ءباسپاسوز جيىنىندا ىنتىماقتاستىقتىڭ نەگىزگى باعىتتارى ءسوز بولىپ, الداعى جوسپارلار تانىستىرىلدى. ەلشىنىڭ ايتۋىنشا, قازاقستان مەن فرانتسيا اراسىنداعى قارىم-قاتىناستىڭ ناقتى 4 باعىتى بار. ەڭ اۋەلى, ەكونوميكالىق ىنتىماقتاستىقتى ءارتاراپتاندىرۋ قاجەت. قازىرگى تاڭدا ەكى ەل اراسىنداعى ساۋدا اينالىمى جىلىنا 3 ميلليارد ەۋروعا جەتىپ وتىر.
فرانسيس ەتەننىڭ پىكىرىنشە, ەكىنشى باعىت – مادەني بايلانىستى نىعايتۋ. ماسەلەن, جوعارعى وقۋ ورىندارىنىڭ ستۋدەنتتەرىن الماستىرۋ دا كۇن تارتىبىندە تۇر. ەلشى كەلتىرگەن دەرەكتەرگە سۇيەنسەك, قازىرگى تاڭدا 650-دەي قازاقستاندىق ستۋدەنت فرانتسيادا ءبىلىم الادى. كەلەشەكتە ولاردىڭ سانىن ارتتىرۋ كوزدەلگەن. سونداي-اق, مادەني ءىس-شارالاردى تۇراقتى ۇيىمداستىرىپ تۇرۋدى جوسپارلاپ وتىر. ەلشى انشىلەر شاقىرار كەزدە قازاقستاندىق اۋديتوريانىڭ سۇرانىسىنا نازار اۋداراتىنىن مالىمدەدى.
«ماۋسىمدا پاتريسيا كااس ونەرى كورسەتىپ كەتتى. الداعى ۋاقىتتا ونى تاعى شاقىرىپ وتىرمىز. وعان قوسا, كلاسسيكالىق مۋزىكا ورىندايتىن وركەستردى قازاقستانعا اكەلۋ جوسپاردا بار», – دەگەن فرانسيس ەتەن ديماش قۇدايبەرگەننىڭ تالانتىنا رازى ەكەنىن جەتكىزدى.
ەلشىنىڭ سوزىنە سۇيەنسەك, قارىم-قاتىناستىڭ ءۇشىنشى باعىتى – بارلىق دەڭگەيدە ساياسي ديالوگ ورناتۋ. وسىعان سايكەس, ەكى ەلدىڭ باسشىلارى, مينيسترلەر مەن پارلامەنتشىلەر اراسىنداعى ەكىجاقتى ساياسي ديالوگ قارقىندى دامىپ كەلەدى. ۇكىمەتارالىق جانە ۆەدومستۆوارالىق كونسۋلتاتسيالار تۇراقتى ۇيىمداستىرىلادى. ماسەلەن, بيىل 7 قىركۇيەكتە استانادا ۇكىمەتارالىق كوميسسيا وتكىزىلەدى.
فرانتسيانىڭ «ەكسپو-2017» حالىقارالىق كورمەسىندەگى پاۆيلونى اراداعى بايلانىستىڭ ءتورتىنشى نەگىزگى باعىتى ەكەنىن حابارلادى فرانسيس ەتەن. ونىڭ ايتۋىنشا, ء«ۇش جولاقتى ەل» كورمەسىن ءبىلىم بەرەتىندەي, تارتىمدى, ۇلگى الارلىقتاي بولۋىن نازاردا ۇستاعان. سونىڭ ناتيجەسى شىعار, كورمە اشىلعالى بەرى فرانتسيا پاۆيلونىن 300 مىڭنان استام مەيمان تاماشالاعان ەكەن.
جالپى فرانتسيا مەن قازاقستان اراسىنداعى ديپلوماتيالىق قارىم-قاتىناس جوعارعى دەڭگەيدە. ء«ۇش جولاقتى ەل» قازاقستان تاۋەلسىزدىگىن العاش تانىعان ەۋروپا ەلدەرىنىڭ قاتارىندا. سونىمەن قاتار, قازاقستان – فرانتسيانىڭ ورتالىق ازياداعى ستراتەگيالىق سەرىكتەسى. بۇگىندە ەكى ەل اراسىنداعى ساۋدااينالىمى دا جوعارعى دەڭگەيدە. اتاپ ايتار بولساق, ۋران ءوندىرىسى, تەمىر جول لوكوموتيۆتەرى, تيتان قۇيمالارى, مۇناي, تسەمەنت, فارماتسەۆتيكا, سۋمەن قامتاماسىز ەتۋ جانە اگرو-يندۋستريا سالالارىندا قارقىندى بايلانىس ورناتىلعان. رەسمي مالىمەتكە سۇيەنسەك, فرانتسيا قازاقستانعا 13,6 ميلليارد ەۋرو قارجى قۇيعان ەكەن.
