مەملەكەتتىك گرانت – جاعدايى تومەن وتباسىدان شىققان جاستار ءۇشىن ۇلكەن مۇمكىندىك, ونسىز ولاردىڭ ءومىرى مۇلدەم باسقا بولماق. ءبىر سيىر مەن زەينەتاقىعا قاراپ وتىرعان جانۇيانىڭ بالاسىن الماتىداعى قازۇۋ-دا نەمەسە استاناداعى ەۇۋ-دە اقىلى وقىتۋعا استە شاماسى جەتپەس. ۇلكەن قالادا وقۋ اقىسىن تولەمەك تۇگىل جاتاتىن جەرىڭ مەن كۇندەلىكتى تاماعىڭدى تابۋدىڭ ءوزى وڭايعا سوقپايدى. وسى مەملەكەتتىك گرانتتىڭ ارقاسىندا قانشاما اۋىل بالاسى قالا كورىپ, ەلىمىزدىڭ تۇكپىر-تۇكپىرىنەن كەلگەن قۇرداستارىمەن ارالاسىپ, جاڭا ءومىر باستاۋدا. بىرەۋى وقۋدى ءساتتى اياقتاپ, بىلىكتى مامان اتانسا, بىرەۋى كاسىپ اشىپ, بىرەۋى عىلىم جولىنا تۇسۋدە. راس, اۋىلعا قايتىپ جاتقانى دا بار. مۇنىڭ دا جاقسى جاقتارى جوق ەمەس. ءتورت جىل قالادا ءجۇرىپ, ءبىلىم جيناپ, ومىرگە كوزقاراسى وزگەرگەن, تەحنولوگيانى مەڭگەرگەن جاس تۋعان جەرىنە بارسا, اۋىل وڭىرىنە وڭ وزگەرىس اكەلەدى. سوندىقتان, ەگەر تاڭداۋ گرانت نەمەسە اۋىلدا قالۋ بولسا, مەن بىرىنشىسىنە داۋىس بەرەر ەدىم.
دەگەنمەن, ءبىر نارسەنى ەستە ۇستاۋ كەرەك. «گرانت ءۇشىن كەز كەلگەن ماماندىقتى تاڭدايمىن» دەگەن ۇستانىم ءاردايىم دۇرىس شەشىم بولا بەرمەيدى. مەكتەپ وقۋشىلارىمەن سويلەسكەندە, فيزيكانى نەمەسە بيولوگيانى تاڭدادىم, سەبەبى ول بويىنشا گرانت كوپ دەپ ءجيى ايتادى. بۇل پاندەر وزىڭە قىزىق پا دەسەم, «جوق» دەپ جاۋاپ بەرەدى. بالالاردىڭ نيەتى دۇرىس, اتا-اناعا سالماق سالمايىن دەيدى. الايدا, تاڭداعان ماماندىعىڭا قىزىقپاساڭ, تۇسىنبەسەڭ, بولاشاعىڭدى كورمەسەڭ, مەملەكەتتىك گرانت ماسەلەنى تەك ءتورت جىل كەيىنگە قالدىرادى. ديپلوم العان سوڭ, ارى قاراي نە ىستەيمىن دەگەن سۇراق قايتا تۋادى. ءسويتىپ, ءتورت جىل وقىعانىم بەكەر كەتپەسىن دەپ, ۇناتپاسا دا ديپلومى بويىنشا جۇمىسقا كىرىپ, سۇيرەتىلىپ جۇرەدى. ساباقتى جاقسى وقىپ, ۋنيۆەرسيتەت باسشىلىعىنىڭ كوزىنە تۇسكەندەر ماگيستراتۋراعا ءتۇسىپ, ماسەلەنى تاعى ەكى جىلعا شەگەرىپ جاتادى. بىراق الگى سۇراق تاعى شىعادى.
