فوتو: ورىنباي بالمۇرات, «ەگەمەن قازاقستان»
«كەشە ءبىز «جىلقى» («Equus») اتتى تريلوگياسىن تۇسىرۋگە دايىندىق جۇمىستارىمەن تانىسىپ قايتتىق. ونى تانىمال كانادالىق رەجيسسەر نايوبي تومپسونعا سەنىپ, تاپسىرىپ وتىرمىز.
ءدال وسى تريلوگيانىڭ قازاقستان جەرىندە ءتۇسىرۋدىڭ ۇلكەن تاريحي ماڭىزى بار. سەبەبى جىلقىنىڭ العاش رەت قولعا ۇيرەتىلگەن جەرى – ءوزىمىزدىڭ ۇلى دالامىز, كەڭ بايتاق قازاق جەرى.
بوتاي مادەنيەتى كەزىندە جىلقى جانۋارىنىڭ العاش رەت قازىرگى قازاقستان جەرىندە قولعا ۇيرەتىلگەنى بەلگىلى. ونى عىلىمي زەرتتەۋلەر ...دە راستاپ وتىر. سودان بەرى جىلقى جانۋارى كوشپەلى حالىقتاردىڭ نەگىزگى كولىگىنە اينالدى, ىشسە - قىمىز, جەسە - ەت بەردى. اتا-بابالارىمىز ونىمەن ەۋروپاعا دەيىن بارىپ قايتتى. قازىرگى ۇلان-بايتاق جەرىمىزدى قورعاپ قالدى. سوندىقتان «جىلقى» تريلوگياسىنىڭ ۇلى دالادا تۇسىرىلەتىنى – تاريحي زاڭدىلىق.
جالپى, مينيسترلىك حالىقارالىق مەديا كومپانيالارمەن ارىپتەستىك بايلانىستاردى جان-جاقتى دامىتىپ كەلەدى. «جىلقى» تريلوگياسى دا وسى سالاداعى جۇمىستىڭ ايقىن كورىنىسى بولسا كەرەك.
تريلوگيا الەمنىڭ 50 مەملەكەتىندە كورسەتىلەدى. سوندىقتان اتالعان جوبا ارقىلى تاريحىمىز بەن مادەنيەتىمىزدىڭ تامىرى تەرەڭ ەكەنىن تاعى ءبىر مارتە كورسەتىپ, ماڭگىلىك ەلدى كەڭىنەن تانىتا الامىز دەپ سەنەمىن», دەپ جازدى مينيستر.
ايتا كەتەيىك, وسى جىلدىڭ 7 ناۋرىزىندا داۋرەن اباەۆ «قازاقستان» رترك» اق مەن «Clearwater Documentary Inc.» كومپانياسىنىڭ «EQUUS» دەرەكتى تريولوگياسىن تۇسىرەتىنىن جاريالاعان بولاتىن. بۇل جوبا 2018 جىلدىڭ قازان-قاراشا ايلارىندا كورەرمەن نازارىنا ۇسىنىلادى دەپ جوسپارلانىپ وتىر. تۋىندى الەمنىڭ 50-دەن استام ەلىندە ميلليونداعان اۋديتوريا جينايدى دەپ كۇتىلۋدە.
