اجارى ايشىقتى اۋىل
تۋىپ-وسكەن جەرىم بىرلەستىككە كەلگەن سايىن كوڭىلىم كوتەرىلىپ, ەرەكشە شابىتقا بولەنەمىن. اۋىلىمىز ۋاقىت اعىمى قانشا قۇبىلسا دا, قۇت-بەرەكە دارىعان بەرىك داستۇرىنەن اينىعان ەمەس. تاۋەلسىزدىك جىلدارى جاڭادان 65 ءۇي تۇرعىزىلىپ, ءتۇتىن سانى 150-گە جەتتى. جىلىنا 10-12 ءسابي ىڭگالاپ دۇنيە ەسىگىن اشادى.
اۋىلداستارىم شەتىنەن ەڭبەكقور, ۇيىمشىل. ۇلكەندەردەن ۇلگى-ونەگە العان جاستارىمىز ەل ەرتەڭىنىڭ لايىقتى ءىزباسارى رەتىندە ءوسىپ كەلەدى. تۇرعىنداردى 1991 جىلى جاتاقحانا ۇلگىسىندە سالىنعان, نە سپورت زالى, نە اسحاناسى جوق عيماراتتىڭ جايى قاتتى تولعاندىراتىن. مەكتەپتەگى 128 وقۋشى, دايارلىق توبىنداعى 22 بالا, شاعىن ورتالىقتاعى 30 ءبۇلدىرشىن ءۇشىن وتە تارلىق ەتەتىن. جەرلەسىمىز, پارلامەنت ءماجىلىسىنىڭ دەپۋتاتى كارىباي مۇسىرمانمەن وتكەن كەزدەسۋدە كوپ جىلدان بەرى شەشىلمەي كەلە جاتقان ماسەلەنى جەتكىزگەن بولاتىنبىز. جۋىردا جاقسى حابار الدىق. حالىق قالاۋلىسى وبلىس اكىمىنە كىرىپ, بولاشاعى جارقىن ەلدى مەكەن تۇرعىندارىنىڭ مۇقتاجىنا كومەكتەسۋدى ءوتىنىپتى. دەپۋتاتتىق ساۋالعا وراي سپورت زالىنىڭ جوبالاۋ-سمەتالىق قۇجاتتارىن ازىرلەۋگە قارجى ءبولىنىپ, جەرگىلىكتى قازىنا قاراجاتى ەسەبىنەن 2018 جىلى سالىناتىنى ايتىلىپتى.
تۋعان جەرگە تۋىن تىگىپ, اۋىلدىڭ وركەندەۋىنە لايىقتى ۇلەس قوسىپ جۇرگەن مۇعالىمدەر مۇنداي شەشىمگە ەرەكشە ريزا.
تايلاق جالمۇرزەنوۆ,
ەڭبەك ارداگەرى
سولتۇستىك قازاقستان وبلىسى,
ايىرتاۋ اۋدانى
جەلتوقساندىقتارعا تاعزىم
جۋىردا تۇرگەن اۋىلدىق مادەنيەت ۇيىندە «جەلتوقسان قۇرباندارىنا مىڭ تاعزىم» اتتى ەسكە الۋ كەشى ءوتتى.
تاۋتۇرگەن ورتالاۋ مەكتەبىنىڭ مۇعالىمى ەسەندوس اسۋباي جەلتوقسان وقيعاسىنا توقتالا كەلىپ, تاۋەلسىزدىك ءۇشىن جانىن قۇربان ەتكەن جاستاردى ۇنسىزدىكپەن ەسكە الىپ, تاعزىم ەتتى. تۇرگەن اۋىلىنىڭ اكىمى بوتا ەلەۋسىزوۆا دا جەلتوقسان وقيعاسىنىڭ تاريحي مانىنە توقتالا كەلىپ, جاستاردى ءبىلىمدى مەڭگەرىپ, ەلىمىزدىڭ پاتريوتتارى بولۋعا شاقىرىپ, وسى كەشتى ۇيىمداستىرۋشىلارعا العىسىن ءبىلدىردى. مەكتەپ وقۋشىلارى جەلتوقسان قۇرباندارى جايلى ولەڭدەر وقىپ, ايتۋلى وقيعادان بەينەكورىنىستەر ۇسىنىلدى.
