– جولدان بۇرىن اۋىلىمىزعا مادەنيەت ءۇيى كەرەك بولىپ تۇر. جولدىڭ ناشارلىعىنا شىداپ كەلدىك, شىداي بەرەمىز دە. ءوزىڭ كورىپ تۇرعانداي, ءبىز الىستاعى ورماندى اۋىلدا تۇرامىز. ءبىز ءبارىمىز اۋىل بولىپ «ەگەمەندى» وقيمىز, كۇندەلىكتى پوشتا قازىر كەلىپ تۇرادى. بۇرىنعى اۋدان اكىمدەرىنىڭ ءبارى ۋادە بەردى, بىراق ەسىلبايدا مادەنيەت ءۇيى ءالى اشىلعان جوق. وسى ماسەلەنى ەندى گازەتىڭە جازساڭ, – دەدى اۋىلدىقتاردىڭ اتىنان ءسوز العان جەرگىلىكتى كاسىپكەر, اۋداندىق ءماسليحاتتىڭ دەپۋتاتى قيساميدەن ماقاۋ ۇلى.
نەگىزى اۋىلدىڭ باس كوتەرەرى, ءاربىر ىسكە باستاماشىسى, دەمەۋشىسى دە وسى كاسىپكەر كورىنەدى. اۋىلدا «قازاق حاندىعىنىڭ 550 جىلدىعىنا» ارنالعان ەسكەرتكىشتىڭ اشىلۋىنا, «ماڭگىلىك ەل» بەينەلى ستەللاسىنىڭ جاسالۋىنا, بالالار وينايتىن ويىن الاڭىن جاساۋعا ۇلەس قوسىپتى.
شەگىرەن اۋىلدىق اۋماعىنا قاراستى ەسىلباي اۋىلىندا 650-دەي ادام تۇرادى. اۋىلدىقتاردىڭ دەنى ورمانشى, سەيتەن ورمان شارۋاشىلىعىندا ەڭبەك ەتۋدە. كۇندىز-ءتۇنى قالىڭ قاراعايلى اعاشتى ورتتەن قورعاپ, اڭ-قۇستارىن ساقتاۋعا ۇلەس قوسۋدا. سوندىقتان, كىشكەنتايلارىنان قالىڭ اعاشقا كوزدەرى ۇيرەنىپ, بۇلدىرگەنىن, قاراقاتىن تەرىپ جەيتىن بالالار اكە, اعالارىنىڭ جولىن قۋىپ ورماننان الىس كەتە المايدى ەكەن. سولاردىڭ ءبىرى – قوبىلاندى اتىعاي س. تورايعىروۆ اتىنداعى ۋنيۆەرسيتەتتىڭ ورمان شارۋاشىلىعى فاكۋلتەتىن ءبىتىرىپ, قازىر شارۋاشىلىقتا قىزمەت اتقارۋدا.
اۋىل مەكتەبىنىڭ الدىندا ويلانا قاراپ شوقان ءۋاليحانوۆتىڭ ءمۇسىنى تۇر. كۇتىم قاجەت-اق. جالپى, مەكتەپتىڭ سىرتقى كورىنىسى دە جۇدەۋ تارتىپ تۇر. مەكتەپ 1992 جىلى جاڭادان سالىنىپ, پايدالانۋعا بەرىلىپتى. ايتپاقشى, 1990 جىلى مەكتەپتىڭ قۇرىلىس جۇمىستارى توقتاپ قالعان كەزدە اۋىلدىڭ ءوتىنىشىن ارقالاپ, مارقۇم قايكەن يسابەك اقساقال الماتىعا دەيىن بارعان. شەگىرەن كەڭشارىنىڭ ديرەكتورى قالاۋ قاراتاي ۇلى وسى مەكتەپتى سالۋعا باستاماشى بولىپ, اۋىل كوشەلەرىن جوندەپ بەرىپتى. قازىر مەكتەپتە 77 وقۋشى ءبىلىم الۋدا.
– مەن وسى اۋىلدا تۋىپ-ءوستىم. مەكتەپتە تالاي جىل مۇعالىم بولدىم. وسى جاقىندا عانا اكىمدىك قىزمەتكە كەلدىم. بىرلەسىپ «تۋعان جەر» باعدارلاماسى اياسىندا جۇمىس جاسايمىز دەپ ويلايمىن, – دەيدى اۋىل اكىمى جاسۇلان ابەلدينوۆ.
اۋىل داستارقانى مول, قايماق, ءسۇت, بالقايماق, قۇرت, ىرىمشىك, نان-توقاش دەيسىز بە, ءبارى جايناپ تۇر, مال-جان امان. اتتەڭ, قولدارى جەتپەي تۇرعان الەۋمەتتىك ماسەلەلەر – جول, ەڭ باستىسى, مادەنيەت ءۇيى كەرەك. اكىمدەر تالاي جىلعى ءوتىنىشتى ورىنداپ, شالعايداعى اۋىلدى قۋانتسا ەكەن دەيمىز.
فاريدا بىقاي,
«ەگەمەن قازاقستان»
پاۆلودار وبلىسى,
ەسىلباي اۋىلى
