بىلتىر ەلوردادا 27 244 ءسابي دۇنيەگە كەلدى, بۇل 2015 جىلمەن سالىستىرعاندا 8 پايىزعا ارتىق, دەپ ءمالىم ەتتى قالالىق دەنساۋلىق ساقتاۋ باسقارماسىنىڭ شتاتتان تىس اكۋشەر-گينەكولوگى حاليدا ءشارىپوۆا.
ونىڭ سوزىنە قاراعاندا, ەلوردادا انا مەن بالا ءولىمى كورسەتكىشىنىڭ تومەندەۋىنە باعىتتالعان مەملەكەتتىك جۇمىس حالىق سانىن ارتتىرۋعا سەپ بولدى. «جالپى العاندا قازاقستان بويىنشا انا ءولىمى كورسەتكىشىنىڭ تومەندەۋى بايقالادى. ماسەلەن, استانادا 2016 جىلى وسى كورسەتكىشتەر100 مىڭ سابيگە شاققاندا 7,4 پايىزدى قۇرادى. 3 جىل ىشىندەگى تومەندەۋ 12 پايىزدى قۇرادى (2013 جىل-12,6 پايىز 100 مىڭ سابيگە شاققاندا). بۇل بالا تۋ كورسەتكىشىنىڭ كوبەيگەندىگىن بىلدىرەدى, سايكەسىنشە ەلوردا تۇرعىندارىنىڭ سانى ارتۋدا», -دەدى ح. ءشارىپوۆا.
ونىڭ مالىمەتتەرىنە قاراعاندا, سول كەزەڭدە بالا تۋ كورسەتكىشى 1 000 سابيگە شاققاندا 7,5 پايىزدان 6,4 پايىزعا دەيىن تومەندەدى. بولجام بويىنشا بۇل قارقىن ء(وسىم) وسى جىلى دا ساقتالادى. «قالادا اياعى اۋىر ايەلدەرگە قاجەتتى جەدەل كومەك كورسەتۋ ءۇشىن بارلىق جاعداي جاسالۋدا. دەگەنمەن ءبىز كەز-كەلگەن جاعدايعا دايىن بولۋعا تىرىسامىز. قاتارىنان 3-4 پاتولوگياسى بار ايەلدەر كەزدەسەدى. سوندىقتان دا دارىگەرلەر اياعى اۋىر ايەلدەرگە تەكسەرۋدەن ءجيى ءوتىپ تۇرۋعا كەڭەس بەرەدى», - دەدى دارىگەر.
حاليدا ءشارىپوۆا اتاپ وتكەندەي, انا ءولىمى كوپ جاعدايدا اياعى اۋىر بولعان كەزدە تۋىندايتىن قيىنشىلىقتار مەن بوسانۋ كەزىندە كەزدەسەتىن اۋىرتپالىقتارعا بايلانىستى. وعان قوسا بۇعان جۇكتى ايەلدەردىڭ اياعى اۋىر كەزىندە قاراپايىم ەرەجەلەردى ۇستانباۋى, ماڭىزدى ەلەمەنتتەرگە سالعىرت قاراۋى دا سەبەپ. اكۋشەر-گينەكولوگ اياعى اۋىر ايەلدەرگە جۇكتىلىكتىڭ 12 اپتاسىندا دارىگەرلىك ەسەپكە تۇرۋعا كەڭەس بەرەدى.
«وكىنىشكە قاراي, بۇگىندە ايەلدەردىڭ دەنساۋلىق كورسەتكىشتەرىنىڭ تومەندىگى بايقالۋدا. ءبىزدىڭ ەسەپكە سايكەس, ستاتسيوناردا بوساناتىن ايەلدەردىڭ 20-23 پايىزى عانا قيىندىقسىز دۇنيەگە ءسابي اكەلەدى, قالعان جاعدايلاردا قيىندىقتار كەزدەسەدى. بۇل ايەلدەردىڭ دەنساۋلىعىنىڭ ناشارلىعىن, تومەندىگىن بىلدىرەدى. وسى ورايدا تۇرعىندارعا, اسىرەسە دۇنيەگە ۇرپاق اكەلەتىن ايەلدەرگە دارىگەرگە تۇراقتى تۇردە قارالىپ, ۋاقىتىندا ەمدەلۋگە كەڭەس بەرەمىز», - دەدى ح. ءشارىپوۆا.
