ايگىلى كەنەن اقىننىڭ اقىندىق, انشىلىك ونەرىنە باستاۋ بولعان كونە دومبىرا قورداي اۋدانى, كەنەن اۋىلىنداعى كەنەن ازىرباەۆ اتىنداعى ادەبي-مەموريالدىق مۋزەيدە ساقتاۋلى تۇر. بۇل ەشقانداي دا كوشىرمە ەمەس, بالا كۇنىندە اقىننىڭ شەرتكەن قاسيەتتى اسپابى. مۋزەي قىزمەتكەرى ءلاززات بارمەنقۇلوۆانىڭ ايتۋىنشا, اقىن بۇل دومبىرانى ون ءبىر جاسىندا ۇستاعان ەكەن. بالا كەنەننىڭ ونەرگە ىنتىقتىعىن بايقاعان اقىننىڭ تۋىس اعاسى ەركەباي بازار ۇلى مۇنى ءوز قولىمەن جاساپ بەرىپتى. تالاي ءان مەن جىردىڭ دۇنيەگە كەلۋىنە سەبەپشى بولعان, كەنەن كەڭىستىگىنىڭ كوركەم دەڭگەيگە كوتەرىلۋىنە جول اشقان بۇل دومبىرا اۋىلدىڭ, اۋداننىڭ عانا ەمەس, تۇتاس ونەرسۇيەر قاۋىمنىڭ قۇندى جادىگەرى. عاسىردان استام تاريحى بار قارا دومبىرانى اقىننىڭ قىزى تورتكەن كەنەنقىزى مۋزەيگە سىيلاعان ەكەن.
قازاق تاريحىنداعى قيلى كەزەڭدەردىڭ كۋاسى بولعان كەنەن اقىننىڭ تاعدىر جولى وڭاي بولماعان. قوس بىردەي پەرزەنتىنەن ايىرىلىپ, ارماندا قالعان ول «بازار-نازار» دەگەن قاسىرەتتى ءانىن شىعارادى. بازار مەن نازاردى جوقتاپ سالعان ءانى ءالى كۇنگە دەيىن تىڭدارمان قۇلاعىندا. مۋزەيدەگى تاعى ءبىر قۇندى جادىگەردىڭ ءبىرى توبىلعى اعاشىنان جاسالعان كادىمگى سىلدىرماق ويىنشىعى. اقىن مۇنى وتىزىنشى جىلدارى ءوز قولىمەن جاساپ, ءسابي بازار مەن نازاردى جۇباتىپ, ويناتقان ەكەن. بۇل جادىگەر دە كونەنىڭ كوزىندەي, اسىلدىڭ سىنىعىنداي بولىپ سىر شەرتەدى.
حاميت ەسامان,
«ەگەمەن قازاقستان»
جامبىل وبلىسى