تۇرگەن اۋىلدىق كىتاپحاناسىنىڭ قىزمەتكەرى ا.كاربوزوۆا جەلتوقساندىقتاردىڭ وتانعا دەگەن ادالدىعى مەن ارمانىن, شىنشىلدىعى مەن جەڭىسىن ۇرپاقتان-ۇرپاققا ناسيحاتتاۋ ءبىزدىڭ مىندەتىمىز دەي كەلە, تۇرگەن اۋىلدىق كىتاپحاناسىنىڭ ۇيىمداستىرۋىمەن اۋىل ايماعىنداعى مەكتەپتەر اراسىندا «جەلتوقسان جەلى – ىزعارلى» اتتى شىعارماشىلىق بايقاۋ وتەتىندىگىن جاريالاپ, ونىڭ ەرەجەسى مەن قويىلاتىن تالاپتارىن ايتىپ ءوتتى.
گ.سايبوسىنوۆا
الماتى وبلىسى
پىسىقايلارعا ايىپپۇل سالىندى
الكوگول ونىمدەرى مەن تەمەكى ساۋداسىنا شەكتەۋ قويىلعانىمەن, كەيبىر بازار اۋماقتارىندا زياندى ونىمدەردىڭ ساۋداسى قىزىپ تۇر. وسىعان وراي ماڭعىستاۋ اۋداندىق سالاماتتى ءومىر سالتىن قالىپتاستىرۋ ورتالىعى مەن اۋداندىق جاستار رەسۋرستىق ورتالىعى ماماندارىنىڭ مۇرىندىق بولۋىمەن, اۋداندىق جەرگىلىكتى پوليتسيا قىزمەتىنىڭ قولداۋىمەن ارنايى توپ قۇرىلىپ, شەتپەدەگى ساۋدا ورىندارىندا تۇسىنىك جۇمىستارىن جۇرگىزۋ ءۇشىن رەيد ۇيىمداستىرىلدى. قۇزىرلىلاردىڭ ەسكەرتۋلەرىنە قۇلاق اسپاي كەلگەن پىسىقايلارعا ايىپپۇل سالىندى.
ءبىزدىڭ رەيدتىڭ ماقساتى – تۇنگى مەزگىلدە جانە كامەلەتكە تولماعان بالالار مەن جاسوسپىرىمدەرگە اراق-شاراپتى ساتقىزباۋ. ايتا كەتەيىن, ەكىنشى جارتى جىلدىقتا شەتپەدە تۇنگى بەيمەزگىل ۋاقىتتا زياندى ونىمدەردى ساۋدالاعان 10-عا جۋىق ساۋدا ورىندارىنىڭ يەلەرىنە بىرنەشە رەت ايىپپۇل سالىنعان. الداعى ۋاقىتتا مۇنداي شارانى ءجيى ۇيىمداستىراتىن بولامىز.
اللابەرگەن قونارباەۆ
ماڭعىستاۋ وبلىسى,
ماڭعىستاۋ اۋدانى
جەكەگە جەم ساتىلسا ەكەن...
قازىرگى تاڭدا استانا قالاسىندا تۇرساق تا, وسكەن جەر – اۋىل جاققا قاراي ەلەڭدەپ جۇرەمىز. كىندىك قان تامعان توپىراقتا تۋعان-تۋىس, دوس-جاران قالدى. سولارمەن اندا-ساندا ءبىر تىلدەسىپ, اۋىل-ايماقتىڭ اماندىعىن ءبىلىپ تۇرۋدىڭ ءوزى ءاربىر سانالى ازاماتتىڭ پەرزەنتتىك پارىزى دەپ ويلايمىن.
