قالىپتاسقاندا, ول كەشەلى-بۇگىن عانا ەمەس, بۇرىننان-اق سولاي. ال ەندى مۇنىڭ سەبەبى نەدە دەگەن زاڭدى سۇراق تۋىندايدى. ارينە, شەنەۋنىك دەگەن ۇعىمنىڭ ءوزى ءبىزدىڭ ساحارامىزعا, سايىن دالامىزعا ورىس پاتشالىعىنىڭ وتارشىلدىعىمەن بىرگە كەلگەنى ءمالىم-ءدۇر. ەڭ باستى كىلتيپان وسىندا. لاپبايلاعان لىپىلداق جاعىمپازدىق, ارىزقويلىق, جالتاقتىق پەن جاسقانشاقتىق, جىلپوستىق پەن جاندايشاپتىق سىقىلدى سىرقاتتار سۇيەككە وسىلايشا وڭدىرماستاي ءسىڭدى, قانعا قاراۋلانا قالىڭ ارالاستى. توتاليتاريزم تىتىرەتكەن كەزەنەيلى كەزەڭدەردە ء«بولىپ ال دا, بيلەي بەر» دەگەن باياعى سايقال ساياسات سۇرقيا سيپاتتارعا يە بولىپ, ودان ارمەن اسقىنا ءتۇستى. سول زامانداردىڭ بارىندە دە ءتۇرلى ءۇردىس-ۇدەرىستەردىڭ, قيلى قۇبىلىستاردىڭ بەل ورتاسىندا شەنەۋنىكتەر ءجۇردى. نيكولاي پاتشاڭىزدىڭ ءوزى رەسەيدىڭ سىرقىراعان دەرتتەرى سىنالعان كەزدە كۇڭىرەنە كىرجيىپ: «بۇل ەلدى تەك مەن عانا ەمەس, پالەن مىڭ شەنەۋنىك بيلەپ وتىر ەمەس پە؟!» دەگەن عوي.
حو-وش دەلىك. كەزەنەيلى كەزەڭدەر كەلمەسكە كەتتى. اللاعا شۇكىر, ەگەمەن ەلمىز. تاۋەلسىزدىككە تاۋبە دەيمىز. سوندا دا, وكىنىشكە قاراي, شەنەۋنىكتەرگە دەگەن كوزقاراس كوپ اسا وزگەرە قويماعانداي. قايتا كەي رەتتەردە كەرى كەتىپ بارا جاتقانداي دا سەزىلەدى. باسپاسوزدە دە, باسقا سوزدە دە شەنەۋنىكتەردىڭ ۇلكەندەرى مەن كىشىلەرى, جوعارعىلارى مەن تومەندەگىلەرى «تومپەشتەلەدى-اي» كەلىپ.
...قىسقارتا قايىرساق, قوعامدىق پىكىر اۋانىنىڭ اۋىتقىعان كۇيىنەن ونشا وزگەرمەۋىندە شەنەۋنىكتەردىڭ ءوز كىنالارى مەن ءوز كۇنالارى دا از ەمەس-اۋ. الايدا, تاۋەلسىز مەملەكەتىمىزدەگى شەنەۋنىكتەردىڭ بارشاسىنا بىردەي «وي, قويشى سولاردى!» دەپ قول سىلتەي سالۋ, ۇنەمى قارا كۇيە جاعا بەرۋ قالاي بولار ەكەن؟ ەگەمەندىككە قول جەتكەلى ەل مۇددەسىنە قالتقىسىز قىزمەت ەتىپ, كۇنى-ءتۇنى تىنىم تاپپاي, ەرەندىك پەن تەرەڭدىك, كەمەلدىك پەن كەمەڭگەرلىك كورسەتىپ, تەكتىلىك تانىتىپ كەلە جاتقان شەنەۋنىكتەر بارشىلىق قوي, اعايىن. وبىرلىق پەن جەبىرلىكتەن, قۇنىعۋ مەن قاناعاتسىزدىقتان اۋلاعىراق مەمقىزمەتكەرلەر نەبىر مينيسترلىكتەردە, وبلىستىق, قالالىق, اۋداندىق جانە اۋىلدىق اتقارۋشى ورگانداردا, بيلىكتىڭ باسقا دا بۋىن-بۋناقتارىندا, مىڭعىرعان مەكەمەلەردە از ەمەس قوي. بايتاعىڭىز بويىنشا جۇزدەپ, مىڭداپ سانالار. سوندىقتان دا باس گازەتىمىزدە «تاۋەلسىزدىك جانە شەنەۋنىك» دەگەن ايدار اشىپ, جان-جاقتى ماسەلە كوتەرسەك, وي قوزعاپ, پىكىر قوزداتىپ, جالپى ماقساتقا جاردەمدەسسەك ءجون-اق بولار ەدى. دەيمىز. ءبىز.
