بۇگىندە ەلىمىز ءوزىنىڭ اسكەري الەۋەتىن, قورعانىس قابىلەتىن دۇنيەگە تانىتتى. وسى ماقساتتا قورداي اۋدانىنىڭ «وتار» 40-شى اسكەري بازاسىندا حالىقارالىق ارميالىق ويىنداردىڭ اشىلۋ سالتاناتى ءوتتى. اتالعان شاراعا قازاقستان رەسپۋبليكاسىنىڭ قورعانىس ءمينيسترى, گەنەرال-پولكوۆنيك ساكەن جاسۇزاقوۆ ارنايى كەلىپ قاتىستى. «ارميالىق حالىقارالىق ويىنداردى وتكىزۋ شىنايى جاۋىنگەرلىك باۋىرلاستىق پەن ادامي دوستىقتىڭ نەگىزى بولىپ تابىلادى جانە ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى تاراپىنان لايىقتى قولداۋ تاۋىپ كەلەدى. ارميالىق ويىندار كولەمدى الەمدىك سپورتتىق بىرىنشىلىكتەردەن ەش ايىرماسى جوق حالىقارالىق اۋقىمداعى ءىرى ءىس-شارا. ءبىز ءۇشىن ونى ەڭ جوعارى دەڭگەيدە قازاقستاندا وتكىزۋ ۇلكەن ابىروي», دەدى مينيستر ءوز سوزىندە.
سالتاناتتى شارادا قازاقستاندىق بارابانشىلار مەن دومبىراشىلاردىڭ سۇيەمەلدەۋىمەن قازاقستان رەسپۋبليكاسى قورعانىس مينيسترلىگىنىڭ اسكەري وركەسترى ونەر كورسەتتى. سونىمەن قاتار, «ارلان» بروندى-دوڭگەلەكتى ماشينالارىنىڭ, «ت-72 ب» تانكتەرىنىڭ, جالپى قازىرگى زامانعى جاۋىنگەرلىك تەحنيكالاردىڭ دا كورسەتىلىمى بولدى. سونداي-اق, كوپشىلىك نازارىنا دەسانتشىلار روتاسىنىڭ ورىنداۋىندا قارۋمەن قول جەكپە-جەگى ۇرىسىنىڭ كورسەتىلىمى ۇسىنىلدى. ەلىمىزدىڭ اسكەرىنىڭ جاۋىنگەرلىك ۇشاقتارى مەن تىكۇشاقتارى پيلوتاجدىق توبىنىڭ اۋە شوۋى ارميالىق ويىنداردىڭ اشىلۋىنىڭ شارىقتاۋ شەگى بولدى. ارميالىق حالىقارالىق ويىندار شەڭبەرىندەگى «ارتيللەريالىق اتىس شەبەرى», «مەرگەندىك شەبى» جانە «ۇشقىشسىز ۇشۋ اپپاراتتارى ەسەپتوپتارىنىڭ جارىسى» بايقاۋلارى قازاقستاندا 1-9 تامىز ارالىعىندا وتەتىن بولادى. جارىستارعا قاتىسۋ ءۇشىن ەلىمىزگە الەمنىڭ 18 ەلىنەن 400-گە جۋىق اسكەري قىزمەتشى كەلدى. اسكەري قىزمەتشىلەر 28 كوماندانىڭ قۇرامىندا ونەر كورسەتەتىن بولادى.
حاميت ەسامان,
«ەگەمەن قازاقستان»
جامبىل وبلىسى
