ەستونيانىڭ ەلەكتروندى باسقارۋ اكادەمياسىندا (eGA) ەلەكتروندى ۇكىمەت جۇيەسى نەگىزگى قاعيداتتارى مەن ەلەمەنتتەرى, ونىڭ ىشىندە ساياسي جانە زاڭنامالىق اسپەكتىلەر تالقىلاندى. اكادەميا اتقارۋشى ديرەكتورى ارۆو وتت جوعارى تەحنولوگيالاردى دامىتۋ مەملەكەتتىڭ تاۋەلسىزدىك العاننان كەيىن نەگىزگى باسىمدىلىقتارىنىڭ بىرىنە اينالعانىن جەتكىزدى. قازىر ەستونيا - ەۋرووداقتىڭ ساندىق تەحنولوگيالار سالاسىن دامىتۋ بويىنشا كوشباسشى ەلدەرىنىڭ ءبىرى.
استاناداعى مەملەكەتتىك قىزمەت سالاسىنداعى وڭىرلىك حاب باسقارۋشى كوميتەت توراعاسى اليحان بايمەنوۆ عالامدانۋ, اقپاراتتىق تەحنولوگيالار دامۋى مەملەكەتتىك قىزمەتكە جاڭا سىناقتار مەن جاڭا مۇمكىندىكتەر تۋعىزعانىن ايتتى. ەستونيا تاجىريبەسى - يننوۆاتسيانى مەملەكەتتى باسقارۋدا ءتيىمدى پايدالانۋ ۇلگىلەرىنىڭ ءبىرى. «مىسالى, ساندىق تەحنولوگيالاردى ەنگىزۋ ارقىلى بىلتىر وسى ەلدىڭ ۇكىمەتى ازاماتتاردىڭ بۇرىن مەملەكەتتىك قىزمەتتى الۋ ءۇشىن كەزەككە كەتەتىن ءبىر اپتاداي ۋاقىتىن جانە قورعانىسقا جۇمسالاتىن بيۋدجەتكە تەڭ قارجىنى ۇنەمدەگەن», - دەدى بايمەنوۆ.
قاتىسۋشىلار ءبىلىم بەرۋ, دەنساۋلىق ساقتاۋ, قوعامدىق كولىكتەردە قىزمەت كورسەتۋ, «سمارت-سيتي» جوباسىن جۇزەگە اسىرۋدىڭ ءبىر بولشەگى رەتىندە تاللين قالاسى تۇرعىندارىمەن ونلاين-قۇرالدار ارقىلى قارىم-قاتىناس جاساۋ جانە قۇقىق قورعاۋ جۇيەسى سياقتى ءارى ءتۇرلى سالالارداعى يننوۆاتسيالىق شەشىمدەرمەن تانىستى. اسىرەسە ەمدەلۋشىنىڭ بارلىق مالىمەتتەرىن, ونىڭ ىشىندە مەديتسينالىق ساقتاندىرۋ قۇجاتىن دا ورتاق پورتالدا شوعىرلاندىراتىن دەنساۋلىق ساقتاۋ سالاسىنداعى ينتەگراتسيالانعان ەلەكتروندى جۇيە قىزىعۋشىلىق تۋدىردى.
اكادەميا ساراپشىلارى ەلەكتروندى يدەنتيفيكاتسيا مەحانيزمدەرى مەن ساندىق پروتسەدۋرالاردى قاۋىپسىز جاعدايدا جاساۋدىڭ نەگىزى سانالاتىن ەلەكتروندى قولتاڭبا جايلى باياندادى. مامانداردىڭ ايتۋىنشا, ەستونيانىڭ بارلىق دەرلىك ازاماتى ەلەكتروندى قولتاڭباعا يە, بۇل «ساندىق مەملەكەت» قىزمەتىن, ماسەلەن, ۇيالى تەلەفون ارقىلى جەدەل الۋىنا جول اشادى.
قازاقستاندىق دەلەگاتسيا, سونىمەن بىرگە ۇلتتىق Call ورتالىعىندا بولىپ, ەستون دەپۋتاتى, ەستون-قازاقستاندىق پارلامەنتتىك توپتىڭ توراعاسى دەنيس بورو́ديچپەن دە كەزدەستى. كەزدەسۋ بارىسىندا ەستونيانىڭ ينتەرنەت ارقىلى پارلامەنتكە داۋىس بەرۋ وتكىزگەن العاشقى مەملەكەت ەكەندىگى ايتىلدى. ال 2000 جىلدىڭ تامىز ايىندا ەستونيا قۇجاتتار جەلىسىن پايدالانىپ, قاعازسىز وتىرىس وتكىزگەن الەمدەگى ءبىرىنشى ەل بولدى.
باعدارلاما اياسىندا «ۇكىمەت ازاماتتار ءۇشىن» مەملەكەتتىك كورپوراتسيا باسقارما توراعاسى ابىلايحان وسپانوۆ جانە eGA اتقارۋشى ديرەكتورى ارۆو وتت مەملەكەتتىك قىزمەت كورسەتۋ سالاسىندا اقپارات الماسۋ جانە ىنتىماقتاستىقتى دامىتۋ بويىنشا مەموراندۋمعا قول قويدى.
حابتىڭ تۇراقتى سەرىكتەستەرىنىڭ ءبىرى – eGA - ەلەكتروندى باسقارۋ, ەلەكتروندى دەموكراتيا جانە اشىق اقپاراتتىق قوعامدى دامىتۋ بويىنشا وزىق تاجىريبە مەن ءبىلىم قالىپتاستىرۋ جانە تاراتۋعا باعىتتالعان ساراپتامالىق ورتالىق ءارى كەڭەس بەرۋ ۇيىمى. اكادەميا 60-تان استام ەلدىڭ 3500 مەملەكەتتىك قىزمەتكەرىن وقىتىپ, 60-تان ارتىق حالىقارالىق اقپاراتتىق-كوممۋنيكاتسيالىق جوبالارعا قاتىسقان.
قازاقستاندىق دەلەگاتسيا حەلسينكي قالاسىندا دا فين ارىپتەستەرىمەن كەزدەسىپ, مەملەكەتتىك قىزمەتكەرلەردىڭ كاسىبي بىلىكتىلىكتەرىن ارتتىرۋ تاسىلدەرى مەن مەملەكەتتىك قىزمەت كورسەتۋ جولدارىن جاقسارتۋ تۋرالى پىكىر الماستى. فينليانديا قارجى مينيسترلىگىندە تاراپتار مەملەكەتتىك قىزمەت سالاسىنداعى ىنتىماقتاستىقتى كەڭەيتۋ ماسەلەلەرىن تالقىلادى.
استاناداعى مەملەكەتتىك قىزمەت سالاسىنداعى وڭىرلىك حاب - ايماقتاعى مەملەكەتتىك قىزمەت سالاسىنداعى تاجىريبە مەن ءبىلىم الماسۋدىڭ ينستيتۋتسيونالدى الاڭى. قازىرگى تاڭدا حابتىڭ قاتىسۋشى-ەلدەرى قاتارىندا 38 مەملەكەت, ونىڭ ىشىندە امەريكا, ەو, تمد, كاۆكاز جانە AسEAن ەلدەرى بار.
