اۋىل اكىمى اسقار ەسقاليەۆتىڭ ايتۋىنشا, ءورت 29 شىلدە كۇنى كورشىلەس جاڭاقالا اۋدانىندا باستالىپ, سودان وكرۋگ اۋماعىنا اۋىسقان. 30 شىلدە كۇنگى تاڭعى 03.00-دەردە سوندىرىلگەنىمەن, سول كۇنى قايتا تۇتانىپ كەتكەن. «بارلىعى 16 اۋلادان قوزى-لاعىن, ءبارىن ەسەپتەگەندە, 598 ۋاق جاندىق شىعىنعا ۇشىراعان. قازىرگى كەزدە ارنايى جۇمىس توبى قۇرىلىپ, ماتەريالدىق وتەماقى تولەۋدىڭ جولدارى قاراستىرىلۋدا. سونىمەن قاتار سول ۇيلەرگە كومەك رەتىندە 60-70-تەي مال جينالدى. ال ورتتەن دەنەسىن 70 پايىزداي كۇيىك شالعان 1990 جىلعى جىگىت جالپاقتال اۋرۋحاناسىنان ساناۆياتسيامەن ورال قالاسىنا جەتكىزىلدى. ورتكە بايلانىستى وبلىستىڭ ءۇش اۋدانىندا توتەنشە جاعداي جاريالانسا, سونىڭ ءبىرى - قازتالوۆ», دەدى ا.ەسقاليەۆ.
اقجايىق اۋدانىنىڭ اكىمى ءادىل جولامانوۆتىڭ سوزىنە قاراعاندا, قازىر توتەنشە جاعداي جاريالانعان اۋداننىڭ بارلىق جەرىندە ءورت سوندىرىلگەن, جاعداي قالىپتى دەۋگە بولادى. بازارتوبە اۋىلدىق وكرۋگىندە 40 مىڭ گەكتارداي شابىندىق جانە جايىلىمدىق جەر كۇلگە اينالدى. بازارشولان اۋىلىندا دا وسىنداي جەردىڭ تەڭ جارتىسىنان استامى وتقا وراندى. تومپاق ەلدى مەكەنى ماڭىنداعى ورماندى دا ءورت شالىپ, اۋىزدىقتالدى. ايتەۋىر مال-جان امان. كۇنى بۇگىن ورتتەن كەلگەن شىعىن ەسەپتەلىپ, مالدى قاي جەرگە جايۋ, مال ازىعىن قايدان الۋ ماسەلەسى شەشىلۋدە. شابدارجاپ, حاركين اۋىلدارىندا ەلەكتر بايلانىسى قالپىنا كەلتىرىلدى. بازارشولان اۋىلدىق وكرۋگىنە قاراستى جامانقۇدىق ەلدى مەكەنىنە دە ەلەكتر جەلىسى تارتىلادى.
بوكەي ورداسى اۋدانى اكىمىنىڭ ورىنباسارى رۇستەم زۇلقاشەۆتىڭ ءمالىم ەتكەنىندەي, توتەنشە جاعداي سايقىن اۋىلدىق وكرۋگىندە جاريالاندى. مۇندا ءورتتىڭ سالدارىنان وردا اۋىلدىق وكرۋگىندەگى نۇرتاي احمەتوۆتىڭ شارۋا قوجالىعىنان (جەرى سايقىن اۋىلدىق وكرۋگىندە) 25 ءىرى قارا جانىپ كەتتى. سونداي-اق 250 وراما, 1,5 مىڭ تايلاپ بۋىلعان ءشوپ ورتەندى. مالعا ماتەريالدىق وتەماقى تولەۋ ءۇشىن ءتيىستى قۇجاتتار جيناقتالىپ, كوميسسياعا جولداناتىن بولادى.
«بيىل 8 مىڭ گەكتارداي اۋماقتى قامتىعان 17 ءورت رەسمي تىركەلدى. سونىڭ باسىم كوپشىلىگى اسكەري پوليگون جاعىنان (راكەتا قالدىقتارىنىڭ تۇسۋىنە بايلانىستى ءورتتىڭ تۇتانۋىنان) كەلۋدە. ويتكەنى ءشوپ قالىڭ, جەل كۇشتى. كۇنى بۇگىن مۇراتساي اۋىلدىق وكرۋگىندە مايعارا, مازىلبەك, بيسەننىڭ پايدا, ايباس قىستاقتارى ماڭىندا ءورت بولىپ جاتىر. ءورت سوندىرۋشىلەر سوندا ءجۇر», دەدى ر.زۇلقاشەۆ.
بيىلعى جىل باسىنان بەرى وبلىس اۋماعىندا 50,3 گەكتاردى قامتىعان 2 ورمان ءورتى, 19530 گەكتاردى شارپىعان 208 جانۋ وقيعاسى تىركەلدى. وتكەن جىلى وسى مەرزىمدە 1769 گەكتار جەردە 90 جانۋ دەرەگى تىركەلگەن بولاتىن, ياعني بيىل ءورت ەكى ەسەدەن استامعا كوبەيىپ كەتىپ وتىر.
ەسكە سالا كەتەيىك, 30 شىلدە كۇنى تالدىاپان اۋىلدىق وكرۋگىندە بولعان ورتتەن باستاپقىدا 200-دەي قوي-ەشكى جانىپ كەتتى دەپ حابارلانعان بولاتىن.
