تاراتا ايتساق, جاڭا جۇمىس ورىندارىن اشۋ ارقىلى 13047 ادام ەڭبەك ەتۋ قۇقىنا يە بولماق. «ورلەۋ» باعدارلاماسى اياسىندا تۇرمىسى تومەن وتباسىلاردى قامتۋعا ءبىرىنشى كەزەكتە باسىمدىق بەرىلگەن. وسىعان وراي 270 الەۋمەتتىك كەلىسىمشارت جاسالىپ, 1200 ادام قاتىسۋشىعا نيەت بىلدىرگەن. بۇرىندارى بيۋروكراتتىق كەدەرگىلەر مەن قاعازباستىلىقتار سالدارىنان قۇجاتتاردى راسىمدەۋ ءبىرتالاي قيىندىقتار تۋدىرسا, قازىر بۇل ۇدەرىس الدەقايدا وڭايلانعانى بايقالادى. جوباعا قاتىسۋ ءۇشىن وتباسى ەگەسى بولماسا مۇشەلەرى تۇرعىلىقتى جەردەگى جۇمىسپەن قامتۋ ورتالىعىنا نە اۋىلدىق اكىمدىككە قايرىلىپ, ءتيىسى قۇجاتتاردى ۇسىنسا جەتكىلىكتى, دەيدى ماماندار.
باعدارلامانىڭ يگىلىگىن كورۋشىلەر تيىمدىلىگىن ايقىن سەزىنىپ وتىرعاندارىن ايتادى. اتاۋلى الەۋمەتتىك كومەك الۋشىلار اراسىندا ەڭبەككە جارامدى تۇرعىندار ۇلەسىنىڭ 1,7 پايىزعا كەمۋى ءسوزىمىزدىڭ ءبىر دالەلى بولسا كەرەك. ەندىگى ماقسات كىرىسى ءومىر ءسۇرۋ دەڭگەيىنەن تومەن توپتاعىلاردىڭ سانىن 15,1 مىڭعا دەيىن ازايتۋعا باعدارلانعان.
ءسوز اراسىندا ناتيجەلى جۇمىسپەن قامتۋ جانە كاسىپكەرلىكتى دامىتۋ باعدارلاماسىن جۇزەگە اسىرۋعا رەسپۋبليكالىق قازىنادان 4,5 ميلليارد تەڭگە بولىنگەنىن, شاعىن نەسيەلەۋ مولشەرى 2,5 ەسەگە ارتىپ, 2,3 ميلليارد تەڭگە قاراستىرىلعانىن ايتا كەتكەن ءجون.
سول سياقتى «باستاۋ بيزنەس» باعدارلاماسى دا ومىرشەڭدىگىن كورسەتىپ كەلەدى. ونىڭ شەڭبەرىندە 920 ادامدى كاسىپكەرلىكتىڭ قىر-سىرىنا ۇيرەتۋ بەلگىلەنسە, ۇشتەن ءبىرى قىسقا مەرزىمدى كۋرستاردى اياقتاپ شىققان. 30 ادام نەسيە الۋ كەزەگىندە تۇر. 5 ادام 11 ميلليون جەڭىلدىكتى قاراجاتقا قول جەتكىزگەن. تۇتاستاي العاندا, جۇمىسسىزدار مەن ءوزىن-ءوزى جۇمىسپەن قامتاماسىز ەتەتىن ساناتتاعىلاردان التى مىڭنان استام قاتىسۋشىعا مەملەكەتتىك باعدارلامالاردىڭ جەڭىلدىكتى قىزمەتتەرى ۇسىنىلعان. اۋىل شارۋاشىلىعىن قارجىلىق قولداۋ قورىنىڭ جەرگىلىكتى فيليالى دا بەلسەندىلىگىن كۇشەيتە باستاعان سىڭايلى.
ۆەدوموستۆو باسشىلارىنىڭ ايتۋلارىنشا, جىل اياعىنا دەيىن جۇمىسسىزدار سانى – 600, ءوزىن-ءوزى ەڭبەكپەن قامتيتىندار 5000 ادامعا ازايىپ, جالدامالى قىزمەتكەرلەر 3,5 مىڭعا ۇلعاياتىن بولادى.
جىل باسىنان بەرى 13 مىڭ سولتۇستىكقازاقستاندىق جۇمىسقا ورنالاسىپ, بالا-شاعا ناپاقاسىن ايىرىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
