كەشە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا الماتى وبلىسى اكىمىنىڭ ورىنباسارى جاسىلىق مۇقاش ۇلى استاناداعى الماتى وبلىسىنىڭ مادەنيەت كۇندەرى تۋرالى باياندادى. مالىمدەۋىنشە, كورمە قوناقتارى مەن قالا تۇرعىندارى 11-15 شىلدە ارالىعىندا جەتىسۋدان كەلگەن ونەرپازداردىڭ ونەرىن تاماشالاي الادى.
«ەل تاريحىندا قالاتىن شارانى تاماشالاۋعا الەمنىڭ تۇكپىر-تۇكپىرىنەن كەلگەن ميلليونداعان قوناقتار ءبىزدىڭ ونەرپازداردىڭ ونەرىمەن كەڭىنەن تانىساتىن بولادى. اتاپ ايتار بولساق, ب.ريموۆا اتىنداعى وبلىستىق دراما تەاترى, ءسۇيىنباي اتىنداعى وبلىستىق فيلارمونياسى, «الاتاۋ اۋەندەرى» كونتسەرتتىك بىرلەستىگى, م.تىنىشپاەۆ اتىنداعى وبلىستىق تاريحي-ولكەتانۋ مۋزەيى, كوركەمسۋرەت گالەرەياسى مەن قولونەر شەبەرلەرى جاقسى دايىندىقپەن كەلە جاتىر. الماتى وبلىسى مادەنيەت كۇندەرىنىڭ سالتاناتتى اشىلۋى «جەتىسۋ – جۇماق مەكەنىم» شاراسىمەن باستالادى. ال جابىلۋ ءراسىمى شىلدەنىڭ 15-ءى كۇنى امفيتەاتردا وتەدى. وبلىسىمىزدان تەك قانا مادەني شارانىڭ وزىنە 332 ونەرپاز قاتىساتىن بولادى», دەدى جاسىلىق مۇقاش ۇلى.
شارانىڭ سالتاناتتى اشىلۋ ءراسىمى «قازاقستان» كونتسەرت زالىندا وتەدى دەپ جوسپارلانعان. ال 12 شىلدەدە جاستار سارايىندا ء«سۇيىنباي اتىنداعى الماتى وبلىستىق فيلارمونياسى مەن «قۇلانساز» فولكلورلىق-ەتنوگرافيالىق ءانسامبلىنىڭ قاتىسۋىمەن «جەتىسۋ – ءان-جىردىڭ ورداسى» اتتى ءداستۇرلى اندەر كونتسەرتىن, 14 شىلدە ەتنواۋىلدا «اۋىلىڭ سەنىڭ ىرگەلى» اتتى تەاترلاندىرىلعان كورىنىسى مەن ءداستۇرلى كونتسەرتىن حالىق نازارىنا ۇسىنادى. وسى سارايدا 13 شىلدەدە التىناي مەملەكەتتىك حالىق بي ءانسامبلىنىڭ «تالدى ارۋلارى» كونتسەرتىن تاماشالاۋعا بولادى.
ەكسپو-2017 كورمەسىنىڭ كەلۋشىلەرىنە ب.ريموۆا اتىنداعى دراما تەاترىنىڭ دا بازارلىعى ايرىقشا. ماسەلەن, استانالىقتار مەن قالا قوناقتارى 11-13 شىلدە كۇندەرى «جاستار» تەاترىنىڭ ساحناسىندا وبلىستىق تەاتردىڭ تىرناقالدى قويىلىمدارىنىڭ ءبىر پاراسى «رومەو مەن دجۋلەتتا» تراگەدياسىن, «ەڭ جاقسى ەركەك» كومەدياسىن, ء«ىلياس» دەرەكتى دراماسىن تاماشالاي الادى. ال 11-15 شىلدەدە ۇلتتىق-اسكەري مۋزەيىندە م.تىنىشپاەۆ اتىنداعى الماتى وبلىستىق تاريحي-ولكەتانۋ مۋزەيىنىڭ «تاريح بەتتەرىنەن» كورمەسى وتەدى. كورمەگە الماتى وبلىسىنان ارنايى اكەلىنگەن تاريحي ەكسپوناتتار قويىلادى. كەلۋشىلەر عالىم-ساياحاتشى شوقان شىڭعىس ۇلى ءۋاليحانوۆتىڭ قولدانعان زاتتارىمەن وسى كورمە ارقىلى تانىسا الادى. قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-تاريحي مۋزەيىندە «اتا-بابا اڭساعان ماڭگىلىك ەل» اتتى كوركەمسۋرەت كورمەسى دە وتەدى. ۇيىمداستىرۋشى – الماتى وبلىستىق «كوركەمونەر» گالەرەياسى. كورمەگە گالەرەيانىڭ نەگىزگى قورىنداعى بۇعان دەيىن كوركەمونەرتانۋشىلاردىڭ جوعارى باعاسىن العان جەرگىلىكتى سۋرەتشىلەردىڭ تۋىندىلارى قويىلادى. كورمەنى 11-15 شىلدە ارالىعىندا تاماشالاۋعا بولادى. سونداي-اق, الماتى وبلىستىق «ۇستا داركەمباي» اتىنداعى قولونەر مۋزەيىنىڭ تارتۋى «شىعىس بازارى» 11-20 شىلدە ارالىعىندا ەتنواۋىلدا وتپەك. قولونەر شەبەرلەرىنىڭ مەتالدان, تەرىدەن, اعاشتان جاسالعان بۇيىمدارى قوناقتاردىڭ نازارىنا ۇسىنىلادى. قولونەر مۋزەيى قىزمەتكەرلەرى زەرگەرلىك پەن قىش ونەرىنىڭ قىر-سىرىنا قانىق بولىپ, كيىز باسۋ, توقىما ونەرلەرىنەن شەبەرلىك كلاستارىن كورۋگە شاقىرادى.
استاناداعى الماتى وبلىسىنىڭ مادەنيەت كۇندەرى 15 شىلدەدە ەكسپو الاڭىنداعى امفيتەاتردا ۇيىمداستىرىلاتىن «جەرۇيىق – جاسىل باۋلارىم» اتتى كونتسەرتپەن قورىتىندىلانادى.
دينارا بىتىكوۆا,
«ەگەمەن قازاقستان»
