شارا اتىراۋ وبلىسىنىڭ كۇندەرى جانە ەكسپو-2017 كورمەسىنە بايلانىستى ۇيىمداستىرىلدى. شاباندوزدار بايگەنىڭ ءۇش ءتۇرى بويىنشا جارىسقا ءتۇستى: جورعا جارىس, قۇنان بايگە جانە الامان بايگە.
ات جارىسىنا قازاقستاننىڭ بارلىق ايماقتارىنان 50-گە جۋىق شاباندوز قاتىستى. بايگەنىڭ جۇلدە قورى دا قوماقتى – 51 ملن تەڭگە.
اقشالاي جۇلدەدەن بولەك, جەڭىمپازدارعا اتىراۋ وبلىسىنىڭ اكىمدىگى مەن ۇيىمداستىرۋ كوميتەتىنىڭ ارنايى سىيلىعى تابىستالدى. سونداي-اق, جامبى اتۋ, قىز قۋ, ساداق اتۋ سەكىلدى ۇلتتىق ويىنداردان كورىنىس كورسەتىلىپ, اۋقىمدى مادەني-ويىن-ساۋىق باعدارلاماسى ۇسىنىلدى.
الامان بايگەدە الماتىلىق دياس جۇماشتىڭ تۇلپارى 21 شاقىرىمدى سۇرىنبەي باعىندىرىپ, توپ جاردى. ءبىرىنشى ورىن ءۇشىن وعان ۇيىمداستىرۋشىلار 13 ملن تەڭگەنىڭ سەرتيفيكاتىن تابىس ەتتى.
قۇنان بايگەدە (7 شاقىرىم) مارەگە دىلمۇحامەد جولاۋشىنىڭ ارعىماعى ءبىرىنشى كەلىپ, 7 ميلليون تەڭگەنى قانجىعالادى.
جورعالار ىشىندە (5 شاقىرىم) ايحان تولەگەنوۆتىڭ اتى شاشاسىنا شاڭ جۇقتىرمادى. وعان 3 ميلليون تەڭگە تابىستالدى.
ء«بىز ءۇشىن بۇل ۇلكەن جەڭىس. وسىعان جەتۋ ءۇشىن كوپ دايىندالدىق. بىراق بۇگىن بارلىعى ويداعىداي بولىپ, ارمانىم ورىندالدى. مەنىڭ تۋعاندارىما, اكەمە العىسىم شەكسىز», – دەدى الامان بايگە جەڭىمپازى دياس جۇماش.
استانا قالاسىنىڭ اكىمى اسەت يسەكەشەۆ, اتىراۋ وبلىسىنىڭ اكىمى نۇرلان نوعاەۆ, مادەنيەت جانە سپورت ءمينيسترى ارىستانبەك مۇحامەدي ۇلى جانە اقپارات جانە كوممۋنيكاتسيا ءمينيسترى داۋرەن اباەۆ جەڭىمپازداردى قۇتتىقتادى.
