سالتاناتتى ءراسىم ەكى ەلدىڭ مەملەكەتتىك انۇرانىمەن اشىلدى. ودان كەيىن ءسوز العان ءماجىلىس سپيكەرى جينالعانداردى قىتاي ۇلتتىق كۇنىنىڭ اشىلۋىمەن قۇتتىقتاي كەلىپ, الەم ەلدەرىنىڭ قازاقستانعا دەگەن سەنىمى مەن قۇرمەتىنىڭ ايشىقتى دالەلىنە اينالعان ەكسپو كورمەسىن وتكىزۋ قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ حالىقارالىق بەدەلىنىڭ جانە جاھاندىق دەڭگەيدە ويلايتىن كورەگەن ساياساتىنىڭ ناتيجەسى ەكەنىن اتاپ ءوتتى.
– «بولاشاقتىڭ ەنەرگياسى» جانە «جاسىل ەكونوميكا» تەك بىرنەشە مەملەكەتتىڭ عانا ەمەس, بارشا ادامزاتتىڭ دامۋى ءۇشىن وتە ماڭىزدى, وتە قاجەتتى ماسەلە. سوندىقتان, ءبىزدىڭ كورمەمىز وسى الەمدىك ماسەلەگە ءوزىنىڭ زور ۇلەسىن قوسادى دەپ سەنەمىز, – دەدى ن.نىعماتۋلين.
ءماجىلىس توراعاسى اتاپ وتكەندەي, پرەزيدەنتتىڭ باستاماسىمەن ەلىمىزدە بەلسەندى جۇرگىزىلىپ جاتقان ەنەرگەتيكا سالاسىن جاڭعىرتۋ جۇمىستارىنىڭ ارقاسىندا قازاقستاندا قۋاتى 300 مەگاۆاتت بولاتىن, جاڭارتىلاتىن ەنەرگيا وندىرەتىن كاسىپورىندار سانى 50-گە جەتتى. الداعى 2050 جىلعا قاراي قاجەتتى ەلەكتر قۋاتىنىڭ تەڭ جارتىسى وسى جاڭارتىلاتىن ەنەرگيادان وندىرىلمەك.
وعان ەكسپو كورمەسىنىڭ دە ىقپالى زور. ويتكەنى, بۇل جەردە الەمدىك دەڭگەيدەگى, بولاشاعى زور ۇزدىك جوبالار قويىلعان.
ال قىتايدىڭ ەكسپوزيتسياسى وسى كورمەدەگى ەڭ ءىرى جانە ەڭ ۇلكەن جۇمىستاردىڭ ءبىرى. اتالعان ەلدىڭ كورمەگە قاتىسۋى – جاڭا تەحنولوگيانىڭ دامۋىنا جانە ءبىزدىڭ ەلدەرىمىز اراسىنداعى بايلانىستى ودان ءارى تەرەڭدەتۋگە جول اشادى.
وسىدان كەيىن ءسوز العان شەن يۋە يۋە حانىم قىتايدىڭ ەكسپو كورمەسىنە اسا قىزىعۋشىلىقپەن ءمان بەرىپ, ۇلتتىق پاۆيلوندى دايىنداۋعا وراسان كۇش جۇمساعانىن ايتتى. ءوز سوزىندە:
– استانا ەكسپو-2017 كورمەسىنە قاتىسۋ ارقىلى ءبىز قىتاي – قازاقستان دوستىق قارىم-قاتىناستارىن نىعايتىپ, ەكى ەل اراسىنداعى ستراتەگيالىق ارىپتەستىكتى جاڭا بيىكتەرگە جەتكىزە الامىز دەپ ۇمىتتەنەمىن, – دەدى ول.
سالتاناتتى راسىمنەن كەيىن ەكى ەلدىڭ پارلامەنت وكىلدەرى مەن مەيماندار قازاقستاننىڭ «نۇر الەم», قىتايدىڭ «بولاشاقتىڭ ەنەرگياسى, جاسىل جىبەك جولى» اتتى ۇلتتىق پاۆيلونىن ارالاپ, يننوۆاتسيالىق جەتىستىكتەرمەن تانىستى.
