اسىرەسە, ونىڭ اياسىندا ءوتىپ جاتقان ادەبي, مادەني شارالاردىڭ ىشىندە ءبىز ءۇشىن تەاتر ۇجىمدارى قويىلىمدارىنىڭ ورنى بولەك. ماسەلەن, سوڭعى ءبىر-ەكى اي بەدەرىندە ەلىمىزدىڭ تەاتر ومىرىندە قانشاما ايتۋلى وقيعالار بولدى. حالىقارالىق مارتەبەسى بار ەكى بىردەي فەستيۆال – «ساحنادان سالەم!» مەن ا.ءاشىموۆتىڭ 80 جىلدىعىنا ارنالىپ, تۇڭعىش رەت وتكىزىلگەن دۇنيەجۇزىلىك «استانا» تەاتر فەستيۆالى وسى ايتىپ وتىرعان ويىمىزدىڭ جارقىن دالەلى ىسپەتتى. قازاق ەلىنىڭ توبەلى تورىنە الىس-جاقىن شەتەلدەردەن نەبىر مايتالمان ساراپشىلار مەن ساحنا ساڭلاقتارىن وزدىرىپ, قازاقستان دامىعان مادەنيەتى مەن ونەرى ارقىلى دا ەڭسەسى تىكتەلىپ, ەندىگى كولبەگەن ەڭسەلى ەل ەكەنىن تانىتۋدا. ەلىمىزدەگى ەڭ ۇلكەن ونەر وشاقتارىنىڭ ءبىرى سانالاتىن قازاق مەملەكەتتىك اكادەميالىق ع.مۇسىرەپوۆ اتىنداعى بالالار مەن جاسوسپىرىمدەر تەاترى ەكسپو-2017 حالىقارالىق مامانداندىرىلعان كورمەسى مەن استانا كۇنى قۇرمەتىنە ەلوردادا ونەر كورسەتتى. «ەتنواۋىل» ۇلتتىق مادەني كەشەنىندە بايعالي ەسەناليەۆتىڭ «بازارىڭ تارقاماسىن» مۋزىكالىق دراماسىمەن باستالعان ونەر ساپارى «استانا بالەت» تەاترىندا تارتىمدى رەپەرتۋارمەن جالعاسىن تاپتى.
سونىڭ ءبىرى, «قارا شەكپەن» ءافساناسى تۇركيا مەملەكەتىنىڭ كونيا قالاسىندا وتكەن «مىڭ تىنىس – ءبىر داۋىس» اتتى حالىقارالىق جانە رەسپۋبليكالىق تەاترلار فەستيۆالىنە قاتىسقان, تەاتر رەپەرتۋارىنداعى شوقتىعى بيىك قويىلىمداردىڭ ءبىرى بولىپ سانالادى. ءافسانانىڭ اۆتورى – گ.حۋگاەۆ. ق.تولەۋىشوۆ اۋدارماسىمەن ساحنالانعان تۋىندىنىڭ رەجيسسەرى – اسحات ماەميروۆ. «جەر بەتىن مەكەندەيتىن ون سەگىز مىڭ عالامنىڭ ىشىندەگى ەڭ قۇدىرەتتىسى دە, ەڭ اقىلدىسى دا, ەڭ ادەمىسى دە – ادام...» – دەپ ءۇن قاتادى تۇزار (يت), ءافسانانىڭ باستى كەيىپكەرى. ال ءبىز ءدال وسىنداي «دارەجەگە» راسىمەن, لايىقپىز با؟! اۆتور جەر بەتىندەگى بۇكىل ادامزات بالاسىنىڭ قايعى-قاسىرەتىنىڭ باستى سەبەبىن ىزدەپ, كوپشىلىككە استارلى وي تاستايدى.
«قارا شەكپەن» سپەكتاكلى – ادامدار اراسىندا جوعالىپ بارا جاتقان ادالدىق پەن شىنايىلىقتى, ادامگەرشىلىك پەن دوستىق قارىم-قاتىناس قاسيەتتەرىن قادىرلەۋگە ۇندەيتىن قۇندى دۇنيە.
مۇسىرەپوۆتىكتەردىڭ استانا كۇنى مەرەكەسىنە تارتۋلارى ىشىندە ۋ.شەكسپيردىڭ ء«بىر سەن ءۇشىن تۋدىم...» تراگەدياسى ەرەكشە ورىن الادى. ابىز جازۋشى ءابىش كەكىلباي ۇلى اۋدارماسىمەن رەجيسسەر جۇلدىزبەك جۇمانباي ساحنالاعان تۋىندى ماحاببات مايدانىن جىرلايدى.
ماڭگى ماحاببات بار جەردە, ماڭگى ماشاقات بار. اۋلەت پەن اۋلەت, توپ پەن توپ, توبىر مەن توبىردىڭ كەسىرىنەن قانشاما قان توگىلدى, قانشاما ماحاببات يەسى قۇربان بولدى. ىقىلىم زاماننان كەلە جاتقان ادامزاتتىق احۋال وسى.
شەكسپيردىڭ «رومەو مەن دجۋلەتتاسى» دا – سولاردىڭ كەبى... شەكسپيردىڭ 400 جىلدىعىنا ارنالعان بۇل قويىلىمنىڭ باستى ەرەكشەلىگى جانە ءتول ونەرگە ەتەنە جاقىندىعى – شاكارىم قۇدايبەردى ۇلىنىڭ ولەڭدەرىمەن كوركەمدەلۋى. قازاقتىڭ ۇلتتىق ماحاببات داستاندارىنىڭ سارىنىنا جاقىنداتىپ, «دۋدار-اي» ءانى لەيتموتيۆى بولعان «رومەو مەن دجۋلەتتا» تراگەدياسى ء«بىر سەن ءۇشىن تۋدىم...» دەگەن اتپەن كورەرمەنگە جول تارتقان ەكەن. قويىلىم رۋحاني قۇندىلىقتارعا كوزقاراس پەن تۇسىنىك كومەسكى تارتا باستاعان اسىرەسە قازىرگى زامان ءۇشىن وتە-موتە ماڭىزدى بولىپ قالا بەرمەك.
قاراشاش توقسانباي,
«ەگەمەن قازاقستان»
