الماتى – تالعار جولىندا ءىلبىپ كەلەمىز. كەپتەلىس. قارسى باعىت بوس. ارا-تۇرا ءبىر كولىك وتەدى. بۇل – الدا ءبىر جاعداي بولدى دەگەن ءسوز. ەكى باعىت تا – ءبىز بەرگى, ولار ارعى جاقتا – ءبىر شىرعالاڭنىڭ سالدارىنان توقتاپ تۇرعانىمىز انىق. ارتقى جاقتا قالعان جۇرگىزۋشىلەردىڭ شىدامسىزداۋلارى ەندى قارسى باعىتتى تولتىرا باستادى. وڭ جاق قاپتالىمىز سىرەسىپ تۇر. ءسويتىپ, ەكى جولاقتى جولدىڭ قوس باعىتىندا ءتورت, كەي جەرلەردە بەس قاتار تىزبەك پايدا بولدى. كوپ وتپەي جاياۋ جۇرگىنشىلەر قاپتادى. ولارعا جەڭىل, تۇسەدى دە جۇرە بەرەدى. ال, كولىك جۇرگىزۋشىلەرى ولاي ەتە المايدى. قانشا ۋاقىت بولسا دا وسىلاي كىدىرۋگە ءماجبۇر. كەنەت الدەكىم كولىگىن جول شەتىنە شىعارىپ, ەسىگىن ق ۇلىپتادى دا, جۇگىرە جونەلدى...
ادەتتە قالىڭ كەپتەلىستىڭ وزىندە اسسا ءبىر ساعات جۇرەتىن 20 شاقىرىمدىق جولدى 3 ساعاتتان اسا ءجۇرىپ, ۇيگە جەتتىك-اۋ. جول-جونەكەي كوزىمىزدىڭ جەتكەنى, قىزىل قايرات اۋىلىندا, ۇلكەن جولدىڭ بويىندا ورنالاسقان بالاباقشانىڭ اينالاسىنداعى شۇبىرعان حالىق, قاپتاعان كولىك – ءورت سوندىرۋشىلەر, جەدەل جاردەم قىزمەتى, پوليتسيا... بالاباقشانىڭ اۋماعىن لەنتامەن تارتىپ تاستاپتى. تۇسىمىزدا ۇيالى تەلەفونىمەن بار جاعدايدى ءتۇسىرىپ تۇرعان 15-16-داعى وقۋشىدان نە بولعانىن سۇرادىق. جاۋابى ءسۇيىنشى سۇراعانداي سەرگەك ەستىلدى:
– مىنا جەرگە بومبا قويىلعان!
ءبىر قىزىقتىڭ بولارىن كۇتكەن نەمەسە دەگبىرى قاشقان ادامنىڭ داۋسى وسىلاي شىعاتىن.
الماتىداعى ءبىر ءوزى بىرنەشە ادامدى جايراتىپ سالعان قىلمىسكەر جايلى ايگىلى وقيعانىڭ ءدۇمپۋى ءالى باسىلا قويماعان, تىكسىنىپ قالدىق. «بومبا قويىلعان» دەگەن ءسوز – توبەڭنەن جاي تۇسكەندەي اسەر ەتەرى تۇسىنىكتى, بىراق ءبىزدى تىكسىندىرگەن ول ەمەس بولاتىن. ءا دەگەندە الەمنىڭ ءار تۇكپىرىندە كۇن قۇرعاتپاي بولىپ جاتاتىن تەررورلىق جارىلىستار بىزگە دە جەتكەن بە دەگەنگە ۇقساس ءبىر كەپ ساناعا ۇيالايدى ەكەن. ونىڭ ۇستىنە, باسقا ەمەس, بالاباقشا. ادەتتە بالالاردىڭ جىپ-جىلى ۇياسىنداي, ەڭ الاڭسىز, ەڭ قاۋىپسىز سەزىلەتىن ءۇيدى جاۋ شاپقانداي, انە-مىنە ك ۇلى كوككە ۇشارداي, قورقىنىشتى لەپ ەسەدى. بالاباقشا سونشالىق قورعانسىز, سونشاما ايانىشتى كۇيگە ءتۇسىپتى. «بومبا قويىلعان» دەگەن سۇپ-سۋىق سوزدەن كەيىن بازارى تارقاپ, قۇتى قاشقان كەيىپتە, ءۇرپيىپ قالىپتى.
