ايتالىق, 1-10-سىنىپ وقۋشىلارى اراسىنداعى جازعى لاگەرلەردە ەلىمىز بويىنشا 1 ملن 655 بالا دەمالىپتى. بۇل بارلىق وقۋشىلاردىڭ 61 پايىزى دەۋگە بولادى. سونىمەن قاتار, 600-دەن استام وليمپيادالىق مەكتەپ, 2 مىڭ تىلدىك مەكتەپ, 10 مىڭ شىعارماشىلىق ورتالىق, 14 مىڭ سپورتتىق-تۋريستىك باعىتتاعى ۇيىم, 15 مىڭ ەڭبەك جانە دەمالىس ورمانشىلىق لاگەرلەرى مەن توپتارى جۇمىس ىستەۋدە. جالپى, مەملەكەتىمىز بويىنشا ۇستىمىزدەگى جىلى 85 پايىز نەمەسە الەۋمەتتىك وسال وتباسىلاردا ءومىر ءسۇرىپ جاتقان 429 مىڭ بالا ساۋىقتىرۋ ورىندارىندا بولعان.
وتانىمىز بويىنشا جۇزدەگەن شاعىن لاگەر بار ەكەنى بەلگىلى. سونىڭ ىشىندە تاۋەلسىز ەلىمىزدىڭ ارتەگى رەتىندە باعالانىپ وتىرعان «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ ءجونى بولەك. بۇل كەشەندە بالالاردى بەلسەندى ازاماتتىق ۇستانىمعا, ولاردىڭ شىعارماشىلىق قابىلەتتەرىن اشىپ, جەكە تۇلعا رەتىندە قالىپتاسۋىنا, ومىردەگى ءوز ورنىن دۇرىس تاڭداۋىنا بارلىق مۇمكىندىك جاسالعان. «بۋراباي» مەملەكەتتىك ۇلتتىق تابيعي پاركى اۋماعىندا, شورتاندى كولىنىڭ جاعالاۋىنا ورنالاسقان بۇل مەكەمە جىل بويى وقۋشىلاردىڭ دەمالىسى مەن وقۋىن ۇشتاستىرا وتىرىپ جۇرگىزەدى. اۋىسىم ۇزاقتىعىنا كەلەر بولساق, جاز مەزگىلىندە وقۋشىلار – 15 كۇن, ساباق ۋاقىتىندا – 20 كۇن بولادى.
ورتالىق تاراپىنان بەرىلەتىن ۇيلەستىرىلگەن 5 رەت تاماقتانۋدىڭ وزىندىك بىرەگەي ەرەكشەلىگى بار. بارلىق ونىمدەر تابيعي, دارۋمەندەرگە باي جانە ءتىپتى ءىشىنارا ورتالىقتىڭ اۋماعىندا وسىرىلەدى. كەشەننىڭ بەسىنشى قاباتىندا تولىق جابدىقتالعان بولمەلەر بار. وندا ءبىر مەزگىلدە 350 دەمالۋشىنىڭ تۇرۋىنا مۇمكىندىك قاراستىرىلعان.
ەلىمىزدە ءىرى «بالداۋرەن» سەكىلدى كەشەندەر ۇيىمداستىرۋ, ءتىپتى سول كەشەندەردى «بالداۋرەننىڭ» بولىمشەسى رەتىندە بەكىتۋ ماسەلەسىن باس باسىلىم الدەنەشە رەت كوتەرگەن ەدى. ەگەر بۇل يگىلىكتى ءىس ءوز شەشىمىن تاۋىپ جاتسا, تاۋەلسىز ەلدىڭ ارتەگى قالىپتاسار ەدى. جەرگىلىكتى جەرلەردەگى لاگەرلەردەن تالانتتاردى «بالداۋرەن» – قازاق ارتەگىنە جىبەرۋ ءۇردىسى ۇيلەسىم تاۋىپ, ميلليونداعان بالالاردىڭ ىشىنەن ناعىز مىقتىلار سوندا بارۋعا تالپىنارى كۇمانسىز.
قازىر وسى «بالداۋرەننىڭ» ءبىر بولىمشەسى الماتى وبلىسىنىڭ اۋماعىنان – «بالداۋرەن-قاپشاعاي» باقىتتى بالالىق شاق مەكەنى ەكى جىلدان بەرى جۇمىس ىستەپ كەلەدى. بۇل سول وڭىردەگى وقۋشىلاردىڭ دەمالۋىنا مول مۇمكىندىك بەرۋدە. قازىردىڭ وزىندە لاگەر زاماناۋي قۇرال-جابدىقتارمەن تولىق جاراقتالعان. جيىرما مىڭ كىتاپ قورى بار كىتاپحانا اشىلعان. بالالاردىڭ شىعارماشىلىق قابىلەتىن ارتتىرۋ ماقساتىندا شەبەرحانا, ستۋديا, ۇيىرمەلەر, كومپيۋتەرلىك سىنىپتار جۇمىس ىستەيدى. ايتالىق, بيىلعى جازدىڭ نەگىزگى تاقىرىبى ەكسپو-2017-گە ارنالىپتى.
ەلىمىزدەگى ميلليونداعان ۇل مەن قىزدىڭ جازعى دەمالىسىن ۇيىمداستىرۋ ءىسىن ءالى دە جەتىلدىرە بەرسەك, ۇرپاعىمىزدىڭ مەكتەپ تابالدىرىعىن كوڭىلدى اتتاپ, جىل بويى ءبىلىم نارىمەن سەرگەك سۋسىندارى ءسوزسىز. لاگەر الاۋى – بالا قالاۋى دەۋىمىزدىڭ ءمانى وسىندا جاتىر.
سۇلەيمەن مامەت,
«ەگەمەن قازاقستان»