...ۇلاسبەك اكەسىنەن ون ءبىر جاسىندا ايىرىلىپ قالعان. قارىنداستارى گۇلسارا ون جاستا, گۇلنار سەگىزدە, جانات تورتتە, پەريزات ەكىدە عانا ەدى. اياۋلى انالارى ىڭكار اڭىراي بوزداعانىمەن, امال قانشا. اجال ايلا تاپتىرماس. جول اپاتى.
الىستاعى اۋىلدا, اناسىنىڭ قاباعىنا قاراپ ءوستى. ەرتە ەسەيدى. اكەسىنىڭ باۋىرى ابىلدابەكتەي اقجارىلقاپ ازاماتتىڭ قامقورلىعىمەن ەر جەتتى. اۋىل مەكتەبىن ۇزدىك ءبىتىردى. الدەكىمدەر سەكىلدى تامىر-تانىس ساعالامادى. تسەلينوگرادقا تارتتى دا كەتتى. اۋىل شارۋاشىلىعى ينستيتۋتىنا ءتۇستى. بۇل 1984 جىل ەدى. اتىشۋلى «قايتا قۇرۋدىڭ» قارساڭى. قالا تۇرعىندارىنىڭ سەكسەن بەس پايىزى – ورىستىلدىلەر. شاعىن شاھاردىڭ پوبەدا, تسەليننيكي, مير تۇرپاتتاس ءتورت-بەس نەگىزگى كوشەسى, ەكى ءجۇز مىڭ شاماسىندا حالقى بار-تۇعىن.
اۋىل شارۋاشىلىعى ينستيتۋتىندا اۋىلدان بارعان بوزبالالاردىڭ باسىم كوپشىلىگى وقي المادى. ورىسشا وقۋدىڭ ازابىنا شىدامادى. ۇلاسبەك بارىنە ءتوزدى. كۇنى-ءتۇنى كوز ىلمەي, ءتىل ۇيرەندى. الايدا, ءىشى شىركىن اشىعاندا-ا-ا. ايتپاڭىز! «قازاق بولىپ تۋامىز. اۋىلدا تۇرامىز. تۋعان توپىراقتا وسەمىز. قازاقشا مەكتەپتە وقيمىز. ال ەندى نەگە عانا جوعارى وقۋ ورىندارىندا, ونىڭ ىشىندە اۋىل شارۋاشىلىعى ءۇشىن ماماندار دايارلايتىن ينستيتۋتتا ساباقتىڭ ءبارى, دارىستەر تۇگەلدەي تەك ورىسشا ءجۇرۋى كەرەك؟!» ۇلاسبەگىڭىزدىڭ ىشكى الەمى ۇليدى-اي. ءوستىپ. وكسىپ. سى-سى-سىرىڭىزدا «قايتا قۇرۋ» ناۋقانىنىڭ قاربالاستارى قىزعان. سادىبەكوۆ سوۆەت ارمياسى قاتارىنا الىنعان. ەكىنشى كۋرستان. ماسكەۋىڭىزدىڭ ماڭايىنداعى اسكەري بولىمدە ۇلگىلى جاۋىنگەر سانالىپ جۇرگەن. 1986 جىلعى جەلتوقسان كوتەرىلىسىنەن كەيىن اسكەردەگى قازاقتارعا دەگەن كوزقاراس قاتتى قيىنداعان. «ونەگەلى سولدات, كوممۋنيست بولۋعا لايىق» دەسەتىندەر كەنەت كۇرەڭىتە سۋىنعان. تابان استىنان ۇلتشىلدار تىزىمىنە ىلىككەن. سادىبەكوۆ.
