اباي ەلىندەگى جارقىن جاڭالىقتار

ەل تاۋەلسىزدىگىنىڭ 20 جىلدىعىنا وراي جەر-جەردىڭ بارىندە اتقارىلىپ جاتقان 20 جارقىن ءىس اياسىندا اباي اۋدانىندا دا كوپتەگەن شارالار جۇزەگە اسىرىلۋدا. ناقتىلاپ ايتساق, وسى مەرزىمدە 150-گە جۋىق يگى ءىس قولعا الىنىپ, 200 ميلليوننان استام تەڭگەنىڭ قارجىسى يگەرىلگەن. اي­تالىق, ءبىر عانا سارجال اۋىلدىق وكرۋگىندە جال­پى قۇنى 36 ميلليوننان استام تەڭگە بو­لاتىن 17 ءىس جۇزەگە اسىرىلىپتى. سونىڭ قا­تارىندا اتال­عان اۋىلدىڭ تۇلەگى, سامبودان سپورت شەبەرى بەرىك قانافين وسىنداعى ورتا مەكتەپتىڭ سپورت زالىن كۇردەلى جوندەۋدەن وتكىزىپ قانا قويماي, ونى سپورت قۇرال جابدىق­تارىمەن قامتاماسىز ەتسە, اۋىلدا پايدالانۋعا بەرىلگەن 400 ورىندىق مادەني دەمالىس ورنى دا وسى ازاماتتىڭ دەمەۋشىلىگىمەن قاتارعا قوسىلعان ەكەن. ال ەسىمى ەلگە بەلگىلى كاسىپكەر, وبلىستىق ءماس­­ليحاتتىڭ دەپۋتاتى, وبلىستىڭ قۇرمەتتى ازا­ماتى عابباس يبراەۆ بولسا اۋدان ورتا­لى­عى قاراۋىل اۋىلىنداعى قۇنانباي قاجى مەشىتىن كۇردەلى جوندەۋ جۇمىسىنا 3 ميلليوننان استام تەڭگە بولگەن كورىنەدى. مۇنداي يگى شارادان كۋرچاتوۆ قالاسىنداعى «دەگەلەڭ­تاس» كاسىپور­نى­نىڭ باسشىسى ۆلاديمير كوۆالەۆ تا سىرت قالماپتى. ونىڭ دەمەۋشىلىگىمەن قاراۋىلداعى ورتالىق الاڭدا استاناداعى «حان شاتىرى» ىسپەتتەس ساحنا تۇرعى­زىل­عان. اتىمتاي جومارت اتانعان ۆلاديمير وسى شارۋاعا دەپ 5 ميلليوننان استام قارجى بوساتىپتى. قاراۋىلداعى تاعى ءبىر جاڭالىق سول, تاۋەل­سىزدىك مەرەكەسى قارساڭىندا مۇندا ۇزاق جىلدان بەرى يەسىز قالعان «ارمان» كينو­تەاترى «جاستار ءۇيى» بولىپ قايتا اشىلدى. ەندى مۇندا اۋدان جاستارىنىڭ ونەرمەن شۇ­عىل­دانىپ, كوڭىل­دى دەمالۋىنا بارىنشا جاعداي جاسالعان. مۇنداي جاقسى جاڭالىقتار اقىن كوكباي اۋىلىنان دا كوپتەپ ەستىلە باستادى. ايتالىق, ءبىز­دىڭ ءتىلشى قوسىنىمەن ءجيى حابارلاسىپ تۇرا­تىن گازەت جاناشىرى, اۋداننىڭ ىشكى ساياسات ءبولىمىنىڭ مەڭگەرۋشىسى جاقسىلىق ەكىباەۆ وسى اۋىلدا تاۋلىگىنە 20-25 ءىرى قارا مەن 200 ۇساق مال سوياتىن ارنايى مۇزداتقىش كامەرامەن جابدىقتالعان مال سويۋ الاڭى ىسكە قوسىلعانىن ايتسا, ەندى تاقىر ەلدى مەكەنىندەگى اقىن كوكبايدىڭ كەسەنەسى مەن مۇراجايىنا قۇنى 5 ميللليون تەڭگەنىڭ كۇردەلى جوندەۋ جۇمىستارى جۇرگىزىلگەنىن حابارلاعان. ول, سون­داي-اق بۇل يگى شارۋاعا اۋداننىڭ قۇرمەتتى ازامات­تارى سايلاۋ كوشكين, امانتاي مۇقاتاەۆ جانە سەمەيدە تۇراتىن بەلگىلى كاسىپكەر تولەۋعازى يمانعاليەۆ دەمەۋشىلىك جاساعانىن ايتا كەتۋدى دە ۇمىتپاعان. داۋلەت سەيسەن ۇلى.      شىعىس قازاقستان وبلىسى.