كەيىن بىلدىك, بۇل شىرعالاڭ تۇستە باستالىپتى. الدەكىم تالعار اۋدانى, قىزىل قايرات اۋىلىنداعى بالاباقشاعا بومبا قويىلعانى تۋرالى قوڭىراۋ شالعان. اۋىلدا ءۇش بالاباقشا بار, قايسىسى ەكەنىن دە ناقتى ايتپاعان. جەدەل ارەكەت ەتۋ توبى مەن قۇتقارۋشىلارعا ءبىر ساتتە ءۇش ءتۇرلى باعىتتا جۇمىس ىستەۋگە تۋرا كەلگەن. ارادا ءتورت ساعات وتكەندە بارىپ, قوڭىراۋدىڭ جالعان ەكەنى بەلگىلى بولعان. ۇرەيمەن, كۇدىكپەن, ساپىرىلىسپەن وتكەن ءتورت ساعات – سىرتتاي قاراعاندا قىسقا عانا ۋاقىت بولعانمەن, سونىڭ تىكەلەي كۋاگەرلەرى مەن باسى-قاسىندا جۇرگەندەر ءۇشىن ۇستارانىڭ جۇزىندە وتكەن ءبىتىپ بولماس ازاپ قوي. مۇندايدا ۋاقىت توقتاپ قالعانداي بولادى. بۇرىنىراقتا سۇحباتتاس بولعان ءورت ءسوندىرۋشى ءومىرى قىل ۇستىندە جۇرەتىن ارىپتەستەرىنىڭ ايەلدەرىنە ارنالعان ءبىر ءسوز بار دەپ ەدى: «سەن ونى جۇمىسىنا بارىنشا قۇرمەتتەپ شىعارىپ سال. سوڭعى رەت كورىپ تۇرۋىڭ مۇمكىن». ءورت ءسوندىرۋشىنىڭ ءوزى مۇنداي بولعاندا, جارىلعىش زاتتى انىقتايتىن ساپەرلەردىڭ تاعدىرىن ويلاۋ مۇلدە قورقىنىشتى. ءتورت ساعات ىشىندە ولار نە ويلادى ەكەن... ءبىز ادەتتە «وسىنشا ادام ەۆاكۋاتسيالاندى, قاۋىپسىز جەرگە كوشىرىلدى» دەپ اقپارات رەتىندە وڭاي ايتا سالامىز.
ءبىز سايتىمىزعا رەيتينگ جيناۋ ءۇشىن جانتالاسا جازىپ جاتقاندا, ىشتەگىلەردىڭ قانشا شاشى اعاردى ەكەن...
جول ورتاعا كولىگىن تاستاي جۇگىرگەن الگى جىگىتتىڭ قانداي شارۋاسى بولدى ەكەن...
بۇكىل ەلدى دۇرلىكتىرگەن بۇل وقيعانىڭ سەبەبى – بولماشى باس ارازدىعى كورىنەدى. العاشىندا تۇك بولماعانداي, بالالاردى قاۋىپسىز جەرگە كوشىرۋگە كومەكتەسىپ جۇرگەن گەسىمدى ايەل, ءتىپتى, تەلەارنالاردىڭ بىرىنە سۇحبات بەرىپتى. بالاباقشامەن جاپسارلاس تۇراتىن كورشى عيماراتتىڭ يەسىمەن الدەنەگە كەلىسپەي قالعان, سودان كەك الۋعا بەكىنگەن كەلىنشەك ارادا ەكى ساعات وتەر-وتپەستە قىلمىسىنىڭ اشكەرە بولاتىنىن ويلادى دەيمىسىز. سويتسە, قازىر تەحنيكا ابدەن دامىعان, جالعان قوڭىراۋ شالۋشىنى انىقتاۋ اناۋ ايتقانداي قيىن شارۋا ەمەس ەكەن. وسى ۋاقىتقا دەيىن بولعان جاعدايلاردى جالپىلاما شولىپ شىققاندا كوزىمىزدىڭ جەتكەنى – سونىڭ بىردە-ءبىرى اشىلماي قالماپتى. ءتىپتى بۇل تاراپتا اسا قيىندىق تا تۋمايتىن سەكىلدى. قوڭىراۋ شالۋشىنىڭ يەسىن انىقتاۋعا كەتكەن ەڭ ۇزاق ۋاقىت – ءبىر جۇمىس اۋىسىمىنان اسپاپتى. انا ءبىر جىلى قىزىلوردادا جاتىپ الىپ, الماتىنىڭ مەتروسىن «بومبالاعان» ازىلقوي دا قوڭىراۋىنان كەيىن كوپ وتپەي ۇيىنە قىزىل جاعالىلاردىڭ كىرىپ كەلەتىنىن بولجاپ تا ۇلگەرمەگەن. ءسىرا, قىلمىسكەردى الماتىدان ىزدەيدى دەپ ويلاعان بولسا كەرەك.
