2014 جىلى قازاقستاندا «Galam TV» ينتەرنەت ارقىلى حابار تاراتۋ قىزمەتى جۇمىس ىستەگەن. الايدا, سۇرانىستىڭ از بولۋىنان, ياعني Chrome, Opera, Yandex, Internet Explorer براۋزەرلەرىندە جۇمىس ىستەمەگەندىكتەن, موبيلدىك قوسىمشاسى تولىق دايىندالماعاندىقتان, سونداي-اق, وزگە دە ءتۇرلى سەبەپتەرگە بايلانىستى جۇمىسى توقتاپ قالعان بولاتىن.
«بيىل اقپارات جانە كوممۋنيكاتسيالار مينيسترلىگى مەن «قازتەلراديو» اق «Galam TV» جوباسىن قايتادان جانداندىرىپ وتىر. قازىر ونىڭ موبيلدىك قوسىمشاسىن Google Play جانە AppStore ارقىلى جۇكتەپ الۋعا بولادى. سونىمەن قاتار, كەز كەلگەن براۋزەردەن قولدانۋ مۇمكىندىگى بار», دەپ جازدى داۋرەن اباەۆ.
الەمنىڭ كەز كەلگەن جەرىندە تەلەارنانىڭ ءارحيۆىن, باعدارلامالارىن قايتالاپ تەگىن كورۋگە, باعدارلاما كەستەسىن جوسپارلاۋعا بولادى.
جوبانىڭ كەلەسى جاڭعىرتىلۋ كەزەڭىندە «سۇرانىس بويىنشا ۆيدەو», رەيتينگتى جۇيە, جەكە كابينەت سەكىلدى بىرنەشە جاڭا قىزمەت ىسكە قوسۋ جوسپارلانىپ وتىر.
قازىرگى ۋاقىتتا «Galam TV» تەگىن جۇمىس ىستەيدى. مۇندا قازاقستاننىڭ 24 تەلەارناسىن كورۋگە مۇمكىندىك بار, سونداي-اق جىل سوڭىنا دەيىن قولجەتىمدى تاريفتەر بويىنشا شەتەلدىڭ 100 تەلەارناسى قوسىلادى.
جوبانى دامىتۋ ماقساتىندا مينيسترلىك قازاقستاندىق كىتاپتار, عىلىمي جاريالانىمدار مەن جۋرنالدار, مۋزىكا, فيلمدەر, سونداي-اق وزگە دە كونتەنتتىڭ ساندىق بازاسىن قۇرۋدى جوسپارلاپ وتىر.
