ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا ماڭعىستاۋ وبلىسى اكىمىنىڭ ورىنباسارى ماقسات سقاقوۆ مادەنيەت كۇندەرى 15-18 تامىزدا وتەتىنىن ايتا كەلە, ەلوردانىڭ ستۋدەنتتەر ساياباعىندا, «بايتەرەك» مونۋمەنتى مەن قالالىق اكىمدىك عيماراتى الاڭىندا جانە «جەرۇيىق» ساياباعىندا ءارتۇرلى كونتسەرتتەر مەن ويىن-ساۋىق باعدارلامالارى ۇيىمداستىرىلاتىنىن اتاپ ءوتتى.
15 تامىزدا كەشكى ساعات 21:00-دە ەكسپو-2017 كورمەسىنىڭ امفيتەاترىندا «قارت كاسپيدەن سالەم ال, ەركە ەسىل!» اتتى كونتسەرت وتەدى. وعان تامارا اسار, ايگۇل قوسانوۆا, كامشات جولدىباەۆا, ۇلىقپان جولداسوۆ سىندى ماڭعىستاۋدان شىققان بەلگىلى ونەرپازدار قاتىسىپ, ونەرىمەن شاشۋ شاشادى.
ودان كەيىن 16 تامىز كۇنى «شابىت» عيماراتىندا ماڭعىستاۋلىق اقىن ەسەنعالي راۋشانوۆتىڭ ء«بىزدىڭ ەلدىڭ جىلقىسى كىل كوكمويناق» اتتى شىعارماشىلىق كەشى وتەدى. كەشتە ەلىمىزدىڭ بەلگىلى اقىندارى ولەڭ وقىپ, كوپشىلىكتى جىر الەمىنە جەتەلەمەك.
ماڭعىستاۋ ءوڭىرىن زاڭعار جازۋشى ءابىش كەكىلباەۆ «اشىقاسپان استىنداعى مۋزەي» دەپ تەگىن اتاماعان. سونداي-اق, بۇل كيەلى مەكەن تۋرالى پرەزيدەنت نۇرسۇلتان نازارباەۆ «ماڭعىستاۋ تۇرعىندارىنا كوپ ادامدار ومىرىندە تىم قۇرىعىندا ءبىر رەت بولىپ, كورۋدى ارماندايتىنداي جەردە تۇرۋ باقىتى بۇيىرعان», دەگەنى بار. ەندەشە, نەبىر تاريحي-مادەني ەسكەرتكىشتەرىمەن تالايلاردى تامساندىرعان وركەندى ءوڭىردىڭ تاستان قاشالىپ, اعاشتان ويىپ جاساعان بۇيىمدارىن استانالىقتار «ەتنواۋىل» ۇلتتىق-مادەني كەشەنىندە 17 تامىز كۇنى وتەتىن ەتنوگرافيالىق تەاترلاندىرىلعان شارالار كەزىندە تاماشالاي الادى. وندا ماڭعىستاۋلىق جىر مەن كۇي ماقامى اۋەلەپ, قازاقتىڭ ۇلتتىق سالت-ءداستۇرى مەن ادەت-عۇرپىنان تەاترلاندىرىلعان قويىلىم كورسەتىلەدى. اقساقالدار مەن اقجاۋلىقتى اجەلەر باتا بەرسە, ىزەتتى كەلىندەر مەن يبالى قىزدار ۇلتتىق تاعامدار ازىرلەيدى. ماڭعىستاۋ وبلىستىق مادەنيەت باسقارماسى باسشىسىنىڭ مىندەتىن اتقارۋشى ءپانيا سارمۋرزينانىڭ ايتۋىنشا, «ەتنواۋىلدا» ءتورت قازان پالاۋ ءپىسىرىلىپ, جۇرتشىلىققا ۇلەستىرىلمەك.
جالپى, ماڭعىستاۋ ءوڭىرى شۇباتىمەن, بالقايماعىمەن ايگىلى ەكەنى بەلگىلى. وسى ۇلتتىق تاعامدى دارىپتەۋگە ۇلكەن ۇلەس قوسىپ جۇرگەن وبلىستىق ءماسليحاتتىڭ دەپۋتاتى ساۋلە جاقاەۆا باس بولىپ, ەكسپو اياسىنداعى مادەنيەت كۇندەرىنە بال تاتىعان شۇبات پەن جاڭاوزەننىڭ ءسۇت ونىمدەرى زاۋىتىنىڭ ءتاتتى ونىمدەرى اكەلىنىپتى. ەلوردالىقتار بۇل تاعامداردان ءدام تاتىپ, ساتىپ الۋعا مۇمكىندىگى بولادى.
سونداي-اق, «ەتنواۋىل» الاڭىندا «ورنەك» جانە «تاربيە» ءسان ۇيلەرىنىڭ ۇلتتىق كوستيۋمدەر كورسەتىلىمى ۇيىمداستىرىلادى. ودان كەيىن تامارا اسار مەن «جورعا» بي ءانسامبلىنىڭ كونتسەرتتىك باعدارلاماسى كوپشىلىككە ۇسىنىلادى.
بۇعان قوسا, 18 تامىز كۇنى ءابىش كەكىلباەۆتىڭ «شىڭىراۋ» سپەكتاكلى قويىلماق. سپەكتاكل م.گوركي اتىنداعى مەملەكەتتىك اكادەميالىق ورىس دراما تەاترىندا ساعات 16:00-دە باستالادى.
وبلىستىڭ مادەنيەت كۇندەرى اياسىندا سونىمەن بىرگە, كوكپاردان, جاسوسپىرىمدەر اراسىندا قازاق كۇرەسىنەن, توعىزقۇمالاقتان سايىستار وتەدى. «قازانات» يپپودرومىندا كوكپاردان قازاقستان ۇلتتىق قۇراماسى مەن «اداي» كومانداسى سىنعا تۇسەدى. قىز قۋ, تەڭگە ءىلۋ, اسىق اتۋدان سايىستار ۇيىمداستىرىلادى.
ال 18 تامىزدا «قازاقستان» سپورت كەشەنىندە « ۇلى دالا قىراندارى» جوباسى اياسىندا ارالاس جەكپە-جەكتەن (م1 جانە ك1) جارىستار وتەدى. جارىسقا التى مەملەكەتتەن, اتاپ ايتقاندا, قازاقستان, ۋكراينا, لاتۆيا, وزبەكستان, پولشا, حورۆاتيادان سپورتشىلار قاتىسقالى وتىر. قازاقستاننان جەكپە-جەككە ماڭعىستاۋ, استانا, پاۆلودار, اقتوبە, اتىراۋ قالالارىنىڭ كىل مىقتىلارى شىعادى», دەيدى ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بەكبولات بايجانوۆ.
جالپى, ماڭعىستاۋ وبلىسىنىڭ استاناداعى مادەنيەت كۇندەرىنە بارلىعى 600-گە جۋىق ونەرپاز قاتىسسا, ونىڭ 20-سى قولونەر شەبەرى, 233-ءى كاسىبي ۇجىمدار مەن ارتىستەر بولسا, 120-سى ەتنومادەني بىرلەستىكتەردىڭ ونەرپازدارى ەكەن.
قىمبات توقتامۇرات,
«ەگەمەن قازاقستان»
