سەسسيادا ەلىمىز 2018-2019 جىلدارعا كودەكس اليمەنتاريۋس كوميسسياسىنىڭ ەۋروپا بويىنشا بۇۇ جانىنداعى ازىق-ت ۇلىك جانە اۋىل شارۋاشىلىعى مەن دۇنيەجۇزىلىك دەنساۋلىق ساقتاۋ ۇيىمدارى (بۇۇ ااۇ/ددۇ) ۇيلەستىرۋشى كوميتەتىنىڭ توراعاسى بولىپ تاعايىندالدى.
قازاقستان قۇرامىنا ەۋروپا اۋماعى مەن ورتالىق ازيانى قوسا العاندا 52 مەملەكەت كىرەتىن ااۇ/ددۇ-نىڭ ۇيلەستىرۋشى كوميتەتىنە 2003 جىلدان باستاپ مۇشە بولىپ تابىلادى.
جالپى, كودەكس اليمەنتاريۋس كوميسسياسىنىڭ نەگىزگى ميسسياسى تاماق ونىمدەرىنىڭ قاۋىپسىزدىگىن جانە الەمدىك دەڭگەيدە ادال ساۋدانى قامتاماسىز ەتۋ, تاماق ونىمدەرىنە ارنالعان حالىقارالىق ستاندارتتاردى جانە تاعام قاۋىپسىزدىگىن قامتاماسىز ەتۋدىڭ باسشىلىققا الىناتىن قاعيداتتارىن ازىرلەۋ بولىپ تابىلادى.
ەۋروپا بويىنشا ااۇ/ددۇ-نىڭ ۇيلەستىرۋشى كوميتەتىنە توراعالىق ەتۋ قازاقستانعا ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرىنىڭ تاجىريبەسى بويىنشا تاعام قاۋىپسىزدىگىن قامتاماسىز ەتۋ ءۇشىن ۇلتتىق ستراتەگيانى ءتيىمدى ىسكە اسىرۋعا, بيزنەستى قولايلى جۇرگىزۋ ءۇشىن تاعام ستاندارتتارىن ۇيلەستىرۋگە جانە قولدانۋعا, ەلدىڭ ەكسپورتتىق الەۋەتىن ارتتىرۋعا, وتاندىق ونىمدەردى الەمدىك نارىققا جىلجىتۋعا جانە حالىقارالىق عالامدىق ەكونوميكاعا ينتەگراتسيالانۋعا مۇمكىندىك بەرەدى.
ايتا كەتۋ كەرەك, 50 جىلدان استام ۋاقىت ىشىندە كودەكستىڭ مۇشە ەلدەرى حالىقارالىق نارىقتاردا ىسكە اسىرىلاتىن تاماق ونىمدەرىنىڭ ستاندارتتارىن كەلىسۋ بويىنشا جۇمىستار جۇرگىزۋدە. بۇل ستاندارتتار تۇتىنۋشىلاردىڭ قاۋىپسىزدىگىن, قوعامدىق دەنساۋلىق ساقتاۋ سالاسىن جاقسارتۋعا, ەلدەر اراسىنداعى ارتىق ساۋدا كەدەرگىلەرىن قىسقارتۋعا, مەملەكەتتەرگە كودەكس ستاندارتتارىمەن كەپىلدىك بەرىلگەن ساپالى جانە قاۋىپسىز تاعام ءونىمىن ساتىپ الۋعا جول اشادى.
ەسكە سالا كەتسەك, كودەكس اليمەنتاريۋس كوميسسياسى بۇۇ ازىق-ت ۇلىك جانە اۋىل شارۋاشىلىعى ۇيىمى مەن دۇنيەجۇزىلىك دەنساۋلىق ساقتاۋ ۇيىمىنىڭ بىرلەسكەن ۇكىمەتارالىق ورگانى بولىپ تابىلادى. ول الەمنىڭ 7 گەوگرافيالىق ايماعىنان 188 مۇشە ەلدى قامتيدى.
«ەگەمەن-اقپارات»