1987 جىلى تسەلينوگرادقا شيرىعىپ ورالدى. قوعامدىق جۇمىستارعا شيراق تا شاپشاڭ ارالاستى. بۇل ەندى بۇرىنعى, بۇيىعىلاۋ ۇلاسبەك ەمەس-ءتى. باسقاشالاۋ بولىپ قايتقان. ماسكەۋدىڭ ماڭايىنان. كەلە سالا ستۋدەنتتەردىڭ كوشباسشىلىعىنا كوتەرىلگەن. جازۋشى الدان سمايىلوۆتاي اعالارىمەن اقىلداسىپ, «پاراسات» مادەني-اعارتۋ بىرلەستىگى مەن «شاتتىق» ونەر ورتالىعىن قۇرعان. ستۋدەنت جاستارعا جەتەكشىلىك جاساپ, «ۇلتتىق رۋحتى ءبىز كوتەرمەسەك, كىم كوتەرەدى؟! جاستاردى ۇلتتىق سالت-داستۇرگە, تاريح پەن مادەني قۇندىلىقتارعا تاربيەلەيىك!» دەپ باستاما كوتەرگەن. ەندى بىردە ەكى مىڭنان اسا ادام قاتىسقان جيىن ۇيىمداستىرىپ, توتاليتاريزم تىتىرەتىپ تۇرعان كەزدىڭ وزىندە جەلتوقسان كوتەرىلىسىن تسەلينوگرادتا العاش رەت اتاپ وتۋگە اتسالىسقان. مىنبەرگە كوتەرىلىپ: ء«بىز بۇگىن جەلتوقسان وقيعاسى كەزىندە جازىقسىز جاپا شەگىپ, قۇربان بولعان ورىمدەي جاستارىمىزدى العاش رەت ەسكە الىپ وتىرمىز. بۇل جيىننىڭ وتكىزىلۋىنە جەرگىلىكتى وكىمەت رۇقسات بەرمەي, قانشا سوزسا دا, ماقساتقا جەتتىك!» دەپ جالىندى ءسوز سويلەپ تۇردى. كوپ ۇزاماي-اق قازاق تىلىندە مەكتەپ ءبىتىرىپ, جوعارى وقۋ ورىندارىندا قاتتى قينالاتىن ستۋدەنتتەرگە قامقورلىق جاساۋ جونىندە ماسەلە كوتەردى. قالالىق پارتيا كوميتەتىنىڭ باسشىسىنا كىرىپ, جاڭا اشىلعان دراما تەاترىنىڭ اكتەرلارىنا تۇرعىن ءۇي ءبولۋدى تاباندى تۇردە تالاپ ەتتى. سادىبەكوۆتىڭ باستاماسىمەن تسەلينوگرادتا شەتقاقپايلانىپ, جولاتىلماي جۇرگەن «قىز سىنى», «جىگىت سۇلتانى», «كوكتەم مەرەكەسى», «ساياسي سايىس» سياقتى جارىستار مەن بايقاۋلار ءوتىپ, ۇلاسبەگىڭىز بۇكىل قازاقستانعا ماشھۇرلەندى. 1992 جىلى العاش رەت قالالىق جاستار ءىسى جونىندەگى كوميتەت قۇرىلعاندا شە؟ ونىڭ تۇڭعىش توراعالىعىنا تاعايىندالدى. تاۋەلسىزدىكتىڭ دە ارقاسى عوي, ارينە.