وسىعان وراي اتا-انالارعا ايتارىم, شامالارىڭىز كەلگەنشە, بالاڭىزعا ۇنايتىن ماماندىعىنا وقۋعا مۇمكىندىك بەرىڭىز, ساپالى ۋنيۆەرسيتەت تاڭداڭىز. قازىر بالكىم قينالارسىز, بىراق كەيىن جەمىسىن بەرەدى. جۇرەك قالاۋىمەن تاڭداعان ماماندىق ءۇشىن ءسىز ءتورت جىل قينالاسىز, ال ماجبۇرلىكپەن تاڭداعان ماماندىق ءۇشىن بالاڭىز ءومىر بويى قينالۋى مۇمكىن.
ۇبت-دان تومەن بالل الۋ ءاردايىم بالانىڭ ءبىلىمى تومەن ەكەنىن بىلدىرە بەرمەيدى. بالاڭىز تىعىلتاياڭ ساتتە قاتتى قوبالجىپ ويىن جيناي الماۋى مۇمكىن. ۇبت-دان از جيناپ, بىراق ويلاۋ قابىلەتى دامىعان, ءبىلىمى تەرەڭ ستۋدەنتتەردى كوپ كوردىم. اقىلى بولىمگە ءتۇسىپ, تاباندىلىعىنىڭ ارقاسىندا گرانتقا اۋىسىپ, كەيىن ستۋدەنت بولا تۇرا جۇمىسقا تۇرىپ, و باستان گرانتتا وقىعان كۋرستاستارىنان وزىپ شىققاندار دا بار.
نە كوپ, زاڭگەر مەن قارجىگەر كوپ, ودان دا تەحنيكالىق ماماندىق تاڭداعان دۇرىس دەپ ويلاۋ دا كەيدە قاتەلىككە اكەلىپ جاتادى. ماسەلە اتالعان ماماندىقتى تاڭدايتىنداردىڭ كوپتىگىندە ەمەس, ماسەلە باسەكەگە دايىن بولا بىلۋدە. زاڭگەرلەر مىڭ بولسىن, ميلليون بولسىن ماڭىزدى ەمەس. ساباقتى وتە جاقسى وقىپ, ماماندىقتى مەڭگەرسەڭىز, زامان تالاپتارىنا ساي بولساڭىز, كوپتىڭ ىشىنەن ەرەكشەلەنۋگە بولادى. ومىردە پارادوكس جاعدايلار كوپ كەزدەسەدى. سولاردىڭ ءبىرى وسى زاڭ ماماندارىنىڭ كوپتىگىنە قاتىستى. ءبىر جاعىنان زاڭگەرلەر قاپتاپ كەتتى دەيمىز, ەكىنشى جاعىنان اعىلشىن ءتىلىن ەركىن قولداناتىن, حالىقارالىق زاڭنامانى بىلەتىن, تاجىريبەسى بار زاڭ ماماندارىن تابا الماي جۇرگەندەردى ءجيى كورەمىز.
تالاپكەرلەر مەن ستۋدەنتتەرگە ايتارىم, ەگەر اتا-اناڭىز قينالسا دا, وقۋدىڭ اقىسىن تولەپ, تاپقان-تايانعانىن سىزدەرگە بەرىپ وتىرسا, ونىڭ قادىرىن ءبىلىپ, بەرىلگەن 4 جىلدىق ۋاقىتتى مەيلىنشە ۇقىپتى جۇمساۋ قاجەت. كىتاپ وقۋدان كوز اشپاي, ۇيرەنۋدەن جالىقپاي, بوس ۋاقىتتى ءبىلىم جيناۋمەن وتكىزسەڭىز, اتا-انا ءۇمىتىن دە, مەملەكەت ءۇمىتىن دە اقتايسىز جانە ومىردە جەتىستىككە جەتەسىز. ۇزدىك بولۋعا, كاسىبي شىڭدالۋعا ۇمتىلۋ قاجەت.
