بۇل ءۇش قىلمىستىڭ ءبىرىنشىسى ازەربايجان ەلىنىڭ ازاماتىنا قاتىستى بولىپ شىقتى. ول قالا سىرتىندا ورنالاسقان وندىرىستىك بازالاردىڭ بىرىنەن كونتەينەرلەردى جالعا الىپ, وندا بەكىرە تۇقىمداس بالىقتاردى زاڭسىز ساقتاعان. قۇقىق قورعاۋشىلار ودان 251 دانا, ياعني 1 توننا 150 كيلو بەكىرە تۇقىمداس بالىقتى تاركىلەدى. ازامات 40 توننالىق كونتەينەرلەردە تۇتاس ساقتالعان قىرۋار بالىقتىڭ وزىنىكى ەمەس ەكەنىن ايتۋدا, ايتسە دە وعان بالىقتاردى شەتەل اسىرۋ كۇدىگى تاڭىلىپ وتىر.
– كۇدىكتىگە قاتىستى قر قك-ءنىڭ 339-شى بابى بويىنشا سوتقا دەيىنگى تەرگەپ-تەكسەرۋ امالدارى ءجۇرىپ جاتىر. اتالعان باپتا كورسەتىلگەندەي, بەكىرە تۇقىمداس بالىقتى زاڭسىز اۋلاپ, ونى ساقتاعان ادام, سونداي-اق, ساۋدا-ساتتىققا شىعارىپ, تاسىمالداعان ازامات 7 ميلليون تەڭگە كولەمىندە ايىپپۇل تولەيدى نەمەسە 3 جىلعا دەيىن باس بوستاندىعىنان ايىرىلادى دەيدى ماڭعىستاۋ وبلىستىق ءىىد جپق تابيعات قورعاۋ پوليتسياسى بولىمشەسىنىڭ ينسپەكتورى نەسىبەك تاعانيازوۆ.
ماڭعىستاۋلىق ءتارتىپ ساقشىلارى اقتاۋدا تاعى ەكى ۇيىمداسقان قىلمىستىق توپتى قولعا ءتۇسىردى. ولاردىڭ ءبىرى ارنايى قۇرىلعىلاردىڭ كومەگىمەن اۆتوكولىكتەردەگى باعالى زاتتاردى توناپ كەلسە, كەلەسى توپ ءتۇرلى-ءتۇستى مەتالداردى قابىلدايتىن ورىندارعا شابۋىل جاساۋمەن اينالىسقان.
تاراتا ايتار بولساق, تاراز قالاسىنان كەلگەن ءۇش جىگىت ەكى اي بويى اۆتوكولىكتەردەگى اقشا مەن باعالى زاتتاردى ارنايى «كود-گراببەر» دەپ اتالاتىن قۇرىلعىنىڭ كومەگىمەن توناعان. بۇل اپپارات كولىكتىڭ ءپۋلتى ارقىلى بارلىق كودتاردى وقىپ, جازۋعا, سونداي-اق, الىستا وتىرىپ-اق زاماناۋي قۇرالداردى قولدانىپ, كولىكتىڭ ەسىگىن اشۋعا مۇمكىندىك بەرەدى.
قۇقىق قورعاۋشىلاردىڭ قۇرىعىنان قۇتىلماعان كەلەسى قىلمىستىق توپ 8 ادامنان قۇرىلعان. ولاردىڭ بارلىعى جەرگىلىكتى ازاماتتار. ولار اقتاۋ قالاسى مەن قالا ىرگەسىندەگى مۇنايلى اۋدانىندا وزدەرىنىڭ قىلمىستىق ىستەرىن جۇزەگە اسىرىپ كەلگەن.
قازىرگى تاڭدا كولىك توناۋشىلارعا قاتىستى قر قك 262-ءشى بابى بويىنشا قىلمىستىق ءىس قوزعالسا, تەمىر-تەرسەك قابىلدايتىن ورىندارعا شابۋىل جاساۋشىلار تەرگەۋ يزولياتورىنا قامالعان.
ەل اراسى ۇرى-قارىسىز, تەنتەك-تەلىسىز تۇرمايتىنى بەلگىلى. دەر كەزىندە قيمىلداپ, بۇزاقىلاردى قولعا تۇسىرە بىلگەن ءتارتىپ ساقشىلارىنىڭ ەڭبەگى ەرەن.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
