عالىم كەنجەبەكوۆ باپتايتىن قازاقستان جاستار ۇلتتىق قۇراماسى ازيا بىرىنشىلىگىنە تولىق قۇرامدا قاتىستى. 10 سالماق دارەجەسىندە باسەكەگە تۇسكەن قازاقستاندىق بوكسشىلار چەمپيونات قورىتىندىسى بويىنشا, جالپى سانى جەتى مەدال يەلەندى. اعايىندى ءساماتالى مەن ءساناتالى تولتاەۆتار ءوز سالماقتارىندا ازيانىڭ تەڭدەسسىز بوكسشىسى دەپ تانىلدى. 60 كيلوداعى ءساماتالى فينالدا جەرگىلىكتى تاي بوكسشىسى ساكدا رۋامتامدى ۇتسا, ءساناتالى (64 كگ) وزبەكستاندىق بىلعارى قولعاپ شەبەرى بيلولبەك ءميرزاراҳيموۆتى جەڭدى. ءسويتىپ, اعالى-ءىنىلى تولتاەۆتار ازيا چەمپيوناتىنىڭ التىن جۇلدەسىن يەلەندى. ايتا كەتەيىك, قازاق بوكسشىلارى تاريحىندا اعايىندى بوكسشىلاردىڭ ءبىر چەمپيوناتتا تۇڭعىش رەت توپ جارۋى.
ال فينالدىق باسەكەدە وزبەكستاندىق قارسىلاستارىنان ۇتىلعان دانيلا سەمەنوۆ (91 كگ) پەن نۇرداۋلەت ۇلان ۇلى (+91 كگ) ازيا چەمپيوناتىنىڭ كۇمىس جۇلدەگەرى, ايبەك دوسانوۆ (52 كگ), ەلديار قامشىبەكوۆ (81 كگ), باقتيار سماعۇلوۆ (56 كگ) جانە ايات مارجىقپاەۆ (75 كگ) قولا جۇلدەگەر اتاندى.
توعىز مەدال يەلەنگەن وزبەكستاندىق بوكسشىلار جالپى ەسەپتە ءبىرىنشى ورىن يەلەندى. قازاقستاندىق بوكسشىلار جەتى مەدالمەن ەكىنشى ورىندى مىسە تۇتتى. وزبەكستاننىڭ سەگىز بوكسشىسى فينالعا شىعىپ, بەسەۋى چەمپيون اتاندى. ءۇش بوكسشىسى فينالدا ۇتىلىپ, كۇمىس جۇلدە يەلەنسە, ءبىر بوكسشىسى قولا مەدالعا قول جەتكىزدى.
ەسكە سالا كەتسەك, جاستار اراسىنداعى ازيا چەمپيوناتى بانگكوكتا وسىمەن ەكىنشى رەت وتكىزىلىپ وتىر. تاي ەلىندە سارى قۇرلىق بىرىنشىلىگى ەڭ العاش 2014 جىلى وتكەن بولاتىن. سول جىلعى باسەكەگە ازيانىڭ 16 ەلىنەن 96 بوكسشى قاتىسقان ەدى. بايقاعاندارىڭىزداي, بيىلعى باسەكەگە قاتىسۋشى ەل مەن بوكسشى سانى ەداۋىر وسكەن. سونداي-اق, بيىلعى چەمپيوناتتىڭ تاعى ءبىر ەرەكشەلىگى, يەمەن مەن قاتار ەلىنىڭ جاس بوكسشىلارى ازيا بىرىنشىلىگىنە تۇڭعىش رەت قاتىستى.
ءالي بيتورە,
«ەگەمەن قازاقستان»
