مامانداردىڭ مالىمەتىنشە, حالىقارالىق شارانىڭ سالتاناتتى اشىلۋىنان بەرى كورەرمەندەردىڭ جالپى سانى شامامەن 1 ميلليون 200 مىڭدى قۇراعان. ەكسپو-نىڭ بارلىق نىساندارىنىڭ كەلۋشىلەرىن ەسەپتەسەك, وتكەن اپتادا 8 ميلليون 890 مىڭ ادام پاۆيلوندارعا كىرىپ-شىققان.
تانىمال پاۆيلونداردىڭ قاتارىن ەفيوپيا, يۋار, ماداگاسكار, كەنيا, سەررا-لەونە سەكىلدى 21 مەملەكەتتەن تۇراتىن افريكا پلازا باستاپ تۇر. ايتا كەتەرلىگى, مۇندا تابان تىرەگەن قوناقتار افريكالىقتارمەن فوتوعا تۇسۋگە تىرىسادى. ءتىپتى سول ءۇشىن ۇزىن-سونار كەزەكتەر پايدا بولعان. سۋرەتكە تۇسۋشىلەردىڭ كوپتىگى سونشا, كەيبىر مەملەكەتتەر فوتوعا تۇسكەنى ءۇشىن ايىپپۇل سالىناتىنى تۋرالى حابارلامالار دا ءىلىپ قويعان. بىرقاتار ەلدەر فوتوعا تۇسۋگە تىيىم سالسا دا, گانادان كەلگەن انكوما بواتەنگ قازاقستاندىقتاردىڭ ءوتىنىشىن ەلەۋسىز قالدىرعان ەمەس. «فوتوعا ءتۇسۋ دە وڭاي ەمەس ەكەن, شارشايمىز. دەگەنمەن, بۇل جاقتاعى ادامدار ءبىز سياقتى قارا ءناسىلدى ازاماتتاردى كوپ كورمەيدى. ونى دا جاقسى تۇسىنەمىز. فوتوعا ءتۇسۋدىڭ ءوزى ادامدار اراسىندا بايلانىس ورناتۋعا سەبەپ بولادى», دەگەن ول بۇرىن باتىس افريكانىڭ تۇرعىندارى دا باسقا ادامدارعا تاڭىرقاپ قارايتىنىن جەتكىزدى. قازىرگى كەزدە ابدەن ۇيرەنگەن كورىنەدى.
اپتاداعى تانىمالداردىڭ ءتىزىمىن مىسىر پاۆيلونى جالعايدى. ءۇشىنشى ورىندا رەسەي, سودان كەيىن تۇركيا, جاپونيا پاۆيلوندارى بەستىكتى تولتىرىپ تۇر. التىنشى ورىندا ءۇندىستان پاۆيلونى بولسا, رەتتىك سانمەن ساۋد ارابياسى, وزبەكستان, تايلاند پاۆيلوندارى ورنالاسقان. وندىقتى مالايزيا مەن گەرمانيا پاۆيلوندارى اياقتاپتى.
مەديا ورتالىقتىڭ حابارلاۋىنشا, وتكەن اپتادا كورمە اۋماعىندا 169 وقيعا تىركەلدى. ولاردىڭ كوپشىلىگى جوعالعان بالالاردى ىزدەۋگە, قوعامدىق ءتارتىپتى بۇزۋعا جانە ءسپيرتتى ىشىمدىك ىشۋگە بايلانىستى بولعان. ال قاۋىپسىزدىك قىزمەتكەرلەرى, اسىرەسە, بالالارعا اباي بولۋدى ەسكەرتەدى.
اسحات رايقۇل,
"ەگەمەن قازاقستان"
سۋرەتتى تۇسىرگەن ورىنباي بالمۇرات,
"ەگەمەن قازاقستان"