وسىدان ءبىراز بۇرىن الدەبىر قىلمىسقا قاتىسى بولىپ (كەيىن كىناسىزدىگى انىقتالىپ, اقتالىپ شىقتى), تەرگەۋگە تۇسكەندە, ءتارتىپ ساقشىلارى ۇيالى تەلەفونىنداعى سوڭعى اڭگىمەلەردىڭ جازباشا نۇسقاسىن الدىنا تارتقانىن ايتىپ, «بۇلارعا ءبىزدىڭ ءار باسقان قادامىمىزدى انىقتاۋ تۇك ەمەس ەكەن عوي», دەپ ءتۇڭىلىپ شىعىپ ەدى. وعان دەيىن ەستىپ جۇرسەك تە, اسا ءمان بەرمەگەن كەپ ەكەن, الگىنىڭ اڭگىمەسىنەن كەيىن عانا, شىنداپ ويلانا باستادىق. قازاق «كەرەگەدە دە قۇلاق بار» دەۋشى مە ەدى؟ ال, ءبىز, سپۋتنيك داۋىرىندە, قاپتاعان تەحنيكانىڭ ورتاسىندا وتىرىپ, ءىز كەسۋشىلەردەن قۋلىق اسىرعىمىز كەلەدى. الدىڭداعى كومپيۋتەر ەكرانىنىڭ, ۇيىڭدەگى تەلەۆيزوردىڭ دا كوزى بار دەيدى دەرەكتەر. ال, ءبىز سول كوز بەن قۇلاقتىڭ نەگىزگى قۇرالى سانالاتىن ۇيالى تەلەفوندى ۇستاپ وتىرىپ, قىلمىس جاسايمىز.
كۇشتىنى جىعاتىن باسقا كۇشتىنىڭ ايتەۋىر ءبىر شىعاتىنى سەكىلدى, تەحنيكادان اساتىن وزگە ءبىر تەحنيكانىڭ ويلاپ تابىلعانى جايلى كۇن سايىن ايتىلىپ جاتادى. ءبىزدىڭ سونى بىلمەيتىندىگىمىز, بىلسەك تە ونشا سەنىڭكىرەمەيتىنىمىز عوي, قوڭىراۋ شالعاندا تەلەفونداعى گادجەتتىك باعدارلامالار ارقىلى داۋ-سىمىزدى وزگەرتىپ, «قۋلىق اسىراتىنىمىز». جاتاقحانادا ەرىگىپ جاتىپ, الدەبىر «شىتىرمانعا» اڭسارى اۋىپ, «ەر ادامنىڭ» داۋسىمەن ۆاحتاعا قوڭىراۋ شالعان قىز جايلى ەستىگەن بولارسىز؟ گادجەتتىك باعدارلاما دەگەنىڭىز قۇربى-قۇرداسىڭمەن ازىلدەسكەنگە, ءوزىڭ سياقتى «اڭقاۋ» بىرەۋلەردى الداۋعا, ويىن ءۇشىن ويلاپ تابىلعان جەڭىل-جەلپى نارسە ەمەس پە؟! ال, ءبىز سونىڭ كومەگىمەن ءىز جاسىر-عىمىز كەلەدى.