جاقىندا قاراعاندىداعى نۇرا اۋدانىنىڭ ورتالىعى نۇرا اۋىلىنداعى تانىستارىما تەلەفون سوققانىمدا, مىناداي اڭگىمەدەن قۇلاعدار بولدىم. وڭىردە ەگىننىڭ بيىك شىققانى بەلگىلى, قامبا تولى استىق. دەگەنمەن, اۋدان ورتالىعىنداعى ازىن-اۋلاق مالىنا قاراپ وتىرعان اعايىن جەمنەن قىسىلىپ وتىر ەكەن. جەكەگە جەم ساتىلمايتىن كورىنەدى. ەلەۆاتورلار مەن قويمالاردىڭ ماڭى كۇنۇزاق كەزەك كۇتكەن ادامدارعا تولى. وكىنىشتىسى سول, جەم ءۇشىن جانجالداسىپ قالاتىن تۇرعىندار دا بار دەيدى...
بۇگىنگى كۇندە استىق وسىرەتىن شارۋاشىلىقتاردىڭ ءبارى جەكەمەنشىكتىڭ قولىندا ەكەنى بەلگىلى. البەتتە, ولار ءونىمىن كىمگە, قايدا ساتارلارىن وزدەرى بىلەدى. دەگەنمەن, اۋدان باسشىلارى قاراپايىم شارۋالاردىڭ مۇڭىنا قۇلاق ءتۇرىپ, وسى ماسەلەنىڭ شەشىمىن تاپسا دەگەن تىلەك بار.
بەيسەنبەك الكەنوۆ,
اۋىل شارۋاشىلىعى سالاسىنىڭ ارداگەرى
استانا
كىتاپ وقيتىندار جەتكىلىكتى
امانگەلدى اۋدانىنىڭ ورتالىعىندا ەڭسەلى ەكى قاباتتى اقشاڭقان عيمارات الدىندا جاستارعا ۇلگى ونەگە-بولاتىن ەكى ۇلكەن ەسكەرتكىش تۇر. ءبىرى − جازۋشى ارتىنا وشپەس مۇرا قالدىرعان اقان نۇرمانوۆ, ەكىنشىسى اۋدانىمىزعا مادەنيەتتىڭ نۇرىن سەپكەن مادەنيەتتانۋشى توكەن ەلتەباەۆ. ال, وسى عيماراتتىڭ ىشىنە ەنسەڭىز رۋحاني بايلىعىمىز – كىتاپحانا سىزگە ەسىگىن ايقارا اشادى. جىل وتكەن سايىن كىتاپحانامىز جاڭا باسىلىمدارمەن, ءارتۇرلى سەريالارمەن شىعارىلعان اقىن-جازۋشىلاردىڭ كىتاپتارىمەن تولىقتىرىلىپ كەلەدى. وقىرمان سانى دا كوبەيۋدە. كىتاپحانامىزدا ءارتۇرلى ءىس-شارالار ءجيى وتەدى. ورتالىق كىتاپحانانىڭ نەگىزگى وقىرماندارى وقۋشىلار, زەينەتكەرلەر, ۇستازدار, مەكەمە قىزمەتكەرلەرى. ءار وقىرمان وقىعان كىتابىنان رۋحاني ء لاززات العىسى كەلەدى. سوندىقتان سۇراعان ادەبيەتتەرىن تاۋىپ, ءتىلىن تابۋعا ءار كىتاپحاناشى مۇددەلى. كىتاپحاناعا ءجيى كەلەتىن وقىرماندارىمىز. قوزى سەيداحمەتوۆ, نۇرسۇلۋ ءابدىلدينا, كاتەپ ءابدىراحمانوۆا, سەرىك جۇماعۇلوۆ, باقىتكەرەي اسقاروۆ, نۇرلىبەك كەنجەبەكوۆ, اناتولي گوۆريلەنكو, بەيسەنعالي احمەتوۆ, جاڭىل سەيداحمەتوۆا, دۇيسەنبەك سارسەنبەتوۆ, ت.ب.
ءار وقىرماننىڭ تالاپ-تىلەكتەرى ءارتۇرلى, كەيبىرى ءباسپاسوز باسىلىمدارىنان بىرنەشە جىل بۇرىن شىققان ماتەريالداردى ىزدەيدى. تاريحي كىتاپتارعا, كاسىپكەرلىككە بايلانىستى, مال شارۋاشىلىعى, تەحنيكا تۋرالى ادەبيەتتەرگە سۇرانىس جوعارى.
ءمولدىر ءامىرجانوۆا
قوستاناي وبلىسى,
امانگەلدى اۋدانى
