«جاقسىنى كورمەك ءۇشىن» دەپ جۋىردا ءالىمباي شەرۋباەۆتىڭ اۋلاسىن بارىپ كورۋگە دە جول ءتۇستى. راسىندا اتشاپتىرىمداي كەڭ اۋلا جەمىس اعاشى مەن سايالى اعاشقا تولى ەكەن. كىرەبەرىس ماڭدا جاپىراعى جايقالعان كوكتال قويۋ كولەڭكەسىمەن بۇركەپ, شاتىرلى ۇيگە ىستىقتى جىبەرمەي تۇرسا, ونان بەرى جاعالاي ءبىزدىڭ وڭىرگە ەندى جەرسىنە باستاعان ونشاقتى تۋيا اعاشى اۋلانىڭ ءسانىن كىرگىزىپ تۇر.
– ال مىنا اعاش – اسەم تال دەپ ايتىلادى ەكەن, ەرتە كوكتەمدە ادەمى گۇل شىعارادى دا, سونان سوڭ بايىز تابادى. ءپىلدىڭ قۇلاعىنداي ۇلكەن جاپىراقتارىن كوردىڭ بە, اۋانى جەلپىپ, تازالاپ تۇرادى, – دەيدى باعباندىققا مويىن بۇرعان وتاعاسى.
ءوزىمىز مەكەن ەتەتىن سىر ءوڭىرى راسىندا شولەيت جانە جارتىلاي شولەيت ايماق ەكەندىگىن جاسىرا المايمىز عوي, كۇنىنىڭ كوزى وتكىر, شاڭ سۋىراتىن جەلى دە وقتىن-وقتىن بار ەكەندىگىن ءبىلدىرىپ قويادى. سوندىقتان دا ءار ءۇي يەسىنىڭ ءوز اۋلاسىنا ءتۇرلى جەمىس پەن سايالى اعاشتار ەگۋى وتە قاجەتتىلىك دەپ تۇسىنگەن ءجون. استانا قالاسىنىڭ ماڭىنا قانشاما گەكتار جەرگە ءتۇرلى اعاشتار وتىرعىزۋعا پارمەن بەرىپ, جاسىل بەلدەۋ ورناتقىزعان پرەزيدەنتىمىزدىڭ يگى ءىسى ەلگە قانشاما شاراپات شاشىپ تۇر ەمەس پە؟! ۋاقىتى قانشا تىعىز بولسا دا, ونى نازارىنان تىس قالدىرماعان ەلباسى ءار ءوڭىردىڭ ءوسىپ وركەندەۋى جالپى ەلدىڭ كوركەيۋىنە اپاراتىنىن ءار جيىندا قاداپ ايتىپ, اتقارۋشى ورىندارعا تاپسىرىپ, ەلگە ۇلگى كورسەتۋمەن كەلەدى. مىنە, وسى ورايدا بۇگىنگى كەيىپكەرىمىزدىڭ ىسىنە ءسۇيسىنىس بىلدىرەمىز. ەندى شامالى ۋاقىتتا جەتپىس جاستىڭ جالىنا قول ارتاتىن اۋىلشارۋاشىلىق سالاسىنىڭ ارداگەرى ءالىمباي شەرۋباەۆ زەينەتكەرلىككە شىقتىم دەپ, ءتوردىڭ توبەسىندە شالجيىپ جاتۋدى ادەت قىلماعان ادام. تاڭعى ساعات 6-دان ورنىنا تۇرادى دا, باۋ-باقشاسىنىڭ كۇتىمىنە كىرىسەدى. سوناۋ 9-عا دەيىن تىنىم جوق, ەرتەڭگىلىك ءشايلانىپ العان سوڭ, تاعى دا كەتپەن-كۇرەگىن الىپ, قالىپتى شارۋاسىنا كىرىسەدى. «جاڭا ءوزىڭ ارالاپ كورگەن اۋلاداعى 151 اعاش پەن 33 اتىز جوڭىشقانى ءبىرسىپىرا سۋارۋ ءۇشىن 11 كۇن ۋاقىتىم كەتەدى. سوندا ايىنا ءۇش رەتتەن سۋارادى ەكەنمىن. ونىڭ اراسىندا وتاق شابۋ, جەتىلگەن جوڭىشقانى ورىپ جيناۋ سەكىلدى شارۋالارىم باستان اسادى, – دەيدى ول شاتتانا سويلەپ. مىنە, ءسوز باسىندا ادام قۇمارتقان ءىسى قانشا اۋىر, قيىن بولسا دا ءلاززات الادى ەكەن دەپ جاتقاندىعىمىز سوندىقتان ەدى.
