولىپ ەسەپتەلەدى. بىراق قاپتاعان قاتەلەرگە كوز سالمايتىن, ونى تۇزەتكىسى كەلمەيتىن باسشىلاردىڭ ارەكەتى ويلاندىرادى. وسى ورايدا, قوعامداعى تالاپ پەن ءتارتىپتى وزگەدەن ەمەس, اۋەلى وزىمىزدەن تالاپ ەتكەنىمىز ورىندى.
حاميت ەسامان,
«ەگەمەن قازاقستان»
جامبىل وبلىسى