اناسىنىڭ تىلەگىن قيمادى. امالسىز اۋىلىنا ورالدى. اۋداندىق ىشكى ساياسات ءبولىمىنىڭ ەڭ تومەنگى دەڭگەيىندەگى مامانى بولىپ ازەر ورنالاستى. الايدا, تىڭ تىنىس, جادىراڭقى لەپ تانىتپاقتان تانبايتىن تالانت قارىمى تانىلىپ, كوپ كەشىكپەي-اق باس مامان, ودان كەيىن جاستار ءىسى جانە سپورت ءبولىمىنىڭ باسشىسى, سونسوڭ اۋدان اكىمىنىڭ ورىنباسارى قىزمەتتەرىن اتقاردى. بايدىبەك اۋدانى اكىمىنىڭ ورىنباسارى بولىپ جۇرگەندە عوي, اۋىلدار مەن مەكتەپتەردى, فەلدشەرلىك-اكۋشەرلىك بەكەتتەردى جالىقپاي جاياۋ ارالايتىن. قايبىر جولى تاۋ تۇكپىرىندەگى شاعىن اۋىلدارعا ماشينەسى جەتە الماستان, قاراپايىم وتباسىلاردى كۇنى-ءتۇنى كورىپ ءجۇرىپ, تابانى ويىلىپ, اۋرۋحاناعا جاتىپ شىققانىن جۇرت ءالى كۇنگە دەيىن اڭىز قىپ ايتادى. «سول ءبىر اۋىر كەزەڭدە اۋدانداعى اۋىل كلۋبتارى مەن كىتاپحانالار, مەكتەپتەر جانىنداعى ينتەرناتتار جويى-لىپ كەتپەي, امان ساقتالىپ قالسا, سول سادىبەكوۆتىڭ ەڭبەگى», دەسەدى اۋىل ادامدارى.
ۇلاسبەك تۋرالى العاشقى ماقالامىز «ەگەمەندە» جاريالانعاندا سادىبەكوۆ وبلىس اكىمىنىڭ اپپاراتىندا الەۋمەتتىك-مادەني كەشەن ءبولىمىن باسقاراتىن شەنەۋنىك-تۇعىن. ۇلكەن وڭىردەگى ءبىلىم بەرۋ, دەنساۋلىق ساقتاۋ, مادەنيەت, تاعى باسقا ءبىراز سالالاردىڭ جۇمىسىن ۇيلەستىرەتىن. ەلىڭىزدەگى ەڭ كوپ مەكتەپ, ەڭ كوپ اۋرۋحانا, ەڭ كوپ مادەني مەكەمە وسى وبلىستا. ءۇش ميلليونعا تارتا حالقى بار. شارۋا شاش-ەتەكتەن. اعىمداعى الۋان تىرلىكتەر. قۇجاتتار. قاعازدار. جيىندار. سەمينارلار. تاجىريبە الماسۋلار. وقۋلار. ۇيىمداستىرۋ. ۇيلەستىرۋ. تالداۋلار. بولجاۋلار...
«ۇلاسبەكتى شەنەۋنىك دەگەن قالاي بولار ەكەن؟ ونى كوپكە ۇنايتىن, ۇناسىمدى, ناعىز بۇگىنگى مەمقىزمەتكەر, بىلىكتى باسشى دەگەن ءجون شىعار».
«شەنەۋنىكتەرشە شىرەنۋ, كوكىرەك كوتەرۋ دەگەن وعان مۇلدە جات. اتتەڭ, بىزدە اۋداندار مەن قالالار ازداۋ عوي. ايتپەسە, اكىم بولاتىن, حالقىنا جاقىن بولاتىن كادرلاردىڭ ءبىرى سول».
مۇنداي پىكىرلەردى ءجيى ەستىگەنبىز. جازعانبىز. ءبىرشاما ۋاقىت وتكەندە ۇلاسبەگىڭىز وبلىستىق ىشكى ساياسات جانە جاستار ءىسى باسقارماسىنىڭ باستىعى قىزمەتىنە جىبەرىلدى. جالىنداتتى. جاستار جاعىن.
ەكى جىل شاماسىندا بايدىبەك اۋدانىنىڭ اكىمدىگىنە تاعايىندالدى. بيىكتەرگە باستادى. تۋىپ-وسكەن ايماعىن.
