ساپار بارىسىندا باقىتجان ساعىنتاەۆ «پەتروپاۆل» حالىقارالىق اۋەجايىن جوندەۋ بارىسىمەن جانە ونىڭ ترانزيتتىك الەۋەتىن دامىتۋ پەرسپەكتيۆالارىمەن تانىستى.
وبلىس اكىمىنىڭ ورىنباسارى ا. فەدياەۆ اۋەجاي تەرمينالىنىڭ عيماراتى مەن ۇشۋ-قونۋ جولاعىنىڭ جوندەۋدەن وتكەنىن, بۇل اۋە كەمەلەرىنىڭ كەز كەلگەن ءتۇرىن قابىلداۋعا مۇمكىندىك بەرەتىنىن باياندادى. بۇدان وزگە, اۋەجاي پەررونىن كەڭەيتۋ جانە كىرمە جولدى جوندەۋ جوسپارلانعان. پەتروپاۆل اۋەجايىن جوندەۋ رەسەي فەدەراتسياسىنىڭ قورعان, تۇمەن جانە ومبى وبلىستارىمەن شەكارالاس سولتۇستىك قازاقستان وبلىسىنىڭ ترانزيتتىك الەۋەتىن تيىمدىرەك پايدالانۋعا مۇمكىندىك بەرەدى.
جۇمىس ساپارى كەزىندە باقىتجان ساعىنتاەۆ «نۇرلى جەر» باعدارلاماسى اياسىنداعى تۇرعىن ءۇي قۇرىلىسىنىڭ بارىسىمەن, پەتروپاۆلدىڭ «نۇرلى جول» باعدارلاماسى اياسىنداعى الەۋمەتتىك جانە ينفراقۇرىلىمدىق نىساندارىمەن تانىسادى دەپ كوزدەلگەن. ءوڭىردىڭ ونەركاسىپ كاسىپورىندارى مەن مەديتسينا مەكەمەلەرىن, اۋىل شارۋاشىلىعى كەشەندەرىن ارالاۋ جوسپاردا بار.
قر پرەمەر-ءمينيسترى باقىتجان ساعىنتاەۆ اوك دامىتۋ مەملەكەتتىك باعدارلاماسىن ىسكە اسىرۋ بويىنشا اقمولا, سولتۇستىك قازاقستان, قوستاناي, قاراعاندى, پاۆلودار وبلىستارىنىڭ اكىمدىكتەرى مەن اۋىل شارۋاشىلىعى قۇرىلىمدارىنىڭ باسشىلارىنىڭ قاتىسۋىمەن رەسپۋبليكالىق كەڭەس وتكىزەدى دەپ كۇتىلۋدە. «اتامەكەن» ۇكپ وڭىرلىك كەڭەسىنىڭ مۇشەلەرىمەن كەزدەسۋدە شاعىن جانە ورتا بيزنەستى دامىتۋ, كاسىپكەرلىك ورتاسىن قايتا رەتتەۋ, وبلىستا ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ ماسەلەلەرى تالقىلانادى.
سونداي-اق, جۇمىس ساپارى اياسىندا قر پرەمەر-ءمينيسترى باقىتجان ساعىنتاەۆتىڭ توراعالىعىمەن تەحنولوگيالىق جاڭعىرتۋ, تسيفرلاندىرۋ جانە يندۋستريا 4.0 ەلەمەنتتەرىن ەنگىزۋ, يدمب-2 ىسكە اسىرۋ جانە ينۆەستيتسيالار تارتۋ ماسەلەلەرىن تالقىلاۋ بويىنشا جۇمىس كەڭەسىن وتكىزۋ جوسپارلانعان. باقىتجان ساعىنتاەۆ بيىل كوكتەمدە سۋ دەڭگەيىنىڭ كوتەرىلۋىنەن زالال تارتقان زارەچنىي كەنتىندە سۋ تاسقىندارىن ەسكەرتۋ مەن ولاردىڭ سالدارلارىن جويۋ بويىنشا كوشپەلى كەڭەس وتكىزەدى دەپ كوزدەلىپ وتىر.
