ءالى دە وسى قۇراماعا سەنىم ارتايىق

باكۋدە ەرەسەكتەر اراسىنداعى الەم چەمپيوناتى اياقتالدى. ەكى جەتىدەن استام ۋاقىتقا سوزىلعان بوكس باسەكەسىندە الەمنىڭ 113 ەلىنىڭ 570 بىلعارى قولعاپ شەبەرى وليمپيادا ليتسەنزياسىن ساراپقا سالىپ, الەمدىك ءتاج ءۇشىن ايقاستى. بۇل بايگەدە ءبىزدىڭ ەلىمىزدىڭ بوكس­شىلارى ەكى كۇمىس جانە ەكى قو­لا مەدالعا يە بولدى. التىن ءجۇل­دە بۇيىرمادى. باكۋ باسە­كە­سى­نى­ڭ ەڭ شەشۋشى كەزەڭىندە سەرىك ساپيەۆ پەن ادىلبەك نيازىم­بەتوۆ كۇمىس­پەن كۇپتەلدى. تاعى ەكى بوكس­شى­مىز عاني جايلاۋوۆ پەن يۆان دىچكو قولا جۇلدەنى قاناعات تۇتتى. وسى الەم چەمپيوناتىندا ۋك­راينا قۇراماسى ەڭ كوپ التىن ءجۇل­دە الىپ, جالپىكوماندالىق ەسەپتە ءبىرىنشى ورىندى يەلەندى. ولاردىڭ قورجىنىنا 4 التىن, 1 كۇ­­مىس مەدال ءتۇستى. بارلىعى – 5 ءجۇل­­دە. ۋكراينا قۇراماسىندا  ءجۇل­­­دە ال­عان بوكسشىلاردىڭ ءبارى فينالدا ونەر كورسەتتى. سونىڭ ىشىندە ۆاسيل لوماچەنكو, تاراس شەلەستيۋك, لەۆگەن حيتروۆ, ولەك­ساندر ۋسيك التىننان القا تاعىن­سا, دەنيس بەرەنچۋك كۇمىستى قاناعات تۇتتى. بيىلعى باسەكەدە كۋبا 2 ال­تىن, 1 كۇمىس جۇلدەگە يە بول­دى. ال الاڭ يەلەرى ازەربايجان قۇ­راماسى 1 التىن, 1 كۇمىس مە­دال­عا قول جەتكىزدى. وسى ەلدىڭ كو­مانداسىندا اسا اۋىر سال­ماق­تاعى ماگومەدراسۋل مەدجي­دوۆ فينالدا اعىلشىن ەنتوني دجوشۋادان التىن مەدالدى سۋىرىپ اكەتسە, تەيمۋر ماممادوۆ ۋكراين ۋسيكتەن تازا جەڭىلدى. ازەر­بايجان بوكسشىسى ءبىزدىڭ بۇرىن­عى وتانداسىمىز ەكەن. ءوزى ءوڭتۇس­تىكتە تۋىپ, بەرتىنگە دەيىن اكە-شەشەسىمەن تۇرىپ كەلىپتى. اكەسى – تۇرىك, شەشەسى – قازاق. تەيمۋر اتاقونىسىنا وسىدان بەس جىل بۇرىن قونىس اۋدارىپتى. سودان بەرى بوكسپەن اينالىسا باستاعان جيەنىمىز ەندى, مىنە, الەم چەم­پيو­ناتىنىڭ كۇمىس جۇلدەگەرى اتا­نىپ وتىر. باكۋ تورىندە رەسەي بابىندا بول­مادى. ءبىر التىن, ەكى قولا جۇلدە الدى. قۇرمەت تۇعىرىنىڭ بيىك ساتىسىندا كورىنگەن سول بايا­عى ميشا الويان. ءۇشىنشى ورى­ندى ەگور مەحونتسەۆ يەلەندى. ءبىز الوياننىڭ  ۇلتى ارميان دەسەك, ول باكۋدە تۋىپ, كەيىن ءۇش جا­سىندا رەسەيگە كوشكەن كۇرد­تىڭ وتباسى­نان شىققان ەكەن. وسى جاعدايدى جەرگىلىكتى جانكۇيەر­لەردىڭ كوبى بىلمەي, الەم چەم­پيوناتى باس­تال­عالى بەرى الويان­عا قارسى شىق­قان بوكسشىلاردىڭ بارىنە بولىسقانىنا كۋا بولعان ەدىك. قىتايدىڭ تالانتتى بوكس­شى­سى زوۋ شيميڭ بيىلعى دودادا الەمنىڭ ءۇش دۇركىن چەمپيونى اتاندى. ول فينالدا بولا­شاعى­نان كوپ ءۇمىت كۇتتىرەتىن تاعى ءبىر سا­رى قۇرلىقتىڭ تالانتتى بوكس­شى­­سى, كورەيالىق