مۇنىڭ ءبارى تەحنيكالىق مۇمكىندىك جايلى تۇسىنىكتىڭ تايازدىعىنان. راس, زاڭنان, ونىڭ جازاسىنان قورقامىز, بىراق, قىلمىس جاساۋ تۋرالى ويىمىز تىم شەكتەۋلى. ءبىزدىڭ قىلمىس جايلى ۇعىمىمىز كوبىنە كىسى ءولتىرۋ مەن ۇرلىق جاساۋدىڭ توڭىرەگىنەن ۇزامايتىن بولسا كەرەك. راس, كىسى ءولتىرۋدىڭ جانىندا جالعان قوڭىراۋ اناۋ ايتقانداي قاتىگەزدىك بولماۋى مۇمكىن, بىراق, ساپىرىلىسقان, سابىلىسقان, قىم-قۋىتتىڭ ىشىندە بىرەۋ ءسۇرىنىپ كەتىپ, ەندى بىرەۋ ساسقالاقتاپ ءجۇرىپ قادامىن شالىس باسىپ, مەرت بولۋى مۇمكىن عوي. ولاي بولماعان كۇندە دە, «ۇرلىقتىڭ ۇلكەنى – وزگەنىڭ ۋاقىتىن ۇرلاۋ» دەگەن بار, قانشاما ادامدى شارۋاسىنان قالدىردىڭىز. توتەنشە جاعدايلار مەن جەدەل جاردەم ماقۇل, مىندەتتەرىن قالاي دا اتقارادى. ءىس-قيمىلعا كەتكەن شىعىن دا ەشتەڭە ەمەس, ورنىنا كەلەدى. بۇل تاراپتا توتەنشە جاعدايلار قىزمەتى ءجيى ايتاتىن, بولۋى مۇمكىن جاعداي مىناۋ: ءسىزدىڭ وتىرىگىڭىزبەن اۋرەگە ءتۇسىپ جۇرگەندە, وزگە جاقتا قاتەر ۇستىندەگى شىن مۇقتاج بىرەۋلەرگە كومەك كەشىگىپ جەتۋى مۇمكىن. بۇدان وزگە دە ءتۇبىن قازساڭ ءبىر-بىرىمەن بايلانىسىپ كەتە بەرەتىن قانشاما «مۇمكىن جاعدايدى» ىندەتە بەرۋگە بولادى. ماسەلەن, الگى جول ۇستىندە قانشاما تاعدىر, قانشاما پروبلەما كەتىپ بارا جاتتى ەكەن...
كولىگىن تاستاي جۇگىرگەن جىگىت كوز الدىمنان كەتپەيدى...
دەرەكتەرگە سۇيەنسەك, جالعان قوڭىراۋ شالۋشىلاردىڭ دەنى بۇل قادامعا ەرىگىپ, ويناپ باراتىن كورىنەدى. جۇمىس كۇنىن قىسقارتۋ ءۇشىن ءوزى قىزمەت ىستەيتىن عيماراتقا بومبا قويىلعانى جايلى اقپار بەرىپ, ۇيىنە تايىپ تۇرۋدى ويلاعان جاس جىگىت تۋرالى ەستىگەندە, شىن تاڭداندىق. بالا كۇنىمىزدە, باستاۋىش مەكتەپتە مۇعالىمىمىز اۋىرىپ قالسا, ساباق بولمايدى دەپ قۋانۋشى ەدىك, كەيىن ەس كىرە باستاعاندا-اق اپەندەلىگىمىزگە كۇلە وتىرىپ اڭگىمە قىلاتىنبىز. ال, بۇل سويتالداي جىگىت. ۇيىنە ەرتە قايتقىسى كەلەدى!
مۇنىڭ ءبارى ەركەلىكتەن تۋاتىن, ءىشى پىسقانداردىڭ, ءىشىپ العانداردىڭ, اقىلى كەمشىندەۋلەردىڭ, ءتىپتى, «وسى راس پا ءوزى؟» دەپ تەكسەرىپ كورگىسى كەلگەندەردىڭ ارەكەتى كورىنەدى. بۇل تىزىمدە كىم جوق دەيسىز: مەكتەپكە كەشىگىپ بارا جاتىپ, جەدەل جاردەم شاقىرعان وقۋشى, ماحابباتتا جولى بولماعان جىگىت, مىسىعى اۋىرىپ قالعان, بالاسى ساباق وقىماي قويعاندا, ينە سالدىرام دەپ قورقىتۋ ءۇشىن اق حالاتتىلاردى اۋرەگە سالعان... وسىلاي كەتە بەرەدى. ءبىر قىزىعى, جەدەل جاردەم مەن قۇتقارۋ قىزمەتىنە شالىنعان قوڭىراۋ يەلەرىنە ەشقانداي جازا جوق. بۇل قىزمەتتەگىلەر ەلدىڭ ەركەلىگىن ءۇنسىز كوتەرۋگە ءماجبۇر. ءتىپتى, بولعانعا دا, بولماعانعا دا جەدەل جاردەمدى شاقىرا بەرەتىن, دارىگەرلەردىڭ «جاقىن تانىسىنا» اينالعان ادامدار بار. كۇن سايىن ءبىر اۋرۋ ويلاپ تابادى, الدەبىر پروبلەماسىن ايتىپ شاعىنادى. مۇندايلار كوبىنە, جالعىز باس-تى, قاراۋسىز قالعان قارتتار تاراپىنان بولاتىن جاعداي. جەكە ادامدارعا دەگەن رەنىشى مەن وكپە-ىزاسى قوعامعا, بۇكىل ەلگە دەگەن جەككورىنىشكە ۇلاسقان. پسيحولوگتاردىڭ جۇمىسى كەرەك-اق.