تاعى دا ەكى جىلدىڭ بەلەستەرىنەن اسقاندا وڭتۇستىك قازاقستان وبلىسىنداعى ەڭ كۇردەلى ايماق سانالاتىن سارىاعاش اۋدانىن باسقارۋ سەنىپ تاپسىرىلدى. وندا دا ءبىزدىڭ كەيىپكەرىمىز تىرلىكتى دوڭگەلەتىپ اكەتكەن. كەنەت كەلەسى كوكتەمنىڭ توبەسى كەسىرلەنىپ كورىندى. اقپاننىڭ اياعى الاپات تاسقىن اكەلدى. «كىبىسە قارعىنى» دەگەن دۇنيەمىزدە ايتىڭقىراعانبىز. سول كىبىسەدەگى قىرعىن قارعىندا سەگىز اۋىلدىق اتىراپتاعى وتىز بەس ەلدى مەكەننىڭ ەكى مىڭعا تارتا ءۇيىن قىزىل سۋ قاپتاعان. بەس ورتا مەكتەپتىڭ عيماراتتارىنا تاسقىن كىرىپ, تۇگەل تالقانداعان.
كوزىمىزبەن كورگەنبىز. ورتاسىندا جۇرگەنبىز. «ەگەمەننىڭ» ارناۋلى ءتىلشىسى رەتىندە. جاپا شەككەن جاندار. توپىرلاي قۇلاعان تامدار. قيراندىعا اينالعان ءۇي-جايلار. وپىرايا ويىلعان كانالدار. جارلاۋىتتانا جارىلعان جولدار. كەسىلىپ تۇسكەن كوشەلەر. سۋعا كەتكەن م ۇلىك-مۇكاممالدار...
بۇكىل ەل كەلەسكە كومەكتەستى. سارىاعاشقا سابىلدى. ەلباسىنىڭ ءوزى تىكەلەي قاداعالاپ, قامقور بولدى. ۇكىمەت باسشىلارىن جىبەردى. ارينە, اكىمدەرگە, اسىرەسە اۋدان اكىمىنە سالماقتىڭ اسا اۋىرى تۇسكەنى تۇسىنىكتى. سادىبەكوۆىڭىز سونداي سالماققا دا, سىندارلى سىناققا دا تەكتىلىكپەن توتەپ بەردى. استانا قالاسىنىڭ ون جىلدىعى الدىندا اۋدانعا ارنايى كەلگەن مەملەكەت باسشىسى كوپتەگەن كەلەستىكتەرگە كىلت تاپسىردى. ال, كەرزى ەتىگىن تاستاي قويماعان, بەت-ءجۇزى ابدەن توتىققان اۋدان اكىمى ۇلاسبەك سادىبەك ۇلىنىڭ جانارىنان سىرعىعان تامشىلاردى جانىنداعىلاردان جاسىرا سۇرتكىلەگەنىن بىرەۋ بايقادى, ەكەۋ بايقاماعان.
تاعى دا ەكى-ءۇش جىل جىلجىدى. ول «نۇر وتان» پارتياسى وقو فيليالى توراعاسىنىڭ ءبىرىنشى ورىنباسارى بولىپ سايلاندى. سادىبەكوۆ ءستيلى جەتەكشى پارتيا جۇمىستارىنىڭ جان-جاقتى جاندانۋىنان جارقىراي كورىنگەن. ەكى جىل كولەمىندە ەلەۋلى ەڭبەك ەتكەن ۇلاسبەگىڭىز حالىقتىڭ قالاۋلىسى اتاندى. پارلامەنت ءماجىلىسىنىڭ دەپۋتاتى بولىپ, باياعى ستۋدەنتتىك جالىندى جىلدارى وتكەن, بۇگىندە تانىماستاي وزگەرگەن, مەملەكەتتىڭ مەرەيىنە, ماقتانىشىنا اينالعان استاناعا ايرىقشا تولقىنىسپەن اۋىس-تى. استانانىڭ تسەلينوگراد كەزى كوز الدىندا كولبەڭدەدى. تالاي دا تالاي تەپەرىشتەردىڭ ازابىن تارتقان, ءىشى شىركىننىڭ ۋداي اشيتىن, ءتىپتى ۇليتىن كۇڭگىرت كۇندەرىن ەلەستەتتى. تاۋەلسىزدىككە تاۋبە. دەدى. دەپۋتاتتىقتىڭ قادىر-قاسيەتىن قالاي ۇعىنباقتا اباي اتاسىنىڭ قاراسوزدەرىنەن قات-قابات جاۋاپتار تاپتى. قاتارداعى, كوپتىڭ ءبىرى بولماق بولمىسىنا جات-تۇعىن. زاڭ ازىرلەمەكتەگى قارا جۇمىستاردان قاشقاقتامادى. قاق ورتاسىندا ءجۇردى. ايانباي بەينەتتەندى. وزەكتى ماسەلەلەر كوتەرۋدەن, دەپۋتاتتىق ساۋالدار قويماقتان, جالتارتقىزباي جاۋاپ الماقتان قايمىقپادى. جوعارىدا كەلتىرگەنىمىزدەي, «ەگەمەن قازاقستاندا», باسقا دا باسىلىمداردا كۇردەلى ماسەلەلەردى كۇتىرلەتە كوتەرىپ, كۇرمەۋلى تۇيىندەردىڭ شەشىلۋىنە سەپتەستى. تاراتىپ ايتا بەرسەك, تالايعا سوزىپ الارمىز.
