قازاق ەلىندە تۇڭعىش ۇيىمداستىرىلعان «التىن جەبە» ءتۋرنيرى ءۇش كەزەڭنەن: شاپشاڭ اتۋ, قالقان اتۋ جانە جامبى اتۋدان تۇرادى. ايتا كەتەر جايت, جامبى اتۋ قازاق حالقىندا كەڭ تاراعان مەرگەندىك سىننىڭ ءبىر ءتۇرى. اتپەن شاۋىپ كەلە جاتىپ جىگىتتەر ەكپىنىن باسەڭدەتپەستەن قۇرۋلى باقان ۇستىندەگى نىسانانى اتىپ قۇلاتۋعا ءتيىس. ەرەجە بويىنشا سپورتشىلار سورەدە ءوز سايگ ۇلىكتەرىنىڭ جانىندا بولادى. تورەشى بەلگى بەرىسىمەن ولار اتتارىن تەز ەرتتەپ, شابا جونەلىپ, جولىنداعى نىسانالاردى اتىپ قۇلاتۋلارى كەرەك. جارىسقا 10-نان استام ەلدەن كەلگەن سۇرمەرگەندەر قاتىسۋدا. ءبىزدىڭ ەلدەن «التىن جەبەدە» بەس سپورتشى باق سىنادى.
اتاپ ايتقاندا, «التىن جەبە» ءتۋرنيرىنىڭ جۇلدە قورى دا وتە قوماقتى بولدى. بەس ورىنعا دەيىن بايگە تىگىلدى.
بەلگىلى بولعاداي, 1 ورىندى رۋمىنيادان كەلگەن ميحاي كۋزمي الىپ, 2 ملن تەڭگەنى قانجىعاسىنا بايلادى. 2 ورىن مەن 1 ملن تەڭگە قازاقستاندىق سپورتشى سارىباي ايتبەكتىڭ ەنشىسىندە. 3 ورىن جانە 700 مىڭ تەڭگەنى ايكوز ەرالعان يەلەندى. ءتورتىنشى ورىن مەن 400 مىڭ تەڭگە ماجارستاننان كەلگەن نەموتي كريستوف ارپادقا بۇيىردى. بەستىكتى مالايزيا سپورتشىسى مۇحامەد اكمال بين موحامەد داكالان تۇيىندەدى. وعان 200 مىڭ تەڭگە بۇيىردى.
بۇدان بۇرىن حابارلانعانداي, مەملەكەت باسشىسى نۇرسۇلتان نازارباەۆ حالىقارالىق «ەكسپو-2017» مامانداندىرىلعان كورمەسىنىڭ مادەني-دۋماندى جانە سپورتتىق ءىس-شارالارىنىڭ كەشەندى باعدارلاماسى اياسىندا يپپودرومدا ءوتىپ جاتقان جامبى اتۋدان «التىن جەبە» حالىقارالىق ءتۋرنيرىن تاماشالادى.
سونىمەن قاتار, قازاقستان پرەزيدەنتى يپپودروم اۋماعىندا ورنالاسقان «ەتنواۋىل» ۇلتتىق-مادەني كەشەنىن ارالاپ كوردى.