مۇنداي قوڭىراۋلاردان, بالكىم, ەندى قولعا الىنىپ جاتقان مەديتسينالىق ساقتاندىرۋ ءپوليسى جولعا قويىلعاسىن قۇتىلاتىن شىعارمىز دەيدى ماماندار. ويتكەنى, كوپ ەلدەردە جەدەل جاردەم اقىلى قىزمەت كورسەتەدى. ءسىرا, اسا قىمبات بولماسا دا, اقىلى بولعانى ءجون شىعار. ويتكەنى, اقشا تولەيسىڭ دەسە ازار دا بەزەر بولاتىن كوپ اعايىندى تەلەفونىن قولىنا الاردا دەنساۋلىعى تۋرالى تاعى ءبىر ويلانىپ الۋعا ماجبۇرلەر...
ال, «بومبا قويۋعا» بولمايدى. ونىڭ زاڭى قاتال. الەم تەرروريستەردەن زارەزاپ بولىپ وتىرعان ۋاقىت, جازا بۇرىنعىدان دا كۇشەيگەن. جالعان قوڭىراۋ شالۋشىلاردىڭ قىلمىسى تەكسەرىلگەندە قاساقانا جاسادى ما, الدە قاتەلەستى مە دەگەن ماسەلە ارنايى تەكسەرىلەدى. قاساقاناسى تۇسىنىكتى, ال, قاتەلىك – بۋدى ورتپەن شاتاستىرۋ, الدەبىر جايتتى كۇدىكتى دەپ تانۋ سياقتى جاعدايلاردان تۋىندايدى. ارينە, مۇندايدا اقتىعى دالەلدەنسە, كەشىرىم جاسالادى. سول سەبەپتى الگىندەي جاعدايلار بولماۋى ءۇشىن زاڭ قىزمەتكەرلەرى ەل ىشىنە ءجيى شىعىپ, باق ارقىلى, ينتەرنەت ارقىلى ءتۇسىندىرۋ جۇمىستارىن جۇرگىزىپ تۇرۋى كەرەك. الماتى وبلىستىق پروكۋراتۋراسىنىڭ حابارلاۋىنشا, مامانداردىڭ تاقىرىپتىق دارىستەرى, شاعىن دەرەكتى فيلمدەر مەن روليكتەردى تۇراقتى تۇردە ەلگە ۇسىنىپ وتىرۋ ماڭىزدى نارسە. ويتكەنى, قاساقانا جاسالماسا دا, قاتەلەسۋدىڭ دە زاردابى از بولمايدى. سول سەبەپتى, قۇتقارۋشىلاردى مازالاماس بۇرىن, انىق-قانىعىنا كوز جەتكىزىپ الماق ءلازىم.
