ەلباسىمىزدىڭ ەسىمى كۇللى الەمگە حالقىن ورگە سۇيرەگەن بىرەگەي باسشى رەتىندە تانىلىپ, ەستىلە باستاعاننان بەرى دۇنيەجۇزى ەلدەرى قازاقستان مەملەكەتىن مويىنداپ, جاعىمدى, جاقسى اتى ءۇشىن جاقىنىراق تانىعىسى كەلەتىن رايىن بايقاتا باستادى. قازاقستانعا تارتىلىپ جاتقان ينۆەستيتسيالار, كەلىپ جاتقان داڭقتى تۇلعالار, ساپارلاپ جۇرگەن ساياسات سەركەلەرى, ءوتىپ جاتقان بەدەلدى باسقوسۋلار – سونىڭ ايعاعى. قازاقستان بۇگىندە تاتۋلىقتىڭ, بەيبىتشىلىكتىڭ التىن بەسىگىنە اينالدى. سوناۋ تاۋەلسىزدىكتىڭ العاشقى جىلدارىنىڭ وزىندە-اق ن.نازارباەۆ باسقارعان قازاق ەلى جەر بەتىندەگى تۇراقتىلىق پەن قاۋىپسىزدىكتى ساقتاپ قالۋدى قولدايتىن وزىق مەملەكەتتىڭ ۇلگىسىن كورسەتىپ, شارتاراپتاعى جۇرتتىڭ ءبارىن تىنىشتىققا شاقىردى. مىنە, سودان بەرى العاشقى كىرپىشىن ءوز قولىمەن قالاعان استانانى بەيبىت كەلىسىمدەردىڭ الاڭىنا اينالدىردى. جەر جۇزىندەگى الپاۋىت ەلدەردىڭ اراسىنداعى تەكەتىرەس كۇشەيگەن كەزىندە الاقانداي عانا استانا ارااعايىندىق جۇگىن كوتەرىپ, كوزقاراسى قايشى مەملەكەتتەردى ءبىر مۇددەگە ورتاقتاستىرۋ ءۇشىن ءبىر ۇستەلدىڭ باسىنا وتىرعىزدى. ساياسات قايشىلىعىن, ءدىن الاۋىزدىعىن رەتكە كەلتىرۋ ءۇشىن ء وزارا تۇسىنىستىككە باستايتىن مامىلەلەر جاساۋعا ۇيىتقى بولدى. استانا از عانا ۋاقىتتىڭ ىشىندە دۇنيەجۇزىنىڭ دانا باسشىلارى باس قوساتىن ساياساتتىڭ قالاسىنا اينالىپ شىعا كەلدى. از ەڭبەك ەمەس. از دەيمىز-اۋ, ۇشى-قيىرى جوق وسى ەڭبەكتىڭ ءبارى اتان جىلىك ازامات قانا كوتەرە الاتىن ناردىڭ جۇگى ەمەس پە.
ەلباسىمىزدىڭ جۇرگەن جەرى – بەيبىتشىلىك. قايدا بارسا دا ىمىرانى, ىنتىماقتى وزىمەن بىرگە الا جۇرەدى. ەلىمىزدىڭ اماندىعى, جەرىمىزدىڭ تىنىشتىعى ءۇشىن ءدال ءبىزدىڭ ەلباسىمىزداي الاڭداپ, كۇن دەمەي, ءتۇن دەمەي, تاۋلىگىنە نەشە ساعات اسپاندا ۇشىپ, جۇرتىنىڭ قامى ءۇشىن جانۇشىرىپ جۇرگەن ەلجاندى باسشى نەكەن-ساياق بولار دەپ ويلايمىن. مەملەكەت تىزگىنىن ۇستاعان سوڭ ءبارى دە جۇرتىنىڭ جايىن ويلايدى عوي, بىراق ءبىزدىڭ پرەزيدەنتىمىزدىڭ پەرزەنت رەتىندەگى پارىزىن تەرەڭ ءتۇسىنۋى جانە سوعان ساي حالقىنا ادال قىزمەت قىلۋى الابوتەن سياقتى كورىنەدى. ەلى ەلباسىنى قولداپ, ەلباسىمىز ەلىنە سۇيەۋ بولىپ اتقاراتىن قىرۋار شارۋا شاش ەتەكتەن الدا ءالى كۇتىپ تۇر.
دۇنيە جۇزىندە تۇڭعىش رەت الەمدەگى تەاترلاردىڭ فەستيۆالىن جاس استانادا وتكىزۋىنىڭ ءوزى نەگە تۇرادى! مۇنداي حالىقارالىق كەڭ اۋقىمدى شارانى وتكىزۋگە ەكى ەلدىڭ ءبىرى بەل شەشىپ كىرىسە المايدى. قاراجاتىن ايتپاعاندا, بۇعان قانشاما كۇش-قايرات جۇمسالادى. پرەزيدەنتتىڭ پارمەنىمەن وتكىزىلگەن فەستيۆالگە قازاقستانعا عۇمىرى تابانى ءتيىپ كورمەگەن وزگە ەلدىڭ تالانتتارى جينالىپ, ءوز ونەرىن كورسەتىپ, باسقانىڭ دا ونەرىن پارىقتاپ, بۇگىنگى تەاتردىڭ باعىت-باعدارىن سالىستىرىپ, سارالاۋ ءۇشىن زور مۇمكىندىككە يە بولدى. ال مۇنداي باعا جەتپەس تاجىريبە الماسۋلار ەلىمىزدىڭ تەاتر ونەرىن تاعى ءبىر بەلەسكە كوتەرىپ تاستايتىنى انىق. ءبىر عانا تەاتر ونەرىنىڭ ءوزى وسىنشاما بايلىققا كەنەلگەندە, باسقا سالالار بويىنشا وتكىزىلىپ جاتقان مىڭ سان سالماقتى شارالاردىڭ ەلىمىزگە, حالقىمىزعا بەرەر يگىلىگىن, پايداسىن سانامالاپ شىعۋ ءتىپتى دە مۇمكىن ەمەس.
ەسمۇحان وباەۆ,
قازاقستاننىڭ حالىق ءارتىسى, پروفەسسور
الماتى