ال, قازىر, ءبىر جىلداي ۋاقىتتان بەرمەن قاراتا ۇلاسبەك سادىبەك ۇلى وسى وڭتۇستىك قازاقستان وبلىسى اكىمىنىڭ الەۋمەتتىك سالالار جونىندەگى ورىنباسارى. شەنەۋنىكتىك قىزمەت باسپالداقتارىن قىسقا عانا شولىپ شىقتىق قوي. ادەيىلەپ. قازاقتىڭ قالتايى (مۇحامەدجانوۆ) « ۇلىسىمنىڭ ۇيىتقىسى – وڭتۇستىك» دەگەن. تۇڭعىش پرەزيدەنتىمىز نۇرسۇلتان نازارباەۆ «وڭتۇستىكتە باق-بەرەكە, بىرلىك پەن ىنتىماق بولسا, بۇكىل بايتاعىمىزدا باق-بەرەكە, بىرلىك پەن ىنتىماق بولادى», دەگەن. جىلى جاعىڭىزدا جاسامپازدىقپەن, جاڭاشىلدىقپەن اتقارىلىپ جاتقان ابزال تىرلىكتەر از ەمەس. جارتى جىلدان استى, وڭتۇستىك وڭىرىنە بىلىكتى باسشى كەلگەن. جانسەيىت تۇيمەباەۆ. نەبىر-نەبىر جاۋاپتى ساتىلاردان, سىناقتاردان ساپالانعان. ءبىلىم جانە عىلىم ءمينيسترى بولعان. رەسەي, تۇركيا سىندى الىپ ەلدەردە ەلشىلىك ەتكەن. اسىرەسە, ءتۇبى ءبىر تۇركيادا تىندىرعان تەكتى تىرلىكتەرى الاش ارداقتىلارىنىڭ ۇلت قامى جولىنداعى ۇمتىلىس ۇلاعاتتارىنا ۇقساعان. ول كىسى وبلىس اكىمى بولعالى قانشاما يننوۆاتسيالىق جانە ينۆەستيتسيالىق جاڭا جوبالار جاسالىپ, جۇزەلەنە باستاعانىن جاي عانا ءتىزىپ شىقپاقتىڭ ءوزى ءبىراز كولەم الادى.
