بيىل اۋداندا باقشا ونىمدەرى 2,7 مىڭ گەكتار جەرگە ەگىلىپتى. ءبىر قىزىعى سالماعى وتە اۋىر قاربىزداردى بازارلاردان كەيبىر تۇرعىندار, زەينەتكەرلەرگە ۇيلەرىنە دەيىن الىپ بارۋ قيىن كورىنەدى. -سوندىقتان قالاداعى تۇرعىن ۇيلەردىڭ قاسىنا اكەپ ساتۋعا رۇقسات ەتسە, بىزگە دە ىڭعايلى بولاتىنى ءسوزسىز,-دەيدى قاربىز وسىرۋشىلەر.
قايرات شاپۋوۆ باسقاراتىن «قايرات» شارۋا قوجالىعى 16 جىل بويى قاربىز وسىرەدى. قايرات وسىرگەن اۋىل قاربىزدارى كراسنويارسك, تيۋمەن, يركۋتسك, ءنوۆوسىبىر, ومبىعا بارادى. وبلىستا جوعارى سۇرانىسقا يە. نارىقتان ءوز ورنىن الدى. قاربىزدىڭ 30 ءتۇرلى سورتتارىن وسىرەدى.باقشاشىلار وسىرگەن لەبياجىلىك ءبىر قاربىزدىڭ ورتاشا سالماعى 10 كەلىدەن اسادى. ءتىپتى, 20 كەلى 300 گرامم تارتاتىن «فاراو» سورتتى قاربىز بار. سىرتى ساپ-سارى, ءىشى قىزىل نەمەسە سىرتى جاسىل, ءىشى سارى قاربىزداردى كورەسىز, «ۆەليكان», «رەد-كريستالل» اتالاتىن ەكزوتيكالىق قاربىزدار دا بار. قارا ءتۇستى «قاراپاتشايىم» قاربىزى, «كاريستان» جانە جاڭا «بومبا» سورتتارى بار. شۆەيتساريالىق سەلەكتسيا ادىستەرىمەن وسىرىلگەن «توپ گون», «ورانج كينگ», «چەرنىي پرينتستى» وتە ءدامدى.
جەرگىلىكتى جۇرت «قاراپاتشايىم» مەن «چەرنىي پرينتستى» ىزدەيتىنى دە سودان. لەبياجىدە قاربىزدىڭ بۇلاي ءوسۋ سەبەبى-جەرى تۇزدى دەيدى عالىمدار. اۋداندا 10 شارۋا قوجالىعى قاربىز وسىرۋدە. قايراتتىڭ شارۋا قوجالىعى جىل سايىن 250- تسەنتنەرگە دەيىن ءونىم جينايدى.
فاريدا بىقاي
«ەگەمەن قازاقستان»
پاۆلودار وبلىسى,
لەبياجى اۋدانى
سۋرەتتەردى تۇسىرگەن - ۆلاديمير بۋگاەۆ
