– قازىر اۋدان ورتالىعىندا ءبىر مىڭ ادام ءۇي الۋ كەزەگىندە تۇر. ەلباسىنىڭ سارابدال ساياساتىمەن قابىلدانعان «نۇرلى جول», «نۇرلى جەر», باسقا دا باعدارلامالار ەڭ الدىمەن قاراپايىم حالىقتىڭ الەۋمەتتىك ماسەلەلەرىن شەشۋگە ارنالعانى بەلگىلى. تاعى ءبىر 60 پاتەرلى بەس قاباتتى ءۇيدىڭ قۇرىلىسىن سالۋ جونىندەگى قۇجاتتار بويىنشا جۇمىستار اتقارىلىپ جاتىر. بورودينو اۋىلىندا دا ەكى پاتەرلى بەس ءۇيدىڭ قۇرىلىسى باستالدى. ەكى قۇرىلىسپەن دە تانىساسىزدار, – دەدى اۋدان اكىمى نۇرجان توقسەيىتوۆ.
60 پاتەرلى ءۇيدىڭ قۇرىلىسى ماۋسىمدا باستالدى. ماتەريالداردىڭ بارلىعى وسى وڭىردەن. كىرپىشتى وسكەمەننەن, تسەمەنتتى ىرگەدەگى بۇقتىرمادان الۋدا. دەمەك, ماتەريالدار باعاسى قولجەتىمدى. مۇندا 40 پاتەر – ەكى, 20 پاتەر ءۇش بولمەلى. كەلەسى جىلدىڭ سوڭىنا تامان عيمارات پايدالانۋعا بەرىلمەك.
سالىنىپ جاتقان عيمارات قالانىڭ 10-شى شاعىن اۋدانىنا قارايدى. سوندىقتان بولسا كەرەك, بۇل جەردە نىسانداردى سۋمەن, جىلۋمەن قامتاماسىز ەتەتىن قۇبىردى «التىنسترويپروەكت» سەرىكتەستىگى سالىپ جاتىر. ماڭىزدى قۇرىلىستىڭ قۇنى 618 ميلليون تەڭگە, وتكەن جىلدىڭ قاراشاسىندا قۇرىلىسى باستالعان كەشەن كەلەر جىلدىڭ قىركۇيەگىندە ىسكە قوسىلۋى ءتيىس. اۋداندىق ارحيتەكتۋرا جانە قۇرىلىس ءبولىمىنىڭ باسشىسى ە.قاناپيەۆ قالانىڭ وركەندەۋىنە ىقپال ەتەتىن ۇزىندىعى 6,3 شاقىرىم قۇبىردىڭ ساپالى سالىناتىنىنا كامىل سەنەدى. ال اۋداندىق جىلۋ قازاندىعىنىڭ قۇرىلىسىنا «نۇرلى جەر» باعدارلاماسى بويىنشا 1 ميلليارد 433,1 ميلليون تەڭگە ءبولىنىپ, نىسان جىل سوڭىندا پايدالانۋعا بەرىلمەك.
اۋدان باسشىلىعى ءوڭىردىڭ الەۋەتى ارتۋى ءۇشىن كۇش سالۋدا. سونىڭ ءبىر دالەلى, «نۇرلى جەر» باعدارلاماسى بويىنشا لومونوسوۆ جانە شاحتاقۇرىلىس كوشەلەرىنە اسفالت توسەۋ ءۇشىن قىرۋار قارجى كوزىن تاۋىپتى. جاڭا باعدارلامانىڭ بەرەرى كوپ, ەڭ الدىمەن جىلدار بويى ءۇي الۋ كەزەگىندە تۇرعان ازاماتتاردىڭ پروبلەماسىن شەشەدى. ونىڭ ۇستىنە جەكەمەنشىك ءۇي سالۋعا تىلەك بىلدىرگەندەردىڭ ءوتىنىشى قابىلدانىپ جاتىر. قالاي دەگەندە دە, ءوندىرىسى وركەندەگەن كەنشىلەر قالاسىنىڭ كەلبەتى كوز تارتادى. ەلىمىزدەگى جاڭا باعدارلامالاردان قاراپايىم حالىق ءۇمىت كۇتەدى. ء«ۇي بولسا, كۇي بولادى» دەگەن ماقالدىڭ ومىرشەڭدىگى سوعان دالەل بولسا كەرەك.
وڭداسىن ەلۋباي,
جۋرناليست
شىعىس قازاقستان وبلىسى,
زىريان اۋدانى
سۋرەتتى تۇسىرگەن اۆتور
