بيىل شىمكەنت قالاسىندا 20 الەۋمەتتىك نىساننىڭ قۇرىلىسى ءجۇرىپ جاتىر. ونىڭ ىشىندە 15 مەكتەپ, 2 سپورت, 2 مادەنيەت, 1 اباتتاندىرۋ نىساندارى بار. اتالعان 20 نىساننىڭ 11-ءى جىل سوڭىنا دەيىن ەل يگىلىگىنە تاپسىرىلاتىن بولادى. ال قالعان 9 نىساننىڭ قۇرىلىسى 2018 جىلعا وتپەلى.
بۇدان بولەك, قالادا جالپى اۋماعى 151 مىڭ 228 شارشى مەتردى قۇرايتىن 42 تۇرعىن ءۇيدىڭ قۇرىلىسى جۇرگىزىلۋدە. ونىڭ 26-سى كوممۋنالدىق, 16-سى كرەديتتىك تۇرعىن ءۇي سانالادى. سونىڭ 30 تۇرعىن ءۇيى جىل سوڭىنا دەيىن پايدالانۋعا بەرىلۋى ءتيىس. قالعان 16 ءۇيدىڭ ءبىتۋ كەزەڭى 2018 جىلعا وتپەلى.
«بيىلعى جىلى شىمكەنت قالاسىندا 10 ينجەنەرلىك ينفراقۇرىلىم نىسانىنىڭ قۇرىلىسى جالعاسۋدا. بۇگىنگى كۇنگە 2 نىسان پايدالانۋعا بەرىلسە, جىل سوڭىنا دەيىن 1 نىساننىڭ قۇرىلىسى اياقتالادى دەپ كۇتىلۋدە. ال قالعان 7 نىساننىڭ قۇرىلىسى 2018 جىلى پايدالانۋعا بەرىلەتىن بولادى» , - دەدى شىمكەنت قالاسى اكىمىنىڭ ورىنباسارى نۇرالحان كوشەروۆ.
مۇنان بولەك «نۇرلى جەر» باعدارلاماسى اياسىندا جالپى 107 نىسانعا جوبالاۋ-سمەتالىق قۇجاتتامالارىن ازىرلەۋ جۇمىستارى جۇرگىزىلۋدە.
2017 جىلى شىمكەنت قالاسىنىڭ ينفراقۇرلىمىن دامىتۋ ماقساتىندا 14,5 ملرد تەڭگە قارجى ءبولىنىپ, 2016 جىلى قۇرىلىسى باستالعان 9 نىساندى اياقتاۋعا 1,6 ملرد تەڭگە جۇمسالماق. 83 كوشە ورتاشا جوندەۋ جانە 12 اياقجول سالۋ جۇمىستارىنا 970,8 ملن باعىتتالعان. ەڭ ماڭىزدىسى – قالاداعى 4 جولايرىقتاردىڭ قۇرىلىسىنا جوبالىق سمەتالىق قۇجاتتار ازىرلەنۋدە. دەسەك تە, شىمكەنت قالاسىنداعى 19 نىساننىڭ قۇرىلىسى سوزىلىپ, مەرزىمىندە اياقتالماي, پايدالانۋعا تاپسىرۋ مەرزىمى كەشىگۋى انىقتالىپ وتىر. 19 نىساننىڭ 13 نىسانى 2015-2016 جىلداردان وتپەلى بولسا, 6 نىسانى 2017 جىلى باستالعان. بۇعان سەبەپ وتە كوپ. كوبىندە جوبالاۋ-سمەتالىق قۇجاتتامالار دايىنداۋ ءۇردىسى كەشەۋىلدەپ, مەملەكەت مۇقتاجىنا قايتارىلاتىن جەر تەلىمدەرىنىڭ مەرزىمىنىڭ سوزىلۋى قولبايلاۋ بولىپ وتىر.
«قۇرىلىستىڭ كەشەۋىلدەۋىنە كەدەرگىلەر وتە كوپ. سونىڭ ءبىرى – جابالاۋ-سمەتالىق قۇجاتتاما ازىرلەۋ ءۇردىسى. بۇل قۇجاتتى ازىرلەۋگە 4 اي ۋاقىت كەتەدى. سوندىقتان شەتەلدىك تاجىريبەنى پايدالانىپ, ازىرلەۋ جۇمىستارىن زاماناۋيلاندىرۋ قاجەت. وسى رەتتە مەن تۇركيالىق ارىپتەستەردىڭ تاجىريبەسىن پايدالانۋدى جانە وزىمىزدە قولدانىسقا ەنگىزۋدى تاپسىرامىن. ءتىپتى قاجەت بولسا, سەمينار-ترەنينگتەر وتكىزىپ, قۇرىلىسقا جاۋاپتى مەردىگەرلەردىڭ دە جاۋاپكەرشىلىگىن ارتتىرۋعا ءتيىسپىز», - دەدى جانسەيىت قانسەيىت ۇلى.
جيىن بارىسىندا قالامىزداعى قوناەۆ داڭعىلىن باتىس باعىتىنا قاراي دامىتۋ ءارى اسپالى كوپىرلەر مەن جولايرىقتاردىڭ ساپالى ءارى ءتيىمدى بولۋى تاپسىرىلدى.
