الىپ لاينەردىڭ الماتىدان اۋەگە كوتەرىلگەنى ازىردە عانا سياقتى ەدى. يلليۋميناتوردان قانشا ءيتىنىپ تونگەنىمىزبەن, الاتاۋدىڭ قار باسقان سىلەمدەرى بىرتىندەپ الىستاي باستادى. اق بۇلتقا ءسىڭىپ كەتە باردىق. ەركىن تىنىستاعان ەسپەن ىلەسىپ جايلانعان اقىل دا قيالعا شومادى. اسپان استىنىڭ عاجابى وسى-اۋ...
قازاقتىڭ قاشىقتىقتى ولشەيتىن ءداستۇرلى تانىمى قىزىق قوي. قيىر شەتتى بەينەلەي كەلىپ «ۇشقان قۇستىڭ قاناتى تالادى...» دەي سالادى. اسىلىندە, قازىرگى ولشەمدە تەمىر كولىكتىڭ دوڭعالاعى توزىپ, ۇشاقتىڭ بەلى تالىپ جەتەتىن قاشىقتىقتى زامانىندا سالت اتپەن ءجۇرىپ ءوتىپ, يگەرىپ قويعاندىعىنا ريزاشىلىقپەن ايتاسىڭ عوي. ايتپەسە, بايتاق اتامەكەنىمىزدىڭ كولەمىنە قاعاز ۇستىنەن كوز جۇگىرتىپ وتىرىپ, «قۇس قاناتى نە ءتايىرى...» دەيسىڭ! وسى ءبىز ۇشاقپەن 2 ساعاتقا جۋىق ۋاقىتتا ەڭسەرەتىن الاتاۋ مەن ارقانىڭ اراقاشىقتىعى... 1215 شاقىرىمعا تەڭ ەمەس پە؟
...قالعىپ كەتكەن جولاۋشىنى ستيۋاردەسسانىڭ ءسال اكتسەنتتى داۋسى ءتۇرتىپ وياتقانداي بولدى: «قۇرمەتتى جولاۋشىلار! ءبىز مىنگەن ۇشاق ساناۋلى مينۋتتاردان كەيىن استانا قالاسىنداعى نۇرسۇلتان نازارباەۆ حالىقارالىق اۋەجايىنا كەلىپ قونادى...»
قاعىس ەستىمەگەن ەكەنبىز...
ماسساعان, مىنە جاڭالىق!
ەندىگى جەردە استانانىڭ اۋە كەڭىستىگىنە ەنگەن بارلىق باعىتتاعى ۇشاق بورتىنداعى العاشقى حابارلاما جولدارى وسىلايشا ايتىلاتىن بولدى. سەبەبى, ەل ۇكىمەتىنىڭ 2017 جىلعى 20 ماۋسىمداعى №381 قاۋلىسىنا سايكەس استانا حالىقارالىق اۋەجايىنا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ەسىمى بەرىلدى...
عۇمىر ساپارىندا الىس-جاقىن قاشىقتىقتى ۇشاقپەن ەڭسەرگەن جاندار تۇسىنەدى, جولاۋشى ءۇشىن كەز كەلگەن ەلدەگى ماڭىزدى ورىن – اۋەجايلار. الگى «تەاتر كيىم ىلگىشتەن باستالادى» دەگەن جاتتاندى سوزگە ءسال بوياۋ جاعىپ جىبەرسەك, مەملەكەتتىڭ قاقپاسى اۋەجايدان باستاپ اشىلاتىنىن بەينەلەپ ايتقانداي بولامىز. دەمەك, استانا اۋەجايىنىڭ ەلباسى ەسىمىمەن اتالۋى ادىلەتتى شەشىم بولۋى ءتيىس. ءبىزدىڭ بۇل ويىمىزدى قازاقتىڭ ءۇشىنشى عارىشكەرى, حالىق قاھارمانى ايدىن ايىمبەتوۆ بىلايشا نىعىزداي ءتۇستى:
– استانا اۋەجايى – باس قالانىڭ عانا ەمەس, تاۋەلسىز ەلىمىزدىڭ نەگىزگى قاقپاسى, باستى اۋە ءدالىزى. اۋەجايعا ەلباسى ەسىمىنىڭ بەرىلۋى ەلدىڭ ەلدىگىن, ەردىڭ ەرلىگىن تەرەڭنەن تانىتا تۇسەتىن قۇتتى قادام بولدى دەپ بىلەمىز. ءبىز ۇنەمى اۋەدە جۇرەمىز, ماڭگى اسقاق كورىنەتىن اسپاندا قىرانداي قالىقتاعان اسكەري قىزمەتىمىزدە بىزدەن قالت جىبەرمەس قىراعىلىق تالاپ ەتىلەدى. وسى جاۋاپتى دا كۇردەلى قىزمەت بارىسىندا ەلىمىزگە ءزاۋ بيىكتەن كوز سالا ءجۇرىپ, بويىمىزدى ۇنەمى ماقتانىش سەزىمى بيلەيدى. ەندى استانا اۋەجايىنىڭ اتى اتالىپ, توبەسى كورىنگەن سايىن ءبىزدىڭ جۇرەگىمىزدە سول ەلجاندىلىق سەزىمى ەسەلەنە تۇسەتىن بولادى...
ەلجاندىلىق دەگەننەن ەسكە تۇسەدى. وتكەندە استانادا دۇنيەجۇزى قازاقتارىنىڭ قۇرىلتايى ءوتتى. سونداعى قۇرمەتتى قوناقتىڭ ءبىرى, تاەكۆوندادان تۇركيانىڭ چەمپيونى كارىم ءىلياس باۋىرىمىز «مەن ىستانبۇلداعى اتاتۇرىك اەروپورتىنان ۇشىپ كەلىپ ەدىم, ەندى قايتاردا استاناداعى نۇرسۇلتان نازارباەۆ حالىقارالىق اۋەجايىنان اتتاناتىنىما قۋانىشتىمىن...» دەگەن ەدى.
بارشا قازاقتىڭ قۋانىشى ۇزاعىنان بولعاي!
قالماحانبەت مۇقامەتقالي,
«ەگەمەن قازاقستان»