جون ءشيندى ۇتتى. ال ءبىزدىڭ ەكى كۇمىس, ەكى قولا مەدال العان قازاقستان بوكسشى­لارىنىڭ بيىلعى باسەكەدە كەم دەگەندە ءبىر التىن مەدال يەلەنۋگە شاماسى جەتەتىن ەدى. بىراق, تاعى دا سول ءوزىمىزدى بۇيىرعان قاشپايدى, قۋعان جەتپەيدى, دەپ جۇباتۋعا تۋرا كەلىپ وتىر. فينالدا قوس بوكسشىمىز سەرىك ساپيەۆ پەن ادىلبەك نيازىم­بەتوۆ جاقسى ونەر كورسەتتى. ەكەۋى دە نامىسقا تىرىسىپ, ەلىمىزدىڭ ءانۇرانى باكۋ تورىندە شىرقالسا دەگەن نيەتىمەن بوكستاستى. الايدا, تاعى دا سول ساتسىزدىك دەيمىز بە, بۇيىرتپاعان التىن جۇلدە دەيمىز بە, فينالدا ولاردىڭ جو­لى بولماي قويدى. بىراق, نيا­زىم­بەتوۆتىڭ كۇمىس جۇلدە ال­عانىن ۇلكەن جەتىستىك دەپ باعا­لاۋعا بولادى. ويتكەنى, بۇل – ونىڭ العاشقى الەم چەمپيوناتى. ساپيەۆ باكۋگە ءۇش دۇركىن الەم چەمپيونى اتانامىن دەپ كەلىپ ەدى. ونىسىن ول ەشقاشان جاسىرماعان. فينالدا ۋكراين شەلەستيۋكتەن جەڭىلگەندە, كوزىنە جاس تىعىلعانىن كوردىك. الەم چەم­پيوناتى بىتكەن سوڭ ءبىر رەيسپەن الماتى ارقىلى باكۋدەن ۇشىپ كەلگەنىمىزدە باپكەر نۇر­لان اقۇرپەكوۆ مىنانى ايتتى. «الەم چەمپيوناتىندا ءبىز التىن جۇلدە الۋىمىز كەرەك ەدى. بارعا قاناعات. سەرىك كوماندانىڭ كاپي­تانى, قازاقتىڭ باتىر ۇلى. باكۋدە كۇمىس السا, ەندى ول لوندوندا التىن الادى», دەدى. «ءسوزىڭىز پەرىشتەنىڭ قۇلاعىنا شالىن­سىن», دەيمىز. سيدنەي وليمپياداسىنىڭ چەم­­­پيونى ەرماحان ىبى­را­يىموۆ­تى دا ۇشاقتا كەزدەستىرىپ, ءبىراز اڭگى­مە­لە­سىپ قالعان ەدىك. ول بىلاي دەدى: «باكۋ باسەكەسىن وليمپياداعا دايىن­دىق دەپ بىلىڭىزدەر. سەرىك­تىڭ, ادىلبەكتىڭ التىن الما­عا­نى­نا كوپ وكىنبەيىك, بىزگە, ەڭ باس­تى­سى, كو­مان­دانىڭ بىرلىگى كەرەك. چيكاگودا وتكەن الەم چەم­پيو­نا­تىن­دا التىن مەدال العان ون بوكس­شىنىڭ ەكەۋى عانا بەيجىڭ وليم­پياداسىندا ءوزىن دالەلدەدى. سون­دىق­تان سابىر ساق­تا­عان ءجون. ەڭدى بارلىقتارىڭىز كورەسىزدەر, بۇكىل الەم ۋكرايناعا قارسى دا­يىن­دا­لادى. ال ءبىز تاسادان سۋى­رىلىپ شىعۋىمىز كەرەك». ەرەكەڭ ايت­قانداي, قازىر بىزگە باستىسى كومان­دا­لىق رۋح, بىرلىك كەرەك. الدا استانادا وتەتىن تاعى ءبىر ليتسەنزيالىق تۋرنير بار. سول كەزدە ايتجانوۆتىڭ كومان­دا­سىن­داعى بوكسشىلارعا تاعى دا لوندون وليم­پياداسىنا ليتسەنزيا الۋعا مۇمكىندىك بەرىلەدى. استانا تۋرنيرىندە بىرلىگى مىعىم باس باپكەر مىرزاعالي ايت­جانوۆ­تىڭ قۇرامىنىڭ لوندون وليمپيادا­سى­نا تاعى 4 جولداما الاتىنىنا سەنەمىز. ازىرشە ءبىزدىڭ قۇراما 6 جولدامانى يەلەنىپ وتىر داستان كەنجالين. سۋرەتتى تۇسىرگەن ۆيتالي گاركۋشا. باكۋ – استانا.