«جاسىل ەل» باعدارلاماسى جازعى ماۋسىم كەزىندە ستۋدەنت-جاستاردى جۇمىسپەن قامتۋعا ۇلەس قوسىپ كەلەدى. پاۆلودار وڭىرىندە بيىل 2 مىڭنان استام جاس باعدارلاما اياسىندا ەڭبەك ەتپەك. جاستار قازىر زامانعا ساي جاڭاشىلدىقتى جاقسى كورەدى, ءومىردىڭ ءار سالاسىنا «جاسىل ەلدىڭ» ءىزىن قالدىرعىسى كەلەدى. مىسالى, بىلتىر جاستاردىڭ «سۋ استى» جاساعى باياناۋىلداعى جاسىباي كولىنىڭ ءتۇبىن تازالاۋ جۇمىستارىنا, ارحەولوگيالىق توپپەن بىرگە لەبياجى اۋدانىنداعى ءبورىلى كولىنىڭ ماڭىندا قازبا جۇمىستارىن جۇرگىزۋگە قاتىستى. سونىمەن بىرگە «كرەاتيۆنىي پاۆلودار» اەروگرافيالىق جاساعى, «جاردەم تايم» قالپىنا كەلتىرۋ جاساعى, «جاسىل ەل باقشالىعى» ساياجاي جاساعى جانە قۇرىلىس جاساعى ىسكە كىرىستى. جاز بويى ەڭبەك جاساقتارى قاتارىندا 2500 «جاسىلەلدىك» ستۋدەنت ەڭبەك ەتەدى. ولاردىڭ قاتارىندا وقۋشىلار دا بار. ستۋدەنتتەر, جۇمىسسىز جاستار, ءبارى بىرگە قۇرىلىستا جانە الەۋمەتتىك نىسانداردا ەڭبەك ەتۋدە, اباتتاندىرۋ مەن كوگالداندىرۋعا, ساياباقتار مەن وزەندەردى تازالاۋ جۇمىستارىنا قاتىسۋدا.
ال, «جاسىل ەل» قالالىق شتابىنىڭ كومانديرى ورازالى سارسەنوۆتىڭ ايتۋىنشا, «جاسىل ەل» وبلىستىق ەڭبەك جاساقتارى قالاداعى تۇرعىن ءۇي-كوممۋنالدىق شارۋاشىلىعى بولىمىمەن بىرلەسىپ سەنبىلىكتەر وتكىزەدى. ءتىپتى 400-دەن استام قاپ قوقىس جيناپ بەرىپتى. سوندىقتان, سەنبىلىككە قاتىسقان قىز-جىگىتتەر الەۋمەتتىك جەلىدەگى پاراقشالارىنا جيناعان جەر ەمەس, قوقىس تاستامايتىن جەر تازا ەكەنىن ءبىلۋ تۋرالى جازدى.
– ارقايسىمىز قورشاعان ورتا, تۋعان جەرىمىز ءۇشىن جاۋاپكەرشىلىگىمىزدى سەزىنۋىمىز قاجەت, بۇل – ءبىزدىڭ ءۇيىمىز, دەيدى «جاسىلەلدىكتەر».
ستۋدەنت جاستاردان قۇرالعان قۇرىلىس جاساقتارى قازىر وبلىس ورتالىعىنداعى «جاردەم» جشس-مەن بىرلەسىپ, «نۇرلى جول» باعدارلاماسىنىڭ جاڭادان سالىنىپ جاتقان نىساندارىندا ەڭبەك ەتۋدە. ال, بيىلعى جازدا «جاسىل ەل باعبانشىلىعى» دەپ اتالاتىن جاستار ەڭبەك جاساعىنىڭ تاعى ءبىر جاڭاشىلدىعىن ەستىدىك. جاستار مۇگەدەك جاندارعا ارناپ كارتوپ وتىرعىزدى. بەلسەندىلەردىڭ ايتۋىنشا, ستۋدەنتتەر جاز بويى ەككەن ونىمدەرىن كۇتىپ, باپتاپ, كۇزدە مۇگەدەك جانداردىڭ ۇيلەرىنە اپارادى. بۇل شارا «جاسىل ەل» جوباسى اياسىندا جاس ۇرپاقتى ەڭبەكتى باعالاۋعا ۇيرەتەدى. ەڭبەكاقىلارى – 65-70 مىڭ تەڭگە. سوندىقتان, جاستار جاساعىنىڭ قاتارىندا ەڭبەك ەتكىسى كەلەتىندەر كوبەيەرى ءسوزسىز. «جاسىل ەلدىڭ» ەكىنشى كەزەڭى شىلدە ايىندا باستالدى. جاستار باسقارماسىنىڭ باسشىسى ناتاليا نەفەدوۆانىڭ ايتۋىنشا, «جاسىل ەل» ەڭبەك جاساعى جىل بويىنا, دەمالىسسىز ەڭبەك ەتەدى. ەندىگى ماسەلە – جازعى ماۋسىمدا ەڭبەك جاساقتارىندا جۇرگەن جاستارعا ارنايى كيىم قاجەتتىگى ايتىلۋدا. سوندىقتان, باسقارما بىرىڭعاي ەڭبەك فورماسىنا تاپسىرىس بەرمەكشى. ويتكەنى, «جاسىل ەل» جاساعىنىڭ جاستارى, ستۋدەنتتەر قىستا قار تازالاۋ جۇمىستارىنا, كوكتەم, جاز كۇز مەزگىلدەرىندە دە ناۋقاندىق جۇمىستارعا قاتىسۋدا. جازعى ماۋسىمدا ەكولوگيالىق, قۇرىلىس, ۇگىت-ناسيحات ءتارىزدى وتريادتاردا ەڭبەك ەتسە, كۇزدە ەگىن جيناۋ, قالا ىشىندەگى باقتاردا جاپىراقتاردى جيناۋ مەن قوقىستاردان تازارتۋ جۇمىستارىنا جىبەرىلەدى. جاستار ەڭبەك جاساقتارىنىڭ اراسىنداعى رەسپۋبليكالىق دەڭگەيدە ءبىزدىڭ پاۆلودارلىق «جاسىل ەل» ستۋدەنت-جاستار جاساعى جىل سايىن ۇزدىك كورسەتكىشتەرگە يە بوپ كەلەدى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن ايگۇل ەسەنالي
