بۇدان بۇرىن تابيعي اپاتتان 64 ادامنىڭ قازا بولعانى, ونىڭ ىشىندە جەكسەنبى كۇنى حيماچال-پرادەش شتاتىندا لاي كوشكىنى سالدارىنان 48 ادامنىڭ اجال قۇشقانى حابارلانعان بولاتىن.
ءۇندىستاننىڭ توتەنشە جاعدايلار جونىندەگى ۇلتتىق باسقارماسىنىڭ سوڭعى دەرەكتەرىنە سايكەس, اسسام شتاتىندا اپات سالدارىنان 20 ادام كوز جۇمعان. 183 مىڭ ادام شاتىرلى قالاشىقتاردا باس ساۋعالاۋدا.
سونداي-اق بيحار شتاتىندا تابيعي اپات قۇرباندارىنىڭ سانى كۇرت ءوستى. ايماقتا سوڭعى ەكى كۇندە سۋ تاسقىنى سالدارىنان 41 ادام قازا بولعان. ءارتۇرلى دەرەكتەرگە سايكەس, ۋتتاراكحاند شتاتىندا لاي كوشكىنى كەزىندە 25 ادام مەرت بولدى.
وتكەن اپتانىڭ سوڭىندا ءۇندىستاننىڭ سولتۇستىگىندە, نەپال مەن بانگلادەشتە جاۋعان نوسەرلى جاڭبىر سوڭى سۋ تاسقىنىنا ۇلاستى. نەپالدا اپات سالدارىنان 91 ادام قازا تاۋىپ, 38-ءى ءىز-ءتۇسسىز جوعالعان. ال بانگلادەشتە 28 ادام مەرت بولعان. وسىلايشا, وڭىردە تابيعي اپاتتان كەمىندە 225 ادام كوز جۇمدى.
ايتا كەتەيىك, ءۇندىستاندا جىل سايىن ادام شىعىنىنا سەبەپ بولاتىن ەڭ قاۋىپتى تابيعي اپاتتاردىڭ ءبىرى – سۋ تاسقىنى. بيىلعى قاڭتار ايىندا ەلدىڭ مەتەورولوگيا دەپارتامەنتى 2016 جىلى قولايسىز اۋا رايى مەن تابيعي اپات سالدارىنان 1,6 مىڭعا جۋىق ادام قازا بولعانىن حابارلادى. ولاردىڭ باسىم بولىگى – 700-گە جۋىعى اپتاپ ىستىقتان قايتىس بولعان. ادام شىعىنى جاعىنان ەكىنشى ورىندا سۋ تاسقىنى تۇر – 475 ادام كوز جۇمعان.
