قوعامداعى وزەكتى تاقىرىپقا قوزعاۋ سالعان تۋىندى جاستارعا وي تاستايدى. وتباسىلىق ءومىردىڭ ءمانى نەدە دەگەن سۇراققا جاۋاپ ىزدەيدى. دوستارىمەن باس قوسىپ, ءازىل قالجىڭى جاراسقان توپتىڭ ىشىنەن ساعىم مەن نۇرگۇلدىڭ كەنەتتەن ۇرىسا كەتكەنىن بايقايسىز. سول كۇنى نۇرگۇلدىڭ تۋعان كۇنى ەدى. الايدا, اششى سۋعا سىلقيا تويىپ العان ساعىمنىڭ ەسىنەن بۇل كۇن تارس شىعىپ كەتەدى. بار ماسەلە قالتا تەلەفوندا ەدى. كىم سوقتى تەلەفوندى, دەگەن كۇيەۋىنىڭ سوزىنە جاۋاپ بەرمەگەن ايەلىنىڭ تەرىس قىلىعى ەرىنىڭ نامىسىنا ءتيىپ, ودان ءارى شيەلەنىستى ۋشىقتىرا تۇسەدى. قىزعانىش دەگەن قىزىل وتتان شاڭىراقتىڭ شىرقى بۇزىلىپ, اسپان اينالىپ جەرگە تۇسكەندەي بولادى. بايلىق پەن داڭققا ماستانىپ, جۇرتتى اۋزىنا قاراتقىسى كەلگەن ساعىمعا كورشى قاريا اعالىق اقىلىن ايتىپ, سابىرعا شاقىرادى. بەس كۇندىك جالعان ومىردە سىيلاستىقپەن, ادامگەرشىلىك قاسيەتتى اياققا تاپتاماي وتكىزگەنگە نە جەتسىن شىركىن! دەسەك تە بولماشى نارسەگە شاڭىراعى شايقالىپ, ەكى جاققا ايىرىلىسىپ جاتاتىن جاستار قانشاما؟ اۆتور ەكىنشى جاقتان پاراللەل كارتينانى قوسا سۋرەتتەيدى. وندا جولداسىنىڭ قىزعانىشىنان مەزى بولعان ايەلدىڭ سول ءبىر بالالىق شاقتى, العاشقى سەزىمدى, وتكەن كۇنگە دەگەن ساعىنىشقا تولى جىلداردى اڭساۋى شىعارمانىڭ ءون بويىنان كىرشىكسىز تازالىقتى ەلەستەتەدى. ۇيىنەن كەتىپ قالعان نۇرگۇل جول بويىنان تاڭات ەسىمدى جىگىتتى جولىقتىرادى. تاڭات پەن نۇرگۇل ءبىر بىرىنە عاشىق بولىپ, ەسسىز سەزىمنىڭ ەتەگىندە جۇرەدى, الايدا نۇرگۇل بۇل ويىننان باس تارتادى. سەن جاسسىڭ, بولاشاعىڭ ءالى الدا, مەن سەنىڭ تۇپ تۇنىق ءومىرىڭدى لايلاعىم كەلمەيدى, دەپ ودان ات ءىزىن سۋىتادى. بوزبالانىڭ وتباسىلى ايەلگە عاشىق بولۋىن كورسەتە وتىرىپ اۆتور, جىگىتتى اناسىنان انا ءسۇتى كەتپەگەن سابيدەي اڭعال, اقكوڭىل, جاماندىق اتاۋلىعا قارسى, ادامنىڭ ءبارىن جاقسى كورەتىن مارسياناعا تەڭەستىرەدى.
وسى ورايدا باستى ءرولدى سومداعان اينۇر راحيپوۆانىڭ دا پىكىرىن بىلدىك. –شىعارماداعى نەگىزگى وي ادامداردىڭ ءبىر-ءبىرىن باعالاي ءبىلۋى. ادامي قۇندىلىقتىڭ, ادامي قارىم قاتىناستىڭ جوعارى دەڭگەيدە تۇرۋى ەرلى-زايىپتىلار اراسىندا سەزىم قىلىن ءۇزىپ الماۋدى ماقسات تۇتادى. ادامنىڭ ەڭ العاشقى سەزىمى تازالىقتى اڭسايتىن, ەڭ نازىك ليريكاعا قۇرىلعان تۋىندى.
−الماتىداعى ع.مۇسىرەپوۆ تەاترىنا 70 جىلدىڭ باسىندا اكتەر بولىپ كەلگەنمىن. بۇل نۇرلان ءورازاليننىڭ ەڭ العاشقى درامالىق شىعارماسى بولاتىن. بۇل شىعارما العاش رەت 1972−73 جىلى ساحنالاندى. سول جەردە تاڭاتتىڭ ءرولىن مەن ويناعان بولاتىنمىن. سول جىلدارى قازاق تەاترىندا رەزونانس تۋدىرعان, ۇلكەن انشلاگپەن وتكەن سپەكتاكلدىڭ ءبىرى بولدى. ءتىپتى 9-10 جىلعا دەيىن ساحنا تورىنەن تۇسكەن جوق. استانا جاستار تەاترىندا ءجۇرىپ جاتقانىنا دا 4 جىلداي ۋاقىت بولدى. وزگەشەلىگى قازىرگى كوزقاراسقا جاقىن, بۇرىنعى فورماتتاعى تەكستتەردى الىپ تاستادىق, ادامي تارتىستاردا عانا قالدى. دەكوراتسيا جاعىنان دا تۇرلەنىپ, قازىرگى زامان تالابىنا ساي جاڭاشا ۇسىندىق, كورەرمەن جىلى قابىلدادى دەپ ويلايمىن − دەيدى, رەجيسسەر نۇرقانات جاقىپباي.
ساحنادا كۇيەۋى ساعىمدى – ازامات ەسقۇلوۆ, نۇرگۇلدى – اينۇر راحيپوۆا, تاڭاتتى – ەربول تىلەۋكەنوۆ, كورشىنى – بەيبىت قۇسانباەۆ, مونتەردى – بەكجان كەرىمباەۆ, اۋلا سىپىرۋشىنى – التىناي نۇربەك, سانتايدى – ايمان ەسەنقىزى ءساتتى ويناپ شىقتى. شىعارمانىڭ قويۋشى رەجيسسەرى نۇرقانات جاقىپباي.
ايمان مۇقىشەۆا