«تۋعان جەردى تۇلەتۋ – پەرزەنتتىك پارىز» جيىنىنا ءوڭىردىڭ وزگە جاقتارداعى وزگەشەلەۋ ورەندەرى, وسىندا تۋىپ-وسكەن تۇلەكتەرى, ەل يگىلىگى ءۇشىن ەرەكشە ەڭبەك سىڭىرگەن جانە ءسىڭىرىپ جۇرگەن بۇرىنعى باسشىلار, قاشانعى حالىق قالاۋلىلارى, مەملەكەت جانە قوعام قايراتكەرلەرى, بيزنەس يەلەرى, ءايمۇيىز اقىن-جازۋشىلار, عۇلاما عالىمدار, ونەر تارلاندارى – بارلىعى ەكى جۇزگە تارتا ەرەن شاقىرىلدى. اۋەلى اكىمدىكتە, سونسوڭ «تۇركىستان» سارايىندا تەرەڭ تەبىرەنىسپەن وتكەن باسقوسۋلار دا باسقاشا بولدى. اراسىندا اكادەميك ومىرزاق ايتباي ۇلى, اقيىق اكتەرلەر ءاسانالى ءاشىموۆ پەن ءسابيت ورازباەۆ, دۇنيە جۇزىنە ءماشھۇر دارا دراماتۋرگ, جاۋھار جازۋشى دۋلات يسابەكوۆ بار, بارشا ساڭلاقتارىڭىز مۇنداي مانىستەگى باسقوسۋدىڭ العاش مارتە ۇيىمداستىرىلىپ وتىرعانىنا قۋانا قاناتتانىپ, وزگە دە قايراتكەرلەر, قالتالىلار, ىسكەرلەر تۋعان جەردى تۇلەتپەكتە, قالالاردى گۇل ەتپەكتە پەرزەنتتىك پارىزدارىن قالاي, قايتىپ وتەمەك ويلارىن ورتاعا سالدى.
جانسەيىت قانسەيىت ۇلى تىنىمسىز. ەكونوميكانى, ونىڭ ىشىندە ونەركاسىپ پەن اۋىل شارۋاشىلىعىن ورگە باستىرماق ماقساتتاردى «بەس رەفورما: 100 ناقتى قادام» ۇلت جوسپارىنا جان-جاقتى سايكەستەندىرىپ, تالدامالى تۇجىرىمدامالار, جۇلگەلەنگەن جۇيەلەر جاساپ, ءار اۋداننىڭ ناق-ناق دامىماق باعدارلارىن بەلگىلەپ, تالاپتى قاتتى كۇشەيتتى. رۋحانيات, مادەنيەت پەن ادەبيەت, تەاتر مەن كينو, ولكەتانۋ, تاريحي مۇرالار جاعداياتتارىن اقىلداسىپ-كەڭەسىپ, كەڭ ءورىس اشپاق تالپىنىستارى دا تاڭىرقاتىپ جۇرگەنى راس.
سايىپ كەلگەندە, سادىبەكوۆىڭىزگە وقو-داعى ورىنباسارلىقتى وزىق ساپادا اتقارماق وڭاي ەمەس. تۇيمەباەۆتىڭ تىنىمسىزدىعىنا, تالاپشىلدىعىنا توتەپ بەرمەكتىڭ ءوزى تولاسسىز ىزدەنىستى, توقتاۋسىز بەينەتتى, پاراسات بيىكتەرىنە ۇمتىلىس پەن قۇلشىنىستى قاجەت ەتەتىنى ايان-ءدۇر.
تۇيىندەي كەلە, اۋەل باستاعى القيسسامىزعا از عانا نازار جىعالىق. شەنەۋنىكتەر دە قوعامنىڭ تەڭ قۇقىقتى ازاماتتارى ەت پەن سۇيەكتەن جارالعان جاندار. شەنەۋنىكتەر – مەملەكەتتەگى بيلىكتىڭ, باسقارۋ بۋىندارىنىڭ اسا ماڭىزدى, وزگەشە وكىلدەرى. مەملەكەتتىك قىزمەتكەرلەردىڭ مەملەكەتشىلدىگىنە, مورالدىق-ادامگەرشىلىك, كاسىبيلىك كەلبەتىنە, قاراپايىم حالىققا جاقىندىعىنا, ياكي ەلشىلدىگىنە, پاتريوتتىق پايىم-پاراساتىنا كوپ نارسە بايلانىستى. دەگەندەيىن جاعداياتتاردى قوزعاڭقىرادىق.
اتا زاڭىمىزدى دا, ناقتى قادامدارىمىزدى دا جاڭارتىپ, جاڭعىرتىپ جاتقاندا, جازىلعان جايدى ءھام جاڭعىرتقىمىز كەلدى. ارتىق ايتقان, كەم كەتكەن جەرلەرىمىز بولسا, عافۋ وتىنەمىز.
مارحابات بايعۇت
