اۋدان اكىمى ءراحماتىلدا راحمانبەرديەۆ ەلباسى نۇرسۇلتان نازارباەۆتىڭ باستاماسىمەن ەلىمىزدە ەلەۋلى ءىس-شارالار اتقارىلىپ جاتقانىن, ونىڭ ىشىندە دەنساۋلىق ساقتاۋ سالاسىنا ەرەكشە كوڭىل ءبولىنىپ وتىرعاندىعىن اتاپ ءوتتى. بۇدان كەيىن ەڭبەك ارداگەرى مامەت سۇلەيمەنوۆ ەمدەۋ نىسانىنىڭ بوي كوتەرۋىنە اتسالىسقان ازاماتتارعا العىسىن ءبىلدىردى.
قوستوبەلىتەردىڭ قۋانىشىمەن عيماراتتىڭ قۇرىلىسىن جۇرگىزگەن «Binna-K» جاۋاپكەرشىلىگى شەكتەۋلى سەرىكتەستىگىنىڭ ديرەكتورى كەرىم اتاشەۆ تا ءبولىسىپ, امبۋلاتوريانىڭ كىلتىن اعا دارىگەر عالىمجان قالتاەۆقا سالتاناتتى تۇردە تابىس ەتتى. بۇدان كەيىن اۋدان اكىمى ءراحماتىلدا راحمانبەرديەۆ پەن بايزاق اۋداندىق ورتالىق اۋرۋحاناسىنىڭ باس دارىگەرى رىسكەلدى ساپاربەكوۆ دارىگەرلىك پۋنكتتىڭ لەنتاسىن قيدى. وبلىستان, اۋداننان ارنايى كەلگەن قوناقتار باستاعان اۋىل تۇرعىندارى عيمارات ىشىنە كىرىپ, جاڭا نىساننىڭ بولمەلەرىن ارالاپ كوردى. امبۋلاتورياداعى انىقتاما, زەرتحانا, ەكپە ەگۋ, زالالسىزداندىرۋ, تەراپيا, پەدياتريا, ايەلدەرگە كومەك كورسەتەتىن ورىن مەن كۇندىزگى ەم-شارا كابينەتتەرى تولىقتاي سوڭعى زاماناۋي قۇرال-جابدىقتارمەن قامتىلعان.
بۇدان كەيىن اۋدان اكىمى سۋحامباي اۋىلىنداعى 15 كەلۋشىگە ارنالعان دارىگەرلىك امبۋلاتوريانىڭ دا سالتاناتتى اشىلۋىنا قاتىستى. ءوز كەزەگىندە امبۋلاتوريانىڭ سيمۆولدىق كىلتى مەكەمە مەڭگەرۋشىسى ۇلدانا مىرزاشەۆاعا تاپسىرىلدى.
كەڭ, ءارى جارىق, ناۋقاستاردى ەمدەۋگە بارلىق جاعداي جاسالعان ءزاۋلىم مەكەمەلەر ەندىگى جەردە ساپالى مەديتسينالىق كومەك جولىندا قىزمەت ەتەتىن بولادى.
حاميت ەسامان,
«ەگەمەن قازاقستان»
جامبىل وبلىسى
