استانا – قازاق ءۇشىن عاسىرلار بويى ارمانداپ كەلگەن ۇلى مۇراتتاردىڭ ۇشار باسىنداي كەشەندى جوبا. جاڭا شاھار تاۋەلسىزدىك پەن وركەنيەتتىڭ التىن قازىعى دەسەك بولادى. ەلوردا – 130-دان استام ۇلت پەن ۇلىستىڭ باسىن بىرىكتىرگەن ۇكىلى ءۇمىت پەن ايرىقشا سەنىمنىڭ نىشانى. كەلەشەكتىڭ كەپىلىندەي الىستان كوزدى اربايتىن جاسىل-جاقۇت – جاڭا يدەيالاردىڭ الاڭى قازىر.
جۋىردا استانادا ءوتىپ جاتقان ەكسپو-2017 حالىقارالىق كورمەسىن ارالادىم. مەنىڭ سوندا بويىمدى ەرەكشە ءبىر رۋح كەرنەدى. ول رۋح – الەمدىك ارەنادا تۇرعان قازاق رۋحى بولاتىن!
باياعى سۋياب, يسپيدجاب, سىعاناق, جەند, تۇركىستان, اقمەشىت, الماتىنىڭ زاڭدى جالعاسى, تاريح تىزبەگى – استانا باياندى بولاشاققا جول اشقان التىن قاقپا, جىبەك جول, كۇمىس كۇمبەز. مارتەبەلى شاھاردىڭ مىنەزى دە باسقا, مايدا, قوڭىر. ەسىلدەي ەسىلىپ جاتقان جاستاردىڭ قالاسى بۇل كەنت!
بۇگىنگى استانانىڭ جاڭاشا ساۋلەتتەگى نۇرلى ناقىشتارى, سونداي-اق, 100 پايىز قازاقى اتاۋلارمەن بەلگىلەنگەن كوشە اتتارىنىڭ ءوزى تاۋەلسىزدىكتىڭ ءتاتتى جەمىسى دەر ەدىم!
پرەزيدەنتىمىز نۇرسۇلتان نازارباەۆتى جانە ءاربىر قازاقستاندىقتى استانا كۇنى مەرەكەسىمەن قۇتتىقتايمىن!
كەڭەس جۇمابەكوۆ,
قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى
قاراعاندى وبلىسى