ناقتى مالىمەتتەرگە سۇيەنسەك, الماتى وبلىسىندا بيىلعى جارتىجىلدىقتىڭ ەسەبى بويىنشا تەررورلىق اكت تۋرالى جالعان اقپارات بەرۋگە قاتىستى 4 ءىس تىركەلىپ, سوتقا جىبەرىلگەن. سونىڭ ءبىرى ۇيعىر اۋدانىندا بولعان جايت. س ەسىمدى ازامات الماتى قالاسىنداعى №7 اۋرۋحاناعا بومبا قويدىم دەپ قوڭىراۋ شالعان. 600 ناۋقاس, ونىڭ (ىشىندە جانساقتاۋ بولىمىندە جاتقان اۋىر ناۋقاستار دا بار, 1100 اۋرۋحانا قىزمەتكەرى قاۋىپسىز جەرگە شىعارىلعان. الماتى قالالىق ىشكى ىستەر دەپارتامەنتىنىڭ 11 اۆتوتەحنيكاسى مەن 35 قىزمەتكەرى, قالالىق توتەنشە جاعدايلار دەپارتامەنتىنىڭ 4 اۆتوتەحنيكاسى مەن 23 قىزمەتكەرى جۇمىلدىرىلعان وقيعانىڭ سوڭى – س ماس كۇيىندە قوڭىراۋ شالعان دەگەن اكتىمەن بىتەدى. سوت ۇكىمىمەن ماس كۇيدە بولعانى ەسكەرىلسە كەرەك, 2 جىلعا باس بوستاندىعى شەكتەلىپ, شىققان شىعىن تۇگەلدەي وندىرىلگەن. ەسكەرىلسە دەگەنىمىز, 2015 جىلعى وزگەرىس بويىنشا بۇل تاراپتاعى قىلمىسقا سانكتسيا كۇشەيتىلدى. بۇرىن 6 جىل مەرزىممەن بىرگە بالامالى جازالار دا قاراستىرىلسا, سوڭعى زاڭ بويىنشا بالامالى جازالار الىنىپ تاستالعان. ياعني, ءسىزدى ەشقانداي اقشا دا, «اۋرۋ» دا قۇتقارا المايدى.
الماتى وبلىسى بويىنشا بيىلعى جارتى جىلدىقتىڭ دەرەگى بۇل تاراپتاعى قىلمىستىڭ ءوسىپ كەلە جاتقانىن كورسەتەدى. ماسەلەن, 2016 جىلى 2 قىلمىس تىركەلگەن. ال, جارتى جىلدا 4 قىلمىس. الاڭداۋعا تۇرارلىق جاعداي. بيىلعى 6 اي ىشىندە 13 جالعان قوڭىراۋ شالۋ فاكتىسى تىركەلگەن, ونىڭ 9-ى قاساقانا. قاساقانا قىلمىستىڭ 4-ەۋى تەررورلىق ارەكەتكە بايلانىستى بولعاندىقتان سوتقا جىبەرىلگەن. قالعان 5-ەۋى دە جازاسىز قالدى دەۋگە بولمايدى, جوعارىدا ايتقانىمىزداي ورتكە, زورلىق-زومبىلىق سياقتى جايتتارعا قاتىستى جالعان قوڭىراۋدىڭ يەلەرىنە اكىمشىلىك جازا قولدانىلادى.
بالامىزعا دەيىن قىلجاققا اينالدىرارداي (سارىوزەك اۋىلىنان الماتىداعى مەتروعا بومبا قويىلعانى تۋرالى اقپارات بەرىپ, بۇكىل ەلدى دۇرلىكتىرگەن 9 جاسار بالا وقيعاسى ەسىڭىزدە بولار) تەرروريزم سونشالىق ويىنشىق بولماسا كەرەك ەدى. بالانى قويشى, كىنانى زامانعا, اكە-شەشەسىنە جاۋىپ, اقتاپ الۋعا بولادى. سوعىس ويىنىن زىڭگىتتەي ازاماتتاردىڭ ەرمەك قىلاتىنى قيىن. ءبىز, ءسىرا, ءوز باسىمىزدان وتپەگەن جاعدايدى تولىق سەزىنە المايتىن شىعارمىز. ومىردەن, ءبىر-بىرىمىزدەن الىستاپ بارا جاتقانىمىز عوي, الدەبىر كينودان كورگەنىمىزدى شىنايى جاعدايدا بايقاپ كورۋگە كوڭىلىمىز اۋىپ تۇراتىنى.
ءبىزدىڭ دە بالا كەزدەگى ءبىر ەرمەگىمىز سوعىس بولىپتى. كىشكەنە بۇتاقتى قارۋ ورنىنا كەزەنىپ, اتىسىپ وينايتىنبىز. سونىڭ ءوزى ۇلكەندەرگە جاقپاي قالاتىن... «جاماندىق شاقىرما!» دەۋشى ەدى سوندا...
الماس ءنۇسىپ,
«ەگەمەن قازاقستان»
الماتى وبلىسى
كوللاجدى جاساعان
امانگەلدى قياس,
«ەگەمەن قازاقستان»
