سونىمەن قاتار, ايماقتاعى اۋدانداردىڭ دا ورنالاسقان جەرىنە, تابيعاتىنا جانە تاعى باسقا ارتىقشىلىقتارىنا قاراي جۇمىس جوسپارلارى جۇيەلى دامىپ كەلەدى. ال توعىز جولدىڭ تورابىندا ورنالاسقان مەركى اۋدانىندا بۇگىندە تالاي تياناقتى تىرلىكتەر تىندىرىلىپ جاتقانىمەن, بالىق وڭدەۋ تسەحى جۇمىسىنىڭ قارقىن الۋى ءوڭىر حالقى ءۇشىن ايتارلىقتاي جاڭالىق بولىپ وتىر. ەرەكشە كاسىپتىڭ ەل يگىلىگى ءۇشىن قولعا الىنعانى دا قۇپتارلىق ءىس.
نەگىزىنەن وبلىستا مال جانە ەگىن شارۋاشىلىعى جاقسى دامىعان. جىل سايىن وڭىردە اتالعان سالادا جاقسى كورسەتكىشتەرگە قول جەتكىزىلىپ كەلە جاتقانى دا بەلگىلى. دەگەنمەن, جۇمىسىن باستاپ ۇلگەرگەن بالىق شارۋاشىلىعى ءوڭىر حالقىنىڭ قىزىعۋشىلىعىن تۋدىرىپ, كاسىپكە دەگەن قۇرمەتىن ارتتىرا تۇسەتىندىگى ءسوزسىز. ايتالىق, تالاس, اسا وزەندەرىنەن, سونداي-اق, اقكول, بيلىكول سەكىلدى كولدەردەن ازىن-اۋلاق بالىق اۋلاپ, حالىقتىڭ ونى كۇندەلىكتى تىرشىلىككە جاراتقانى بولماسا, وڭىردە كاسىبي بالىق شارۋاشىلىعى جولعا قويىلماعان ەدى. ەندى ءوڭىر جۇرتشىلىعى وڭدەلگەن بالىق ونىمدەرىمەن قامتىلىپ قانا قويماي, الداعى ۋاقىتتاردا اتالعان ونىمدەر ەكسپورتقا دا شىعارىلاتىن بولادى.
اعىمداعى جىلى مەركى اۋدانى, انداس باتىر اۋىلدىق وكرۋگىنە قاراستى گرانيتوگور اۋىلىندا بالىق وڭدەيتىن شاعىن زاۋىت قۇرىلىسىنىڭ باستالعانى بەلگىلى. جالپى قۇنى 300 ميلليون تەڭگەنى قۇرايتىن جوبا جىلىنا 1500 توننا بالىق وڭدەپ, ودان 750 توننا دايىن ءونىم شىعارا الادى. كوكسەركەنىڭ جانە تاباننىڭ جون ەتى, بالىقتىڭ ۇرتى مەن تارتىلعان ەتىن شىعارۋدى كوزدەگەن تسەحتىڭ نەگىزگى باعىتى ەكسپورت بولىپ وتىر. تسەح الداعى ۋاقىتتاردا گەرمانيا, دانيا, شۆەتسيا مەملەكەتتەرىمەن بايلانىس جاساۋ ارقىلى وڭىردە بالىق شارۋاشىلىعىن دامىتۋدى كوزدەيدى. «تسەح جۇمىسىن قولعا الۋداعى ماقسات – بالىق ونىمدەرىن تەرەڭ وڭدەۋدى جۇزەگە اسىرۋ بولىپ وتىر. قازىرگى تاڭدا ەلىمىزدەگى ىرگەلى بالىق زاۋىتتارىنان ماماندار تارتىلىپ, جەرگىلىكتى ازاماتتاردى وقىتۋ ۇستىندەمىز. بۇگىندە تسەحتا 15 ادام جۇمىس ىستەسە, بولاشاقتا بارلىعى 65 ادام جۇمىسپەن قامتىلاتىن بولادى. كەزىندە بالقاشتىڭ جانىندا ەلىمىزگە بەلگىلى بالىق زاۋىتى بولعان. سول جەردە كەزىندە جۇمىس ىستەپ, جوعارى كورسەتكىشتەرگە قول جەتكىزگەن ەلشىبەك نيازبەكوۆ, ابزال ابىشەۆ دەگەن ازاماتتار قازىر مەركى اۋدانىندا جۇمىس ىستەپ جاتىر. كەلەشەكتە تەرەڭ وڭدەلگەن بالىق ونىمدەرىنىڭ توقسان پايىزى ەكسپورتقا شىعارىلاتىن بولادى», دەيدى اۋدان اكىمى مەيىرحان ومىربەكوۆ. اتالعان جوبا ەندى ءبىر ايدان كەيىن, ياعني تامىز ايىندا تولىقتاي ىسكە قوسىلادى.
جوبانىڭ بۇگىنگى بەتالىسى جامان ەمەس. نەگىزگى شيكىزات كوزدەرىن ەلىمىزدىڭ ارال, كاسپي تەڭىزدەرى مەن زايسان كولىنەن اكەلەمىز دەپ ماقسات قويىپ وتىرعان تسەح باسشىلىعى قازىرگى كەزدە ارال تەڭىزىنەن 40 توننا بالىق الىپ, زاۋىتتى ىسكە قوسۋ بويىنشا جۇمىستارىن جالعاستىرىپ كەلەدى. ەندى مەركى جەرىنەن ەۋروپا مەملەكەتتەرىنە قاراي وڭدەلگەن بالىق ونىمدەرى ەكسپورتتالادى. قازاقتىڭ ءدامى, تابيعي بايلىعى دا الداعى ۋاقىتتاردا الەمنىڭ الپاۋىت مەملەكەتتەرىن تاڭداندىرادى دەگەن سەنىم بار. قازىردىڭ وزىندە-اق گەرمانيا, دانيا, شۆەتسيا مەملەكەتتەرى بىرلەسە جۇمىس ىستەۋگە وڭ نيەت تانىتىپ وتىر ەكەن. بۇل ءىس كەيىنگى كەزەڭدە دە اۋليەاتانىڭ الەۋەتىن ارتتىرا تۇسەتىن جوبالاردىڭ ءبىرى بولماق.
حاميت ەسامان,
«ەگەمەن قازاقستان»
جامبىل وبلىسى