الەكەڭنىڭ اۋلاسىندا الگىندە ءوزىمىز تىلگە تيەك ەتكەن اعاش تۇرلەرىنە تاعى اينالىپ سوعار بولساق, 20 ءتۇپ ءجۇزىم بيىل العاشقى جەمىستىڭ نىشانىن كورسەتتى. المانىڭ سانى – 24, شابدالى – 2, ورىك 8 ءتۇپ بولسا, مۇنان وزگە ونشاقتى ءتۇپ شيە تالى بار. ايتپاقشى, اۋلانىڭ سىرتقى قاباتىنداعى 14 ءتۇپ كوكجيدەنىڭ ءيىسى بۇرقىراپ, اينالانى كورىكتەندىرىپ تۇرعانى بار. باتىر تۇلعالى اعامىزدىڭ جەڭگەمىزگە دەگەن قۇرمەتى دە ەرەكشە ەكەن: «مىنا گۇلدەردى ساۋلە جەڭگەڭ ەككەن, مىنا قيار مەن قىزاناق تا سول كىسىنىڭ ەڭبەگى», دەپ قويادى. تاعى ءبىر اتىزدا قىزىلشا قاپتاپ تۇر ەكەن, ونى دا جەڭگەمىزدىڭ قىزمەتىنە جاتقىزدى الەكەڭ.
جاڭاقورعاندىقتار جاقسى بىلەدى كەزىندە ءالىمباي شەرۋباەۆ سوۆحوزعا باسشىلىق جاساعان ەڭ جاس ديرەكتوردىڭ ءبىرى بولدى. نەبارى 32 جاسىندا قيىر شەتتەگى قاراتوبە اۋىلىنا, كپسس-ءتىڭ ءححىV سەزى اتىنداعى سوۆحوزعا ديرەكتور بولىپ تاعايىندالدى. جانىنا بىلىكتى ماماندار اگرونوم اسان ناقىشپانوۆ, گيدروتەحنيك ءابجاپپار قۇدايبەرگەنوۆ, مال شارۋاشىلىعىنىڭ بريگاديرى قۇلماعانبەت يساحانوۆ سىندى جاستاردى توپتاستىرعان ديرەكتور كەڭشاردى 1994 جىلى 1 ملن 200 مىڭ تەڭگە پايداعا شىعاردى. ونان كەيىنگى ۋاقىتتاردا قىركەڭسە اۋىلىندا اۋىل اكىمى, كەلىنتوبە كووپەراتيۆىنىڭ توراعاسى, اۋداندىق جەر بولىمىندە باس مامان قىزمەتتەرىن اتقارعان ول 2014 جىلى زەينەتكەرلىككە شىقتى. سونان بەرى باۋ-باقشانىڭ باعباندىعىمەن شۇعىلدانىپ ءجۇر. ايتپاقشى, اۋدان ورتالىعىنا ورنىققان سوڭعى ونشاقتى جىل كولەمىندە جاس كەزىندەگى ءوزى سۇيەتىن ۆولەيبول سپورتىنا دەن قويدى. اۋداندىق ارداگەرلەر كومانداسىنىڭ بەلدى مۇشەسى. جاز ايىندا الماتىعا ارقالى اقىنىمىز ولجاس سۇلەيمەنوۆ اتىنداعى تۋرنيرگە قاتىسىپ, وزىمەن دە جۇزدەسىپ قايتتى.
ءيا, ءومىردى ءماندى دە, ماعىنالى وتكىزۋ ءار ادامنىڭ ءوز قولىندا. سونىڭ جارقىن ۇلگىسىن جاڭاقورعاندىق ءالىمباي شەرۋباەۆتىڭ ءومىر جولىنان بايقار ەدىك.
نۇرماحان ەلتاي
قىزىلوردا وبلىسى,
جاڭاقورعان اۋدانى
